Read tiv 1 Samuel 28 Bible Online

1 Samuel 28 - tiv bible

1 Samuel 28

¹Tsô sha ayange la yô, Mbafiliti kohol akumautya ve sha u za nôngo ityav a Iserael. Nahan Akishi kaa a Davidi er: Faan wer, zan you a mo imôngo ken utya, we a ior ou.

²Davidi gema kaa a Akishi er: Nahan wea nenge kwagh u wanakiriki wou una er yô. A kishi kaa a Davidi er: Ka sha mi, me ver u ú hingir or u kuran mo gbem.

³Samuel vande kpen kera ve, Iserael cii vaa ku na, man i ii un ken Rama ken gar na iyol na. Yô, Saulu vande zendan mba ve er kwagh a ujijingi mba mbakpenev man mbatsenganpasen akaa ken tar la kera.

⁴Tsô Mbafiliti kohol imôngo; ve va, ve va haa afo ken Shunem; Saulu kpaa kohol Mbaiserael cii, ve haa afo sha Gilboa.

⁵Zum u Saulu nenge a akumautya a Mbafiliti nahan, cier un iyol kpishi, ishima ta un kwe kpishi.

⁶Er Saulu pine TER yô, TER bugh un zwa ga, shin sha mnyam ma cien, shin sha Urim, shin sha uprofeti kpaa ga.

⁷Tsô Saulu kaa a mbayev nav er: Kerem nen kwase u a er kwagh a ujijingi mba mbakpenev yô, m̱ za her a nan, m̱ za pine nan kwagh. Mbayev nav kaa a na er: Nenge, kwase u a er kwagh a ujijingi mba mbakpenev yô, ngu ken Endor.

⁸Nahan Saulu gema iyol, haa akondo agen, za, un a ior mbagenev uhar a na imôngo, ve va nyôr hen kwase la tugh; a kaa a na er: Shi tsengaôron mo kwagh sha jijingi u orkpen, vam a un u me ter u la.

⁹Tsô kwase la kaa a na er: Nenge, u fa kwagh u Saulu a er, er a tim mba ve er kwagh a ujijingi mba mbakpenev, kua mbatsenganpasen akaa ken tar ne, kera yô, man ka nyi u lu hônon uma wam, sha u zan a mo ken kuu?

¹⁰Tsô Saulu bum TER a na, a kaa er: Er TER A lu u uma ne, ma mtsaha una tser u sha kwagh ne ga.

¹¹Tsô kwase la pine un er: Ka an, m kôndo u a nana? A kaa er: Kôndom a Samuel.

¹²Zum u kwase la nenge a Samuel yô, a gbidye vaa genger genger; kwase la gema ôr kwagh a Saulu er: Ka nyi u tsughumu? Gadia ka we Saulu je ne.

¹³Tsô a kaa a na er: De cie ga; ka nyi u nenge a mini? Kwase la kaa a Saulu er: M nenge a or u Aôndo ngun kôndon duen sha tar ne.

¹⁴A pine un er: Mlu na ngu nana? A kaa er: Ka or u been iyol, ngu kôndon, a haa togo iyol. Tsô Saulu kav er i lu Samuel yô, a gure a kuma ishigh inya je, a ta inya.

¹⁵Tsô Samuel kaa a Saulu er: Ka nyi u zem iyol, u kende a mo? Saulu gema kaa a na er: Kwagh tserem tsung, gadia Mbafiliti mba nôngon ityav a mo, man Aôndo kpaa A undum, mayange A kera bughum zwa ga, shin sha uprofeti, shin sha mnyam ma cien kpaa ga, ka nahan man m yer u mer, va pasem m fa kwagh u me er ye.

¹⁶Samuel gema kaa er: Ka nyi u pinim, er TER A undu u man A hingir orihom wouwe?

¹⁷Yô, TER er kwagh ne er lu kaa sha zwa wam yô; TER ande u tartor sha ikev you kera, gema na orgen, ka Davidi je la.

¹⁸Ka sha ci u, u we kwaghôron u TER iko ga, u er sha ishima Na i vihin tsung a Mbaamaleki mbala ga yô, kape i lu man TER A er u kwagh ne nyian nahan ne.

¹⁹Man shi TER Una na Iserael sha ikev i Mbafiliti a we imôngo kpaa; kper yô, we kua ônov ou né va kohol mo; akumautya a Iserael kpaa, TER Una na a sha ikev i Mbafiliti.

²⁰Nahan Saulu segha gbidye inya samber inya, cier un iyol kpishi sha akaaôron a Samuel la; kera lu a agee iyol ga, gadia shi didi tsa kaka ya kwagh ga.

²¹Nahan kwase la va hen Saulu va kav er kwagh nzughul un yum yô, a kaa a na er: Nenge, kpan wou u kwase ungwa kwaghôron wou, m wa uma wam iko ga, m ver ato sha kwaghôron u u erem yô.

²²Hegen yô, shi ver ato sha imo i kpan wou u kwase, de, m̱ na u ankwaghyan kpeghee, ya, sha er ú lu a agee zum u ú kôr gbenda ave yô.

²³Kpa a venda, a kaa er: Me ya kwagh ga. Kpa mbayev nav kua kwase la, ve zamber a na tsung; nahan a ungwa imo ve, a mough hen inya, a tema sha gambe.

²⁴Kwase la lu a icighangumbua hen ya na, nahan a sôngo un fefa, shi a tôô mwem a hôr, a kaa bredi u i we kwa sha mi ga, a mi;

²⁵tsô a va a mi, a va ver Saulu sha ishi, a mbayev nav; ve ya. Tsô ve mough tugh mbula je, ve yem.