Read tshiluba Genese 24 Bible Online

Genese 24 - tshiluba bible

Genese 24

¹Abalahama wakadi muntu mununu mukoke, ne Yehowa wakasankisha Abalahama mu malu andi onso.

²Abalahama wakambila muhika wandi mukulu, wakadi mulami wa bintu biandi bionso ne, Ndi nkutendekena ne, Uteke tshianza tshiebe muinshi mua tshibelu tshianyi,

³nenkutshihishe kudi Yehowa, Nzambi wa diulu ne wa buloba, ne wewe kuangatshidi muanʼanyi mulume mukashi wa bana bakashi ba Bena Kanâna babidi bashikame nʼabo,

⁴kadi uye biebe kuanyi, kudi bana betu, wangatshile muanʼanyi Isaka mukashi.

⁵Muhika wandi wakamukudimuna di ne, Abu biahidia mukashi kundonda ku buloba ebu, netuhingane ne muan ebe mulume ku buloba buwakumuka, anyi?

⁶Abalahama wakamuambila ne, Udimuke, kuyi ne muanʼanyi kabidi kuakua.

⁷Yehowa, Nzambi wa mulu, wakangumusha ku nsubu wa tatu wanyi ne ku buloba buakandelabo, wakabambila, wakandaya ne, Nempe tunkanunuina biebe buloba ebu yeye mene neatume muanjelo wandi ku mpala kuebe, ne wewe newangatshile muanʼanyi mukashi kuakua.

⁸Biahidia mukashi kukulonda, hashishe, munda muebe nemu ikale mutoke ku kuditshiha eku.

⁹Muhi ka wakateka tshianza tshiandi muinshi mua tshibelu tshia Abalahama, mukelenge wandi, wakaditshiha bua bualu ebu.

¹⁰Muhika wandi wakangata nyama ya tumelo dikumi mu tshisumbu tshia tumelo bia mukelenge wandi, wakaya ne biuma bia mukelenge wandi bia mishindu yonso mu tshianza tshiandi, wakabika, wakaya ku buloba bua Mesopotamia, ku musoko wa Naho.

¹¹Yeye Wakabikila tumelo binu hanshi ku butshika bua musoko hehi ne mushimi wa mai dilolo ha diba diyaya bakashi bua kusunabo mai.

¹²Yeye wakamba ne, Yehowa, Nzambi wa mukelenge wanyi Abalahama, ndi nkulomba ne, Ungendeshe dikasa dimpe lelu, ufuile mukelenge wanyi Abalahama luse.

¹³Tangila, hantshidi muimane hehi ne mushimi wa mai, ne bana bakashi ba bena musoko bakadi balua bua kusunabo mai,

¹⁴witabushe ne nsongakashi undi ngambila ne, Ndi nkutendekena ne, Utule mulondo webe wa mai, umpe mai a kunua, yeye angandamune di ne, Nua biebe, nennuishe tumelo biebe kabidi, nunku yeye mene ikale mukashi uwakasunguila muntu webe Isaka, nunku nemmanye ne wewe wakufuila mukelenge wanyi luse.

¹⁵Hashishe, hakadiye wakula, tangilai, Lebeka wakadi mulela kudi Betuele, muana mulume wa Mileka, mukashi wa Naho, muanʼabo ne Abalahama, wakaluhuka ne mulondo wa mai ha diaha diandi.

¹⁶Nsongakashi eu wakadi ne mpala muimpe be, wakatshidi kamama, kayi muanze kumanyibua kudi mulume, yeye wakahueka ku mushimi wa mai, wakasuna mulondo wandi tente, wakabanda kabidi.

¹⁷Muhika wakaya lubilu kudiye, wakamuakidila, wakamuambila ne, Ndi nkutendekena ne, Umpeku tuima tukese bia meme kunua.

¹⁸Yeye wakamba ne, Nue biebe, mukelenge wanyi, yeye wakatula mulondo wandi lubilu mu tshianza tshiandi, wakamunuisha.

¹⁹Hakashikisheye kumunuisha mai, yeye wakamba ne, Nensunyine tumelo biebe mai kabidi to ne hukutatu.

²⁰Yeye wakaya lubilu, wakahongoluela mai mu luvu lunene, wakaya lubilu ku mushimi kabidi, wakasunyina tumelo biandi tuonso mai.

²¹Mulume eu wakamutangila talalâ, wakadi welangana meji munda bua kumanyeye ne, Yehowa wakungendesha dikasa bimpe, anyi?

²²Hakashikisha tumelo kunua mai, mulume eu wakahatula kakanu ka or ka bujitu bua tshituha tshia nshekele, ne nkanu ibidi ya ku maboko ya bujitu bua nshekele dikumi kabidi.

