Read tshiluba Genese 15 Bible Online

Genese 15 - tshiluba bible

Genese 15

¹Hakashika malu a, dî dia Yehowa diakalua kudi Abalama mu tshilota ne, Abalama kutshinyi, meme ndi ngabu webe ne difutu diebe ditambe bunene.

²Abalama wakamba ne, Mukelenge Yehowa, wewe neumpe tshintu kai, bualu bua meme tshiena ne muana, ne muhianyi wa bintu bianyi udi Elieze, muena Damaseke?

³Abalama wakamba ne, Tangila, wewe kuena muanze kumpa muana, ne muntu muledibue mu nsubu wanyi, yeye udi muhianyi wa bintu bianyi.

⁴Monai, di dia Yehowa diakalua kudiye ne, Muntu eu kena wikala muhianyi wa bintu biebe nansha, kadi yeye uwalela nkayebe neikale muhianyi wa bintu biebe.

⁵Yehowa wakaluhuka nʼandi mu nsubu, wakamba ne, Tangila mutu bala mitoto, biwamanya mua kuyibala Yeye wakamuambila ne, Tunkanunuina biebe netuikale bungi nunku.

⁶Yeye wakitabusha Yehowa, ne Yehowa wakabala kuitabusha kuandi ne, Mbuakane buandi.

⁷Yeye wakamuambila ne, Meme ndi Yehowa wakakumusha mu Ula wa Bena Kasada, bua kukuha buloba ebu bua kubuhiana.

⁸Yeye wakamba ne, Mukelenge Yehowa, ndi mumanye ne, Nembuhiane munyi?

⁹Yeye wakamuambila ne, Wangate lukungulu lua ngombe lua bidimu bisatu, ne dishina dia mbushi dia bidimu bisatu, ne tshimpanga tshia mukoko tshia bidimu bisatu, ne nyunyu wa nkutshi ne mputu nyunyu

¹⁰Yeye wakangata bintu ebi bionso, wakabihanda nseke, wakateka luseke eku luseke eku, kadi yeye kakahanda nyunyu nseke.

¹¹Hakikila nyunyu ya bikololo ha bitalu ebi, Abalama wakayihata.

¹²Hakamba diba kubuela, tulu tukole tuakakuata Abalama monai, buowa bua midima buakamukuata.

¹³Yehowa wakambila Abalama ne, Umanye biebe bimpe ne, Tunkanu nuina biebe nebikale bendakanyi mu buloba budi kabuyi buabo, netukuatshile bena buloba mudimu, nebatukengeshe to bidimu nkama mai,

¹⁴meme nendumbuluishe tshisamba tshia bantu baditu tukuatshila mudimu, hashishe, netuhatuke ne biuma bia bungi.

¹⁵Kadi wewe neuye kudi bankambua bebe hola, neujikibue muntu mununu.

¹⁶Mu tshikondo tshinai tunkanunuina tuebe netulue kunoko kabidi, bualu bua bubi bua Bena Amole kabuena buanji kukumbana.

¹⁷Hashishe, hakabuela diba ne midima yakadiku, tshikutu tshiakadi ne muishi wa kahia ne tshimunyi tshia kalua kakole biakahita hankatshi ha nseke ya minyinyi.

¹⁸Mu dituku adi mene Yehowa wakahunga ne Abalama tshihungidi ne, Ndi mpa tunkanunuina biebe buloba abu ku musulu wa mu Ejipitu to ne ku musulu munene wa Pelata,

¹⁹buloba bua Bena Kene ne bua Bena Keneze ne bua Bena Kadamona

²⁰ne bua Bena Hiti ne bua Bena Pelese ne bua Bena Lefa,

²¹ne bua Bena Amole ne bua Bena Kanâna ne bua Bena Gîgashi ne bua Bena Yebuse.