Read tiv 1 Samuel 7 Bible Online

1 Samuel 7 - tiv bible

1 Samuel 7

¹Tsô ior mba Kiriati-yearim va, va tôô areki u TER, ve nyôr a mi ken ya u Abinadabi sha igungu, ve tsegha wan na Eliasar, ve ver un er a̱ kuran areki u TER.

²Er areki va lu ken Kiriati-yearim la yô, shighe kar kpishi, kuma anyom ikundu je; nahan ya u Iserael cii gba vaan keren TER.

³Tsô Samuel ôr kwagh a ya u Iserael cii, a kaa er: Aluer nea gema hen TER sha ishima môm yô, dugh nen mbaaôndo mbagenev kua Ashetaroti kpaa ker a ven kera, ver nen asema sha TER, civir nen Un tseegh, tsô Un kpaa Una yima ne sha ikev i Mbafiliti.

⁴Nahan Mbaiserael haa Ubaal kua Ashetaroti kera, ve civir TER tseegh.

⁵Samuel shi kaa er: Kohol Iserael cii hen Misepa; yô, me va sôn TER sha ci wen.

⁶Tsô ve kohol hen Misepa, ve kese mngerem ve too sha ishigh ki TER, shi ve hôr kwaghyan sha iyange la, hen ijiir la je, ve kaa er: Se er TER isholibo. Samuel ôron Mbaiserael ijir hen Misepa.

⁷Mbafiliti mba ongo er Mbaiserael kohol hen Misepa yô, utor mba Mbafiliti va num sha Iserael. Er Mbaiserael ungwa nahan yô, ve gba cian Mbafiliti.

⁸Tsô Mbaiserael kaa a Samuel er: De kera deen u sônon Aôndo sha ci wase ga, sha u A̱ yima se sha ikev i Mbafiliti.

⁹Nahan Samuel kôr waniyôngo u man atumba, na TER nagh ku nanden ku jimin a mi; Samuel sôn TER sha ci u Iserael, TER ungwa imo na.

¹⁰Er Samuel lu nan nagh ku nanden ave la je, Mbafiliti kporom er vea nôngo ityav a Iserael; kpaa TER dura taver taver sha Mbafiliti sha iyange la, nzughul a ve; tsô Iserael hemba ve ityav.

¹¹Nahan ior mba Iserael due hen Misepa gba zendan Mbafiliti ityô wuan ve zan zan ve za ar shin kpe u Bete-kar.

¹²Tsô Samuel tôô iwen ver hen harga u Misepa vea Shen, a ii i iti er Ebeneser, a kaa er: TER wase se zan zan hen shighe ne je.

¹³Kape i hemba Mbafiliti la, mayange ve kera va ken iningirtar i Iserael ga; uwegh ku TER lu ihom a Mbafiliti sha ayange a Samuel cii.

¹⁴Man agar a Mbafiliti lu ngohol sha ikev i Iserael kpaa hide hingir sha ikev i Iserael, hii hen Ekeron zan zan ar hen Gati. Iserael ngohol iningirtar i a kpaa sha ikev i Mbafiliti. Bem gba hen Iserael a Mbaamor kpaa.

¹⁵Samuel lu orjir hen Iserael sha ayange a a lu uma cii.

¹⁶Sha hanma inyom a ningir hen Betel man Gilgal kua Misepa; a lu ôron Iserael ijir sha ajiir la cii.

¹⁷Nahan a shi a hide hen Rama, gadia ka ker ya na lu ye; a lu ôron Iserael ijiir her; a ta TER atse a nanden nagh sha mi her kpaa.