Read tiv 1 Samuel 11 Bible Online

1 Samuel 11 - tiv bible

1 Samuel 11

¹Tsô Nahashi Oramon mough ityav a Yabeshi-gileadi, a haa afoautya; nahan ior i Yabeshi cii, ve kaa a Nahashi er: Ya ikur a vese, nahan sé gbaa shiren we tsô.

²Kpa Nahashi Oramon kaa a ve er: Me ya ikur a ven aluer nea rumun ner, m̱ ongor ne ashe a ken iyan cii yô; me er kwagh ne Mbaiserael cii ve̱ hee.

³Tsô mbatamen mba Yabeshi gema kaa a na er: Yô, na se ian ayange ataankarahar, sé tindi mbatyomov ken tar u Iserael cii; tsô, aluer ma or u yiman se nana lu ga yô, sé due sé gba van a yasegh her a we tsô.

⁴Nahan mbatyomov za nyôr hen Gibea u Saulu, ve za ôr ior akaa la; nahan ior cii ger mliam, gba vaan.

⁵Hen shighe la Saulu za hide ken toho, dondo sha ibua; tsô Saulu pine er: Ka nyi i tser ior mban, ve vaana? Nahan ve ôr un kwaghôron u ior mba Yabeshi la.

⁶Saulu ongo akaaôron la nahan yô, Jijingi u Aôndo kende un sha agee, ishima vihi un tsung.

⁷A kôr ibua ihiar, a sôngo i, a bur aci aci, a tindi a mi ken tar u Iserael cii sha ikev i mbatyomov, a kaa er: Hanma or u nana mough nana dondo sha Saulu kua Samuel ga yô, kape á er a ibua i nan la. Tsô mcieryol u TER haa sha ior, ve due er ka or môm nahan.

⁸A ôr iyenge ve ken Beseki; Mbaiserael lu ior dubu deri utar; ior mba Yuda gema lu dubu ikundugber.

⁹Ve kaa a mbatyomov mba ve va la, er: Za ôr nen ior mba Yabeshi-gileadi mbala ner: Kper shighe u oo á ta la, tsô né zua a myom. Tsô mbatyomov mbala va, va ôr ior mba Yabeshi nahan, nahan ve gba ember.

¹⁰Nahan ior mba Yabeshi, kaa er: Kper sé due sé va her a ven, yô, gba eren nen a vese sha ishima yen tsô.

¹¹Kper nan yô, Saulu pav ior akum atar, ve va nyôr hen atô u afoogh sha mkor u sha use la, ve hemba Mbaamon zan zan oo ta; mba ve shi yô, ve sambe, i kera nenge a ior ihiar ijiir i môm je ga.

¹²Nahan ior kaa a Samuel, er: Ka an nan lu pine er: Saulu una lu tor sha a vese je he? Yô, i̱ va ase a ior mbala, sé wua ve.

¹³Kpa Saulu venda er: Á wua ma or sha iyange ne ga, gadia TER na myom ken Iserael nyian.

¹⁴Tsô Samuel kaa a ior er: Va nen, sé za hen Gilgal, sé za kimbir nen tor u kôron ker.

¹⁵Nahan ior cii za hen Gilgal; ve za kôr Saulu tor ker, sha ishigh ki TER ken Gilgal; ve na iniav mbi bem sha ishigh ki TER her; Saulu man ior mba Iserael cii ember her kpishi.