Read tshiluba Genese 12 Bible Online

Genese 12 - tshiluba bible

Genese 12

¹Yehowa wakambila Abalama ne, Umuka mu musoko webe ne kudi bana benu ne ku nsubu wa tatuʼebe, ya biebe mu muaba undualua kukulesha.

²Nenkuvuishe tshisamba tshinene, nenkusankishe, nenvuishe dina diebe dinene, ne wewe neuvudishile bakuabo disanka.

³Nensankishe bantu badi bakuvudishila wewe disanka, nengele muntu mulau udi ukuela wewe mulau Bisamba bionso bia ha buloba nebisanke bua bualu buebe.

⁴Nunku Abalama wakaya bu muakamba Yehowa, ne Lota wakaya nʼandi Abalama wakadi ne bidimu makumi muanda mutekete ne bitanu hakumukeye mu Halana.

⁵Abalama wakangata mukashi wandi Salai, ne Lota, muana wa muanʼabo, ne bintu biabo bionso, ne bantu bonso bakahetabo mu Halana, bakaya mu nshila wa ku buloba bua Kanâna, bakafika mu buloba bua Kanâna

⁶Abalama wakalala mu buloba, wakalua ku Shekeme, kuakadi mutshi wa telebinta wa mu Mole Bena Kanana bakadi mu buloba tshikondo atshi.

⁷Yehowa wakamueneka kudi Abalama, wakamba ne, Nempe tunkanunuina biebe buloba ebu Abalama wakenzela Yehowa, wakamueneka kudiye, tshioshelu.

⁸Yeye wakumukaku, wakaya ku mukuna wakadi ku esete wa Betele, wakashimikaku ntenta wandi, Betele wakadi ku wesete ne Ai wakadi ku esete. Wakenzelaku Yehowa tshioshelu, Wakabikila dina dia Yehowa.

⁹Abalama wakatshidi uya ku Sude.

¹⁰Tshiole tshiakadi mu buloba abu, ne Abalama wakaya mu Ejipitu bua kushikamamu bualu bua tshiole tshiakadi tshikole mu buloba abu.

¹¹Hakambabo kubuela mu Ejipitu, Abalama wakambila mukashiʼandi Salai ne, Tangila ndi mumanye ne wewe udi mukashi muimpe kumona,

¹²ne hakumona Bena Ejipitu, bobo nebambe ne, Eu udi mukashi wandi! Bobo nebanshihe meme, nebakushiye wewe ne muoyo.

¹³Ndi nkutendekena ne, Wamba biebe ne, Meme ndi muanʼabo wa bakashi, bua meme mpete diakalengele bua bualu buebe, ne mutshima wanyi wikale ne muoyo bua bualu buebe

¹⁴Hashishe hakalua Abalama mu Ejipitu, Bena Ejipitu bakatangila ne mukashi wakadi mulengele be.

¹⁵Bakelenge bana ba Palo bakamumona, bakamuanyishila Palo, bakaya nʼandi mu nsubu wa Palo.

¹⁶Yeye wakenzela Abalama bimpe bua bualu buandi, wakamuha mikoko ne ngombe, ne balume ba nyama ya mpunda, ne bahika balume ne bahika bakashi, ne mashina a nyama ya mpunda ne tumelo.

¹⁷Yehowa wakakengesha Palo ne ba mu nsubu wandi ne bihuhu bikole bualu bua Salai, mukashi wa Abalama.

¹⁸Palô Wakabikila Abalama, wakamukonka ne, Bualu ebu buwakungenzela budi tshinyi? Kuakungambila ne, Eu udi mukashi wanyi bualu kai?

¹⁹Wakungambila ne, Yeye udi muanʼetu wa bakashi, bua meme kumuangata bu mukashi wanyi bualu kai? Ka, tangila mukashi webe, umuangate, uye biebe mu nshila webe

²⁰Palô wakadimusha bantu bandi bua bualu buandi, ne bakaya nʼandi ne mukashi wandi ne bintu biandi bionso mu nshila.