Read tiv 1 Samuel 17 Bible Online

1 Samuel 17 - tiv bible

1 Samuel 17

¹Tsô Mbafiliti kohol akumautya a ve sha u nôngon ityav; ve zua hen Soko u Yuda, ve haa afo hen harga u Soko vea Aseka ken Efese-damim.

²Saulu man ior mba Iserael kpaa ve kohol, ve haa afo shin pev u Ela, ve samber ityav a Mbafiliti.

³Mbafiliti tile sha uwo vegher ne, Iserael tile di sha uwo vegher la; pev lu ve her atô.

⁴Tsô nomor u agbende agbende due ken afo a Mbafiliti, iti na er Goliati u Gati; ityaven na kuma aseva ataratar cir tiôn.

⁵Lu a akera u togula sha ityou, haa riga u iyôô u lun avuu avuu; myohom ma riga la kuma ushekel mba togula dubu utaan.

⁶Lu a akaa a yisan agongo, a sha togula, shin angahar, a gbire dagi u togula sha avande.

⁷Ihande i iwange na lu er igyaikondo yô; myohom ma gbenger-iwange na kuma ushekel mba iyôgh ki iligh deri ataratar; or u tôôn un perutya, hemen un.

⁸Tsô a tile a yila akumautya a Iserael, a kaa a ve er: Ka nyi ne dugh sha u tangen ityava? Ka mo Orfiliti gaa, ne di ne mba ikpan i Saulu gaa? Yô, tsuwa nen or wen nana̱ sen hen a mo heen.

⁹Aluer nana fatyô u nôngon ityav a mo, nana wuam yô, sé hingir ikpan yen, man aluer mo me hemba nan, me wua nan yô, ka ne, ne lu ikpan yase, né eren se tom kpaa ye.

¹⁰Shi Orfiliti la kaa er: M ngu bamen akumautya a Iserael nyian mer: Nam nen or, se̱ nôngo ayol a ase.

¹¹Zum u Saulu kua Mbaiserael cii ve ungwa kwaghôron u Orfiliti la yô, cier ve iyol, ve cia kpishi.

¹²Davidi lu wan u or u Eferata, or u Betelehem u ken Yuda, u i yer iti na er Yese la; lu a ônov anigheni mba nomso; or la lu orbeenyol je sha ayange a Saulu la, tsa sha won ayange ngee.

¹³Ônov mba Yese mbavesen utar vande zan a Saulu ken utya; ati a ônov nav mba utar mba ve za ityav la yô, ka Eliabi waniunda man idyondon na Aminadabi man u sha utar la, Shama.

¹⁴Davidi lu u masetyô; mbavesen mba utar mbala lu a Saulu ityô.

¹⁵Davidi yô, a zer moughon hen Saulu hiden sha u va kuran ilev mbi ter na hen Betelehem gbem.

¹⁶Orfiliti la, a zer van pepe man aikighe, zan zan ayange akunduahar, lu pasen iyol na ken igbar.

¹⁷Tsô Yese kaa a wan na Davidi er: Shi tôô efa u alakema u kaan ne kua ikpenbredi pue sha ci u anngôôv ou, yem ken afo, za na anngôôv ou;

¹⁸man za a uciishi pue mban, za na orhemen ve u a hemen ior dubu la, shi nenge mlu u anngôôv ou, yô, ngohol ikav her a ve.

¹⁹Saulu man ve kua ior mba Iserael cii, ve lu shin pev u Ela, ve lu nôngon ityav a Mbafiliti.

²⁰Nahan Davidi mough pepe pepe, undu iyôngo sha ikev i orkuranilev ugen, a tôô, a yem er Yese kaa un nahan; a za ar hen afo a akeke la, shighe u akumautya lu duen zan hen ijiir i nôngon ityav, eren akenge a utya la.

²¹Iserael man Mbafiliti ve tange ityav, ikumutya ver ishigh sha ikumutya.

