Read tiv 1 Samuel 26 Bible Online

1 Samuel 26 - tiv bible

1 Samuel 26

¹Tsô Mbashiv va hen Saulu hen Gibea, ve va kaa er: Ka sha igungu u Hakila, u a lu ikôngough vegher u sha ityoughkitaregh la man Davidi a yer her ye gaa?

²Nahan Saulu mough sen hen desereti u Shiv a ior mba Iserael dubu utar a na imôngo, lu icuwanmbaiorov cii, sha u za keren Davidi ken desereti u Shiv.

³Saulu haa afo sha igungu u Hakila u a hii ikôngough vegher u sha ityoughkitaregh sha gbenda la. Kpa Davidi tema ken desereti, a nenge Saulu lu tôvon un angahar ken desereti.

⁴Davidi tindi mbamkerev, nahan a fa er Saulu a ve mimi yô.

⁵Tsô Davidi mough, va henpe Saulu a haa afo la; Davidi nenge ijiir i Saulu a yav yô, kua Abiner wan u Ner, kurutya na kpaa; Saulu yav hen atô u afo a akekeautya, ior gema haa wa un atô.

⁶Tsô Davidi gema kaa a Ahimeleki Orhiti kua Abishai wan u Seruya, anngô u Yoabi, er: Ka an nana za vea mo hen Saulu hen afoo? Tsô Abishai kaa er: Mo me za a we imôngo.

⁷Nahan Davidi vea Abishai ve za va hen ior mbala tugh yô, Saulu yav gba mnyam ken atô u afo a akekeautya la, i tume iwange na hen inya vegher u sha ityough nagh; Abiner kua ior, ve yav ve wa un atô.

⁸Tsô Abishai kaa a Davidi er: Aôndo na u orihom wou sha ikev nyian ve; yô, hegen shi de m̱ tume un iwange kwa môm, i̱ kar i̱ kôr shin inya, me tume un kwa har je ga.

⁹Kpa Davidi kaa a Abishai er: De woo un ga; gadia ka an nana cihi nana za uwegh ku nan sha or u TER, u i shigh un mkurem, man nana lu a ishô?

¹⁰Davidi gema kaa er: Er TER A lu u uma ne, TER Una tsaha un, gayô, iyange i kuugh na ia va, shin una za kpe ken utya.

¹¹TER A̱ yangem, m̱ de ze uwegh agh sha or u TER, u i shigh un mkurem la ga; kpa tôô iwange i i lu un vegher u sha ityou la kua isheghmnger, sé yem.

¹²Nahan Davidi tôô iwange man isheghmnger, vegher u sha ityough ki Saulu, tsô ve yem; ma or nenge ga, ma or fa ga, ma or kpaa nder ga; ve cii ve lu yaven, gadia TER haa ve mnyam, ve yav mem mem.

¹³Nahan Davidi kar yem yande la, za tile sha ityough ki uwoogh ca je; haregh na a ve gba ica dedoo;

¹⁴tsô Davidi yila ior mbala kua Abiner wan u Ner, a kaa er: U vengese ga, Abiner? Tsô Abiner vengese, gema pine er: Ka we an, u yer toroo?

¹⁵Davidi gema kaa a Abiner er: U ngu nomsoor gaa? Ka an nan kom sha a we ken Iseraele? Man inja na nan u kor teru tor ga? Gadia orgen va nyôr sha u wuan tor, teru la.

¹⁶Kwagh u u er ne doo ga. Er TER A lu u uma ne, ne kuma ku, sha er ne kor ter wen, or u TER, u i shigh un mkurem la, ga yô. Yô, nenge, henpe iwange i tor i lu kua isheghmnger i i lu un vegher u sha ityou la.

¹⁷Tsô Saulu kav imo i Davidi, nahan a kaa er: Ka imo you la wan wam Davidi? Davidi kaa er: Ka imo yam je ne, terem tor.

¹⁸Shi a kaa er: Ka nyi terem a zende wanye na ityô? Ka nyi m ere? Man ka nyi ibo m lu a mini?

¹⁹Yô, terem, tor, shi a̱ ungwa kwaghôron u wanye na. Aluer a lu TER je, man A tor u ityô sha er ú kôrom ihom yô, i̱ na Un nagh; kpa aluer a lu ior tsô yô, ifan i̱ kôr ve sha ishigh ki TER; gadia ve zendam nyian sha u m̱ de kera varen a dyako u TER ga, mba kaan er: Yem, za civir mbaaôndo mbagenev.

²⁰Yô de kera deen awambe am a̱ haa inya ca a ishigh ki TER ga, gadia tor u Iserael due sha u keren paregh môm er or u yaren ikôr i takange sha iwo yô.

²¹Tsô Saulu kaa er: M er kwaghbo; hide wan wam Davidi, gadia me kera er u kwagh u vihin mayange ga, sha er uma wam a lu u a inja yum nyian nahan; nenge m bume, m nzughul kwagh kpishi je.

²²Nahan Davidi gema kaa er: Nenge, iwange i tor ngin! Tindi wanye, nana̱ va ngohol i.

²³TER Una na hanma or sha perapera u nan man sha mimi u nan; TER na u sha uwegh agh nyian, kpa m rumun m za uwegh agh sha or u TER, u i shigh un mkurem ga.

²⁴Nenge, er uma wou a lum kwagh u injaa yum nyian yô, kape uma wam kpaa ma a lu TER kwagh u injaa ma A yemem ken atsan am cii.

²⁵Tsô Saulu kaa a Davidi er: I̱ saan we iyol wan wam Davidi! Hanma kwagh u u er cii una hemba u ga, ú kure un doo doo. Tsô Davidi yem a nagh, Saulu kpaa hide hen ijiir na.