²³Wakamukonka ne, Wewe udi muana wa nganyi? Ndi nkusengelela ne, Ungambile Udi ne muaba mu nsubu wa tatu webe bua tuetu kulalamu, anyi?

²⁴Yeye wakamukudimuna di ne, Ndi muana wa Betuele, muana mulume wa Mileka, wakaleleleye Naho.

²⁵Wakamuambila kabidi ne, Tudi ne mashinde ne manvua a bungi, ne miaba ya kulala.

²⁶Mulume eu wakinyika mutu wandi, wakatendelela Yehowa.

²⁷Yeye wakamba ne, Yehowa, Nzambi wa mukelenge wanyi Abalahama, atumbishibue, yeye kakumushila mukelenge wanyi luse luandi ne bulelela buandi, hanakadi mu nshila Yehowa wakandombola ku nsubu wa bana babo ne mukelenge wanyi.

²⁸Nsongakashi wakaya lubilu, wakambila ba mu nsubu wa mamu andi malu au.

²⁹Lebeka wakadi ne muanʼabo wa balume dina diandi Labana, Labana wakaya lubilu kudi mulume wakadi ku mushimi wa mai.

³⁰Hakatangileye kakanu ka ku diulu ne nkanu ya ku maboko a muanʼabo mukashi, ne hakunvueye mei a Lebeka muanʼabo mukashi ne, Mulume au wakungambila nunku, yeye wakaya kudi mulume wakadi muimane ne tumelo hehi ne mushimi wa mai.

³¹Yeye wakamba ne, Ubuele, wewe udi musankishibue kudi Yehowa, udi muimane ha bule bualu kai? Bualu bua nakumana kukulongoluela nsubu ne muaba wa tumelo tuebe.

³²Mulume wakabuela mu nsubu, wakumusha biseba ha nyima ha tumelo, wakalua ne mashinde ne manvua bia tumelo, ne mai a kuvuwa nʼau makasa andi ne makasa a bantu bakadi nʼandi.

³³Bakateka bintu bia kudia ku mpala kuandi, kadi yeye wakamba ne, Tshiena ndia diambedi tshiyi muanze kunuambila bualu bunakuluila Labana wakamuambila ne, Ambaku.

³⁴Yeye wakamba ne, Ndi bianyi muhika wa Abalahama.

³⁵Yehowa wakatamba kusankisha mukelenge wanyi, yeye wakulua muntu munene, wakumuka bisumbu bia mikoko ne bia ngombe, ne argent ne or, ne bahika balume ne bahika bakashi, ne tumelo ne nyama ya mpunda.

³⁶Sala, mukashi wa mukelenge wanyi, wakamulelela muana mulume hakadiye muntu mununu, yeye wakadia muana eu bintu bionso bidiye nʼabi.

³⁷Mukelenge wanyi wakuntshihisha ne, Kuangatshidi muanʼanyi mulume mukashi wa bana bakashi ba Bena Kanâna badi mu buloba bundi mushikame,

³⁸kadi uye biebe ku nsubu wa tatuʼanyi ne kudi bana betu, wangatshileku muanʼanyi mulume mukashi

³⁹bakambila mukelenge wanyi ne, Ahu, biahidia mukashi kundonda.

⁴⁰Yeye wakungambila ne, Yehowa, undi ngendakana ku mpala kuandi, neatume muanjelo wandi nʼebe, neakuendeshe dikasa dimpe, ne wewe newangatshile muanʼanyi mulume mukashi kudi bana betu ne kudi ba mu nsubu wa tatu wanyi

⁴¹Hashishe, munda muebe nemuikale mutoke ku kuditshiha eku, hawaya kudi bana betu, biahidiabo kukuha mukashi, munda muebe nemuikale mutoke ku kuditshiha eku.

⁴²Hanakufika lelu ku mushimi wa mai, nakuamba ne, Yehowa, Nzambi wa mukelenge wanyi Abalahama, biwasua kungendesha dikasa dimpe mu nshila unaya,

⁴³tangila, hantshidi muimane hehi ne mushimi wa mai, witabushe ne nsongakashi ulualua bua kusuneye mai undi ngambila ne, Ndi nkusengelela ne Umpeku tuima tua kunua mu mulondo webe,

⁴⁴yeye neangandamune dî ne, Nua biebe, nennuishe tumelo biebe kabidi, ka yeye mene ikale mukashi wakasunguila Yehowa muana mulume wa mukelenge wanyi.

