Read tiv 1 Samuel 5 Bible Online

1 Samuel 5 - tiv bible

1 Samuel 5

¹Tsô Mbafiliti ngohol areki u Aôndo hen Ebeneser, ve yem a mi hen Ashedodi.

²Nahan Mbafiliti tôô areki u Aôndo nyôr a mi ken iyou i Dagon, ve za ver ikua ikua a Dagon.

³Kper nan, Mbaashedodi mba nderen, mba ze her pepe yô, ve kav, Dagon gba, cir ishigh inya sha ishigh ki areki u TER. Tsô ve tôô Dagon ve hide a mi ve ver hen ijiir na.

⁴Kper gen shi mba ze her pepe yô, ve kav Dagon gba cir ishigh inya sha ishigh ki areki u TER; ityough ki Dagon kua akevaveegh na cii tôndo haa inya hen kpandehunda u shin; Dagon mase shin gundu tseegh.

⁵Ka nahan man upristi mba Dagon kua mba ve ve hen iyou i Dagon cii ve kera ndyaren kpandehunda u shin u Dagon ken Ashedodi mayange ga zan zan nyian ye.

⁶Kpa uwegh ku TER yuhwa sha ior mba Ashedodi, A cie ve, shi A tsaha ve sha iyolmuran, ka Ashedodi kua iningirtar na.

⁷Tsô er Mbaashedodi nenge nahan yô, ve kaa er: Areki u Aôndo u Iserael a̱ de kera luun a vese ga, gadia uwegh Nagh yuhwa sha a vese kua sha aôndo wase Dagon kpaa.

⁸Tsô ve kohol utor mba Mbafiliti cii her a ve, ve pine er: Sé er a areki u Aôndo u Iserael ne nana? Ve gema ve kaa er: Yô, i̱ tôô areki u Aôndo u Iserael ne i̱ yem a mi ken Gati. Tsô ve tôô areki u Aôndo u Iserael ve yem a mi ker.

⁹Er ve va a mi keela yô, uwegh ku TER num gar la hingir nzughul nzughul cii; A tsaha ior mba hen gar la, mbakiriki kua mbavesen, imor due ve iyol.

¹⁰Nahan ve tindi areki u Aôndo hen Ekeron. Tsô er areki u Aôndo ar hen Ekeron yô, ior mba Ekeron genger imo, ve kaa er: Ve va a areki u Aôndo u Iserael ne hen vese, sha u va wuan se kua ior asev kpaa.

¹¹Tsô ve kohol utor mba Mbafiliti cii, ve kaa er: tindi nen areki u Aôndo u Iserael ne a̱ hide hen ijiir na, a̱ de kera woo se a ior asev nahan ga. Gadia gar cii nzughul sha mcie je ar ken ku; uwegh ku Aôndo yuhwa kpishi heregh.

¹²Ior mba ve kpe ga yô, imor due ve iyol; mliam ma gar la kôndo je ar Sha.