Read tiv 1 Samuel 3 Bible Online

1 Samuel 3 - tiv bible

1 Samuel 3

¹Samuel wanakiriki la lu eren TER tom sha ishigh ki Eli. Kwaghôron u TER za ihen hen ayange la; mpase u nengen a min sha ashe kpaa ban.

²Tsô sha ayange la, er Eli za yav yô (ashe a na kpaa hii u wan ime, kera fan ityô u nengen dedoo ga),

³imenger i Aôndo lu a pir ga, Samuel yav hungul mnyam ken tempel u TER, u areki u Aôndo lu ker la.

⁴Nahan TER yila Samuel; un kpaa a vengese er: Mo ne.

⁵Tsô a va ayem hen Eli, a kaa er: M va ve, gadia u yilam. Eli kaa er: M yila u ga, hide za yav. Nahan a hide a shi a za yav.

⁶Tsô TER shi yila Samuel. Nahan Samuel mough za hen Eli, za kaa er: M va ve, gadia u yilam. Eli gema kaa a na er: M yila u ga wan wam, shi hide za yav.

⁷Samuel lu a vande fan TER ga, man shi i lu a pase un kwaghôron u TER kpaa ga.

⁸Tsô TER shi yila Samuel kuma acin atar je. Nahan a mough a za hen Eli, a kaa er: M va ve, gadia u yilam. Tsô Eli kav er i lu TER A yer wanakiriki la yô.

⁹Nahan Eli kaa a Samuel er: Hide, za yav; aluer Una yila u yô, kaa wer: TERE, gba ôron kwagh tsô, gadia wanakiriki Wou ngu ungwan.

¹⁰Tsô TER va va tile, yila er ashighe agen nahan, er: Samuel! Samuel! Nahan Samuel kaa er: Gba ôron tsô, gadia wanakiriki wou ngu ungwan.

¹¹Tsô TER kaa a Samuel er: Nenge, eren Yam kwagh ken Iserael u hanma or nana ungwa un yô, á hingir nan ken ato gbong.

¹²Sha ayange la, Me kure kwagh a Eli u M er sha kwagh u ya na la cii, á hii sha mhii je zan zan mkur.

¹³Gadia M kaa un Mer, Me ôr ya na ijir gbem sha ci u kwaghbo u a fe la; gadia ônov nav ve va a ifan sha ayol a ve, kpa a yange ve ga.

¹⁴Nahan yô, M bum a ya u Eli, ibo i ya u Eli á kera ese i sha nagh ku sôngon shin nagh ku sha samuyia kpaa mayange ga.

¹⁵Tsô Samuel yav zan zan sev av; nahan a bugh ihinda i iyou i TER. Samuel cia u ôron Eli mpase la.

¹⁶Tsô Eli yila Samuel, kaa er: Wan wam Samuel. A kaa er: Mo ne.

¹⁷A pine er: Ka nyi kwagh TER A er a wee? De yeren mo un ze; Aôndo A̱ er a we nahan, i̱ hemba nahan kpaa, aluer wea yerem ma kwagh ken akaa a A kaa u cii yô.

¹⁸Tsô Samuel ôr un akaa cii yer un ma kwagh ga. Nahan a kaa er: Un ka TER, A̱ er kwagh u a doo Un yô.

¹⁹Tsô Samuel vese, TER lu a na, A rumun er ma kwaghôron Na môm a̱ gba inya mayange ga.

²⁰Iserael cii, hii hen Dan zan zan ar hen Bersheba, ve fa er Samuel a lu profeti u TER mimi yô.

²¹TER kpaa shi ande ken Shilo; gadia ka ken Shilo je TER pase iyol Na hen Samuel sha kwaghôron u TER ye.