⁴⁵Diambedi tshiyi muanze kushikisha kuamba mei au mu mutshima wanyi, Lebeka wakaluhuka ne mulondo wa mai ha diaha diandi, wakaya ku mushimi wa mai, wakasuna mai, meme nakamuambila ne, Umpeku mai a kunua.

⁴⁶Yeye wakatula mulondo wandi lubilu ha diaha diandi, wakamba ne, Nua biebe, nensunyine tumelo biebe mai kabidi, nunku nakunua ne yeye wakumusha tumelo mai kabidi.

⁴⁷Nakumuebesha ne, Wewe udi muana wa nganyi? Yeye wakungambila ne, Ndi muana wa Betuele, muana wa Naho, wakamulelela Mileka, nunku nakumuluatshisha kakanu ka ku diulu diandi ne nkanu ya ku maboko.

⁴⁸Nakuinyika mutu wanyi, nakutendelela Yehowa, nakutumbisha Yehowa, Nzambi wa mukelenge wanyi Abalahama, wakandombola mua kuya mu nshila muakane bua kuangatshila muana mulume wa mukelenge wanyi mukashi kudi muana wa muanʼabo.

⁴⁹Katataka binuasua kulesha mukelenge wanyi luse ne bulelela, nungambile, ne binuahidia, nungambile kabidi: nunku meme ndi mua kuya ku tshianza tshia balume anyi ku tshianza tshia bakashi.

⁵⁰Labana ne Betuele bakamba ne, Bualu ebu buakufuma kudi Yehowa, tuetu katuena mua kukuambila dî dibi anyi dî dimpe.

⁵¹Tangila, Lebeka udi ku mpala kuebe, umuangate, uye nʼandi, yeye neikale mukashi wa muana mulume wa mukelenge webe bu muakamba Yehowa.

⁵²Hakunvua muhika wa Abalahama mei abo, yeye wakakukuila mpala wandi hanshi ku mpala kua Yehowa.

⁵³Muhika wa Abalahama wakahatula bilenga bia argent ne bia or ne bilulu, Wakabikila kudi Lebeka, yeye wakaha muanʼabo mulume ne mamu wandi kabidi bintu bia mushinga mukole.

⁵⁴Yeye ne balume bakadi nʼandi bakadia, bakanua, bakalala butuku abu, bakabika ne dinda, yeye wakabambila ne, Nuntume kudi mukelenge wanyi.

⁵⁵Muanʼabo mulume ne mamu wa Lebeka bakamba ne, Nsongakashi anji kushala matuku makese, nansha dikumi, hashishe yeye neaye.

⁵⁶Yeye wakabambila ne, Kanumpumbishi, bualu bua Yehowa wakungendesha dikasa dimpe, nuntume kudi mukelenge wanyi.

⁵⁷Bobo bakamba ne, Netubikile nsongakashi, netumuebeshe yeye.

⁵⁸Bakabikila Lebeka, bakamuebesha ne, Udi musue kuya ne muntu eu, anyi? Yeye wakabakudimuna ne, Nyaya

⁵⁹Nunku bakatuma muanʼabo Lebeka ne muena mudimu wandi wa bakashi ne muhika wa Abalahama ne bantu bandi.

⁶⁰Bakavudishila Lebeka disanka, bakamuambila ne, Wewe muanʼetu mukashi, wikale nkambua mukashi wa binunu bia mbombo ya bantu, ne tunkanunuina tuebe tuhiane buloba bua bantu badi nʼatu lukuna.

⁶¹Lebeka wakabika ne bena mudimu bandi ba bakashi, bakabanda ha nyima ha tumelo, bakalonda muntu wa Abalahama, yeye wakangata Lebeka, wakaya mu nshila wandi.

⁶²Isaka wakalua mu nshila wa ku Bê-laha-loi, bualu bua yeye wakadi ushikama ku buloba bua ku Sude.

⁶³Isaka wakaya mu budimi dilolo bua kutendelela, wakabandisha mesu andi, ne monai, tumelo tuakadi tulua.

⁶⁴Lebeka wakabandisha mesu andi kabidi ne hakatangileye Isaka, yeye wakatuluka ha nyima ha kamelo.

⁶⁵Yeye wakakonka muhika ne, Eu mulume kai udi wendakana mu budimi bua kusambakana nʼetu? Muhika wakamukudimuna dî ne, Nyeye mukelenge wanyi Lebeka wakangata tshilulu tshikudika, wakatshiteka ku mishiku yandi.

⁶⁶Muhika wakambila Isaka malu onso akenzeye.

⁶⁷Isaka wakalua nʼandi mu ntenta wa mamu wandi, Sala, yeye wakangata Lebeka, wakalua mukashi wandi Isaka wakamunanga, ne mutshima wandi wakasambibua bua lufu lua mamu wandi.