²²Tsô Davidi ver ikav nav sha ikev i orkuranilev, coon ayem, za hen tangeutya, za sugh anngôôv nav.

²³Ngur ôron kwagh a ve yô, nenge, nomor u agbende agbende, Orfiliti u Gati u i yer er Goliati la, due ken tangeutya u Mbafiliti, gba ôron kwagh sha inja i a ôron keke la; nahan Davidi ungwa kwagh la.

²⁴Ior mba Iserael cii, mba nengen a or la yô, ve yevese un, ve cia kpishi.

²⁵Nahan ior mba Iserael kaa er. Ne nenge or la, er a kende kpa? Ka sha u una va bam Iserael a kende ye; nahan aluer or nana wua un yô, tor una na nan nana hingir ornyar kpishi, shi una na nan wan na u kwase, man shi una wase ya u ter u nan dedoo ken Iserael kpaa.

²⁶Tsô Davidi ôr kwagh a ior mba ve tile a na la, a kaa er: Á er a or u nana wua Orfiliti ne, man nana tôô iheen i Iserael kera la nana? Orfiliti oripusu ne ngu nyi je, man a bamen akumautya a Aôndo u uma?

²⁷Nahan ior gema ôr un kwaghôron u ashen la, er: Ka ape á er a or u nana wua un la.

²⁸Tsô Eliabi, anngô na u vesen ungwa er a lu ôron kwagh a ior yô, nahan ishima vihi Eliabi a Davidi, a kaa er: Ka nyi u ve heene? Man ka an u we nan aniyôngov mba kpeghee mba ken toho mbala sha ikeve? M fa ihagher you man ifer i i lu ken ishima you la; gadia u sen, u va ityav mbi kenger tsô.

²⁹Tsô Davidi kaa er: M er nyi ase? M pine a pine kwagh tsô gaa?

³⁰Tsô a kar her a na kera a hide hen orgen, a shi a pine er ashen nahan; ior mbala shi ôr un di er ashen nahan.

³¹Mba ongo kwagh u Davidi ôr la yô, ve za ôr Saulu, tsô a tindi loho er a̱ va.

³²Nahan Davidi kaa a Saulu er: Or môm môm, ishima i̱ de kera yen nan sha ci u or la ga, wanye wou una za nôngo a Orfiliti la.

³³Kpa Saulu kaa a Davidi er: U fatyô u zan, za nôngon ityav a Orfiliti ne ga; gadia we u ngu wanye tsô, kpa un yô, gema ka orutya hii iyev je.

³⁴Davidi gema kaa a Saulu er: Er wanye wou a kor ilev mbi ter na yô, begha ka una va shin dwem a̱ va kôr waniyôngo ken ikumuile yô,

³⁵m zenda un ijime, m za ta num sha a na, m ngohol un waniyôngo sha zwa; shin una mough num a mo kpaa, m kôr un sha indyer, m hemba un, m wua.

³⁶Wanye wou hemba begha kua dwem kpaa; nahan oripusu Orfiliti ne una hingir er mô ve nahan, sha ci u a bamen akumautya a Aôndo u uma yô.

³⁷Davidi shi kaa er: TER u lu yimam sha ikev i begha man sha ikev i dwem la, shi Una yimam sha ikev i Orfiliti ne kpaa, Nahan Saulu kaa a Davidi er: Yô, za, TER A̱ lu a we.

³⁸Tsô Saulu haa Davidi akondo a na, cir un akera u togula sha ityou, shi haa un riga u iyôô.

³⁹Davidi kange sanker na sha akondo a na kpaa, gba nôngon u yemen, gadia lu a vande karen a iyol ga. Tsô Davidi kaa a Saulu er: M fatyô u zenden a mi ga, gadia m vande karen a iyol ga. Nahan Davidi er a kera.

