Read tiv Mpase U Yohane 7 Bible Online

Mpase U Yohane 7 - tiv bible

Mpase U Yohane 7

¹Ken masetyô u akaa ne yô, m nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la sha u ma ahumbe a̱ de pever shin tar ga, shin sha zegemnger kpaa ga, shin sha ma kon kpaa ga.

²Shi m nenge ortyom u Sha ugen lu kôndon pe iyange i dugh la, kôr kwagh u veren ikav a mi u Aôndo u uma la ken uwegh nagh, a ôr kwagh genger genger a mbatyomov mba Shaav mba unyiin mbala, mba i ne ve tahav mbu ve̱ vihi tar kua zegemnger kpaa la,

³a kaa er: De vihin tar shin zegemnger shin ikon kpaa ga saa sé ver mbatomov mba Aôndo wase ikav sha atsul ve.

⁴Tsô m ungwa iyenge i mba i ver ve ikav la, ka ior dubu deri môm man dubu akunduahar kar unyiin i ver ve ikav ken ikwe i ônov mba Iserael la cii ye.

⁵Ken kwe u Yuda mba i ver ve ikav yô, ve lu dubu pue kar uhar. Ken kwe u Ruben lu dubu pue kar uhar. Ken kwe u Gadi lu dubu pue kar uhar,

⁶ken kwe u Asher lu dubu pue kar uhar, ken kwe u Nafetali lu dubu pue kar uhar, ken kwe u Manase lu dubu pue kar uhar,

⁷ken kwe u Shimeon lu dubu pue kar uhar. Ken kwe u Levi lu dubu pue kar uhar, ken kwe u Isakar lu dubu pue kar uhar,

⁸ken kwe u Sebulon lu dubu pue kar uhar, ken kwe u Yosev lu dubu pue kar uhar man ken kwe u Benyamin kpaa mba i ver ve ikav yô, ve lu dubu pue kar uhar.

⁹Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. Ve tile sha ishigh ki ikônough ki torough kila man sha ishigh ki Waniyôngo ve haa akondo a pupuu iyol shi ve lu a andar a avilegh sha ave.

¹⁰Ve lu genger imo kaan er: Myom ka u Aôndo wase u A tem sha ikônough ki torough la man shi Waniyôngo kpaa.

¹¹Mbatyomov mba Shaav cii tile kase ikônough ki torough man shi mbatamen man akaauma a anyiin la kpaa, ve gba inya ve cir ishiv inya sha ishigh ki ikônough ki torough kila ve civir Aôndo,

¹²ve kaa er: Amen, iwuese man iengem man kwaghfan man ishughun man icivir man agee man mtaver cii ve̱ lu mba Aôndo wase gbem sha won. Amen.

¹³Ugen ken mbatamen ôr kwagh a mo kaa er: Mba ve hee akondo a pupuu la, ka unô, man shi ka han ve dughu?

¹⁴M gema m kaa a na mer: Terem, we u fa. Tsô a kaa a mo er: Mban ka mba ve dugh ken zegecan la yô; ve ôô uriga vev ken awambe a Waniyôngo, ve kungu ve.

¹⁵Ka sha ci u nahan man ve lu sha ishigh ki ikônough ki Aôndo ki torough, ve lu eren Un tom ken tempel Na tugh man tetan kpaa ye. Un u A tem sha ikônough ki torough la Una samber tenti Na sha a ve.

¹⁶Ijen ia kera kôr ve mayange ga, imura kpaa ga, oo ua kera ta ve ga shin ma mtsee kpaa ga,

¹⁷gadia Waniyôngo u A lu ker atô u ikônough ki torough la Una hemen ve, Una za a ve hen ambor a mngerem ma umam, Aôndo Una ese ve mliam sha ashe kera cii.