Read tiv 1 Samuel 10 Bible Online

1 Samuel 10 - tiv bible

1 Samuel 10

¹Tsô Samuel tôô gbermkure haa un sha ityou, suse un zwa, kaa er: TER kera shighe u mkurem er u̱ hingir tor sha dyako Na gaa?

²Er u mough hen a mo nyian yô, ú za kohol ior ihiar hen uwar u Rahel, hen ikighirtar i Benyamin vegher u ken Selsa; vea kaa a we er: Ujaki mba u ze u keren la, i zua a ve; nahan teru mem sha kwagh u ujaki la, ishima gema ngi nyian un a ven, ngu kaan er: Me er nan sha kwagh u wan wama?

³Tsô ú karen heera yô, ú za ar hen kon u terebin u Tabor, ior itiar vea kohol we her, mba zan hen Aôndo hen Betel, u môm tôô anivoov utar, ugen tôô ikpenbredi itiar, ugen shi tôô ishegh i wain;

⁴vea sugh u, vea na u ikpenbredi ihiar, ú ngohol i sha ikev ve.

⁵Tsô ken masetyô yô, ú za ar hen igungu u Aôndo, hen ape afo a Mbafiliti a lu la; tsô ú aren hen gar shon yô, ú kohol ikum i uprofeti mba senen sha ijiir i taven sha mba a adiguve man akacha man imar man molo ken hemen ve; vea lu ôron kwaghôron u profeti.

⁶Jijingi u TER Una gba sha a we sha agee, ú gba ôron kwaghôron u profeti a ve imôngo, ú gema ú hingir kposo.

⁷Tsô, shighen u akav ne cii aa er u yô, hanma kwagh u uwegh ough ku zough a mi u eren yô, er un je, gadia TER ngu a we.

⁸Vande hemen a mo, sen shin Gilgal; yô, mo kpaa, me sen me va kohol we sha u nan iniav mbi nanden man u sôngon iniav mbi bem; hila tile ayange ataankarahar, zan zan me va her a we, me va tese u kwagh u ú er yô.

⁹Tsô zum u a na ijime ken Samuel ngur yemen yô, Aôndo gema un ishima; akav la cii kpaa er sha iyange la.

¹⁰Mba za ar hen igungu la yô, ikum i mbaprofeti va zua a na her; Jijingi u Aôndo kpaa kende un sha agee, a gba ôron kwaghôron u profeti a ve imôngo.

¹¹Tsô ior mba ve vande fan un kera yô, er ve nenge a lu ôron kwaghôron u profeti a uprofeti imôngo yô, ve gba pinen ayol a ve er: Ka nyi i er wan u Kishi nee? Saulu di kpaa nyôr nongo a uprofetii?

¹²Ugen u ken ijiir la gema kaa er: Ka an je nan lu ter ve ase? Kwagh shon maa i ver ishor a mi je er: Saulu kpaa nyôr nongo a uprofetii?

¹³Kur u ôron kwaghôron u profeti yô, a va sha ijiir i taven sha.

¹⁴Tsô anngô u ter u Saulu pine un kua wanye na, er: Ka han ne ze? A kaa er: Ka ujaki mba za keren; er se ker, kpa se zua a mi ga yô, se va hen Samuel.

¹⁵Anngô u ter u Saulu la kaa a na er: Shi ôrom kwagh u Samuel a er a ven yôô.

¹⁶Saulu kaa anngô u ter na la er: A kaa se jighilii er i zua a ujaki. Kpa kwagh u tor u Samuel kaa un la yô, a ôr un ga.

¹⁷Tsô Samuel lôhô ior er, ve̱ kohol hen TER hen Misepa;

¹⁸a kaa a Mbaiserael er: TER, Aôndo u Iserael, ngu kaan nahan er: Ka Mo M due a Iserael ken Igipiti ye, M yima ne sha ikev i Mbaigipiti kua sha ikev i ityartor i i er ne ican cii kpaa;

¹⁹kpa nyian, ne venda Aôndo wen, Un u A yem ne iyol Na je, ken atsan a en cii kua uzayol enev, ne kaa a Na, ner: Ei! Na se tor. Nahan yô, va tile nen ase heen sha ishigh ki TER sha ikwe ikwe man sha udubu udubu.

²⁰Er Samuel kporom a ikwe i Iserael cii ikua ikua yô, i tôô kwe u Benyamin.

²¹Shi a kporom a kwe u Benyamin sha icombor icombor, nahan i tôô tsombor u Materi, i shi i tôô Saulu wan u Kishi; kpa mba keren un yô, i zua a na ga.

²²Nahan ve seer pinen TER er: Shin ma orgen ngu u nana shi á va heene? TER gema kaa er: Nenge, a yer ken uika.

²³Tsô ve za ayem ve za kua a na ker; va til hen ior yô, a tav, a kar ior mbagenev cii, hii sha avandeaveegh a na yem sha.

²⁴Tsô Samuel kaa a ior cii er: Ne nenge or u TER A tsough ne zee? Ma or u kuman sha a na nan ngu ga. Nahan ior cii genger imo kaa er: Tor a̱ lu uma!

²⁵Tsô Samuel pase ior mlu u tar u tor a lu ker yô; man shi a nger un ken ruamabera, a ver sha ishigh ki TER. Tsô Samuel na ior cii gbenda, er hanma or nana̱ yem hen ya u nan.

²⁶Saulu kpaa yem hen ya na hen Gibea; ior mbagenev mba mimi mba Aôndo kpoghol ve asema yô, ve yem a na imôngo.

²⁷Kpa udangmbaiorov mbagenev gema kaa er: Á er nan man or ne una yima se? Nahan ve laha un, ve va sugh un a ma kwagh ga; kpa un yô, lu ving.