Read tiv Rutu 4 Bible Online

Rutu 4 - tiv bible

Rutu 4

¹Tsô Boashi mough za hen hundagar, za tema her; yô, orpaan u Boashi ter kwagh na la, gba va karen; a gema a kaa er: We, via la, va va tema heen yôô. Tsô a va, a va tema inya.

²Nahan a kohol mbavesen mba ken gar pue, a kaa er: Tema nen heen. Tsô ve tema.

³A gema a kaa a orpaan shon la er: Nenge, Naomi u a hir ken tar u Moabi ne, ngu teen sule u anngô wase Elimeleki la;

⁴man mo yô, m hen mer, me pase u kwagh shon; yô, yam u sha ishigh ki mba ve tem heen ne, man sha ishigh ki mbavesen mba ior av. Wea paan u yô, paa ase; man aluer wea paan u ga yô, kaam sha er me fa yô; gadia orgen u paan ngu ga saa we; a lu we ga yô, saa shi ka mo je. Tsô a kaa er: Me paa u.

⁵Tsô Boashi gema kaa er: Iyange i ú yamen sule la a Naomi yô, ú kua Rutu sha mi kpaa, wan u Moabi, kwase u nom na a kpe la, ú ver orkpen la tse sha dyako na.

⁶Orpaan la gema kaa er: Nahan yô, me fatyô u paan u sha ci wam iyol yam ga, gayô, me va vihi dyako wam; we gba paan sha ityough yagh tsô; gadia mo me fatyô u paan u ga.

⁷Kwagh ne lu ieren hen Iserael ngise sha kwagh u paan man kwagh u musan, sha u kuren hanma kwagh a mi yô; or nan tsuwa ikôvough ki nan, nan na orgen la; kwagh ne lu u kuren kwagh a mi ken Iserael.

⁸Tsô orpaan la kaa a Boashi er: Yam u sha ci wou iyol you; nahan a maa a tsuwa ikôvough nagh.

⁹Tsô Boashi kaa a mbavesen kua ior cii er: Ne mbam shiada nyian, er akaa a Elimeleki cii, man akaa a Kilion kua a Malon kpaa m yam a, a Naomi yô.

¹⁰Man shi m tôô Rutu wan u Moabi, kwase u Malon la kpaa, a hingir kwase wam, sha u á ver orkpen la tse sha dyako na, man iti i orkpen la ia ndiir hen anmgbianev nav man hen hundagar na kera ga yô; ka ne je ne lu mbashiada nyian ye.

¹¹Nahan ior i i kohol hen hundagar la cii kua mbavesen kpaa, ve kaa er: Se mba mbashiada. TER A̱ ver kwase u a ve hen ya wou la, a̱ hingir er Rahel man er Lea nahan, ve mba uhar, mba ve maa ya u Iserael la. We kpaa hingir orageegh ken Eferata, za iti ken Betelehem kpaa.

¹²Tsombor wou u TER Una na u ken wankwase ne, u̱ lu er tsombor u Perese u Tamar mar a Yuda la nahan.

¹³Nahan Boashi tôô Rutu hingir kwase na; a yav a na; TER rumun un, a wa iyav, a mar wannomso.

¹⁴Nahan kasev kaa a Naomi er: I̱ wuese TER u A rumun er orpaan a̱ de banen we nyian ga ne, iti na kpaa i̱ za gwa ken Iserael cii.

¹⁵Una taver uma wou shi una koson we ken iyolbeen you kpaa; gadia kwase u wan wou, u u doo un ishima la, u a hembe u ônov mba nomso utaankaruhar ne, a mar un.

¹⁶Tsô Naomi tôô wan la, kuve sha ikum, maa a hingir u yesen un.

¹⁷Kasev mba ve wa ndor a na, ve ii un iti, ve kaa er: I mar Naomi wannomso; ve ii un iti er Obedi; ka un a lu ter u Yese, ter u Davidi ye.

¹⁸Ingin ka ikov i Perese ne: Perese mar Heseron,

¹⁹Heseron mar Ram, Ram mar Aminadabi,

²⁰Aminadabi mar Nashon, Nashon mar Solomon,

²¹Solomon mar Boashi, Boashi mar Obedi,

²²Obedi mar Yese, Yese mar Davidi.