⁴⁰Tsô a kôr gbough nagh sha uwe, a sange awen a kôngor ataan, shin uwagh, a haa ken ikpa na i orkuranilev i a lu a mi yô, ka ikpa i mzu je la; mzu na kpaa a lu a mi sha uwe; tsô a kporom hen Orfiliti la.

⁴¹Orfiliti la kpaa, gba kporom van hen Davidi; ortilin un perutya la, kar hemen.

⁴²Kpa zum u Orfiliti la ta ashe za nenge a Davidi yô, a laha un, gadia lu wanye tsô, lu nyian, kuma ashe.

⁴³Nahan Orfiliti la kaa a Davidi er: Mo m ngu waniwa, shin u ve hen a mo a mbaagaa? Shi Orfiliti la wa Davidi ifan sha iti i mbaaôndo nav.

⁴⁴Orfiliti la kaa a Davidi er: Va ase her a mo heen, me gema inyam you me na inyon i i purugh sha kua inyamtoho.

⁴⁵Tsô Davidi kaa a Orfiliti la er: U ngu van her a mo a sanker man iwange kua dagi, kpa mo yô, m ngu van hen a we ken iti i TER u akum a Sha, Aôndo u akumautya a Iserael, u u bamen Un la.

⁴⁶TER Una na u sha ikev yam nyian; me hemba u, me gber u ityough; shi me gema akom a ikumior i Mbafiliti me na inyon i i purugh sha kua inyamtoho nyian, sha er tar cii u̱ fa er Aôndo A lu ken Iserael yô;

⁴⁷ikpelaior ne cii ia fa er TER A yem sha sanker kua iwange ga yô; gadia ityav ka mbi TER, nahan Una na ne sha ikev yase.

⁴⁸Tsô Orfiliti la ngur kporom van er una va kohol Davidi yô, Davidi sa kwan inya gba zan hen ijiir i nôngon ityav sha u una za kohol Orfiliti la.

⁴⁹Tsô Davidi za uwegh shin ikpa dugh iwen shin mi, vishigh, ta Orfiliti sha icul; iwen la nyôr tema un ken icul je; a gba, a cir ishigh inya.

⁵⁰Kape Davidi hemba Orfiliti la, sha mzu kua iwen ne; a hemba Orfiliti la, a wua un; kpa sanker lu sha uwegh ku Davidi ga.

⁵¹Tsô Davidi coon ayem za tile hen Orfiliti la, za uwegh tsuwa sanker na la ken var, wua un, gber un ityough a mi. Er Mbafiliti nenge nomor ve kpe nahan yô, ve yevese.

⁵²Tsô ior mba Iserael kua mba Yuda ve mough ve ger akenge, ve cir Mbafiliti ijime zan zan ve za ar hen Gati la, man hen ihinda i Ekeron. Mbafiliti mba i vihi ve ayol yô, ve gba sha gbenda u zan sha Sharaim zan zan za ar hen Gati kua Ekeron kpaa.

⁵³Tsô Mbaiserael de u zendan Mbafiliti ityô, ve hide ve gba yan ishar hen afo ve.

⁵⁴Nahan Davidi tôô ityough ki Orfiliti la va a mi ken Yerusalem; kpa ikav mbi utyav nav yô, a ver ken tenti na.

⁵⁵Zum u Saulu nenge Davidi due sha u za nôngon a Orfiliti la yô, a pine kurutya na Abiner, er: Abiner, wanye ne ka wan u ana? Abiner kaa er: Mimi je, tor, er u lu uma ne m fa ga.

⁵⁶Nahan tor kaa er: Yô, pine, fa or u wanye shon a lu wan u nan yô.

⁵⁷Tsô er Davidi za wua Orfiliti la hide yô, Abiner kua a na, va a na sha ishigh ki Saulu a ityough ki Orfiliti la sha uwe.

⁵⁸Saulu pine un er: We wanyekwaor ne, u ngu wan u ana? Davidi gema kaa er: Mo m ngu wan u wanye wou Yese, or u Betelehem.