Read tshiluba Genese 25 Bible Online

Genese 25 - tshiluba bible

Genese 25

¹Abalahama wakabaka mukashi mukuabo dina diandi Ketula.

²Yeye wakamulelela Zimelana ne Yokeshana ne Medana ne Midiyana ne Yishebaka ne Shua.

³Yokeshana wakalela Sheba ne Dedana, bana balume ba Dedana bakadi Ashulima ne Letushima ne Leumima.

⁴Bana ba Midiyana bakadi Eha ne Ehê ne Hanoka ne Abida ne Eleda Bana aba bonso bakadi bana ba Ketula.

⁵Abalahama wakafua bintu bionso biakadiye nʼabi kudi Isaka.

⁶Abalahama wakaha bana ba bakashi bandi bakuabo matabisha, wakabumusha kudi Isaka hakadiye ne muoyo, wakabatuma ku luseke lua ku esete.

⁷Â adi matuku a bidimu bia Abalahama, biakadi lukama ne makumi muanda mutekete ne bitanu.

⁸Abalahama wakahuola muoyo wandi, wakafua mununu, bidimu biandi biakakumbana bia bungi, ne yeye wakadisangisha ne bankambua bandi.

⁹Bana bandi balume, Isaka ne Yishemaele, bakamujika mu lubuebue lua Makepela mu budimi bua Efelona, muana wa Soha, Muena Hiti, ku mpala kua Mamale,

¹⁰budimi buakasumba Abalahama kudi bana ba Hete, bakajikamu Abalahama ne Sala, mukashi wandi.

¹¹Ku nyima kua lufu lua Abalahama Nzambi wakasankisha Isaka muanʼandi, ne Isaka wakashikama mu Be-laha-loi.

¹²Ei idi ndelanganyi ya bana ba Yishemaele, muana wa Abalahama wakamulelela Haga, Muena Ejipitu, muena mudimu wa bakashi wa Sala:

¹³au mmena a bana ba Yishemaele ku bikondo biabo muaba bute wa Yishemaele Nebayota, ne Kedâ ne Adebele ne Mibesama,

¹⁴Mishema ne Duma ne Masa,

¹⁵Hadada ne Tema ne Yetû ne Nafisha ne Kedema.

¹⁶Abambana balume ba Yishemaele ku mena abo ne misoko yabo ne ku meku abo, baminyampala dikumi ne babidi ku bisamba biabo.

¹⁷Ebi mbidimu bia muoyo wa Yishemaele, biakadi lukama ne makumi asatu ne muanda mutekete, yeye waka huola muoyo wandi, wakafua, wakadisangisha ne bankambua bandi.

¹⁸Bana bandi bakadi ne mukalu wabo ku Hawila to ne ku Shû, ku mpala kua Ejipitu mu nshila wa ku Ashû, bakashikama batangilangane ne bana babo bonso.

¹⁹Ei idi ndelanganyi ya Isaka, muana wa Abalahama, Abalahama wakalela Isaka,

²⁰hakadi Isaka ne bidimu makumi anai, yeye wakabaka Lebeka, muana mukashi wa Betuele, muena Alama wa ku Padana-alama, muanʼabo ne Labana.

²¹Isaka wakalombela mukashi wa ndi Yehowa, bualu bua yeye wakadi nkumba, Yehowa wakamunvuila ne Lebeka wakimita difu.

²²Bana bakadi baluangana munda muandi, yeye wakamba ne, Bikala bualu nunku, ndi mushale ne muoyo bua tshinyi? Yeye wakaya bua kuebesha Yehowa.

²³Yehowa wakamuambila ne, Bisamba bibidi bidi munda muebe, bisamba bibidi bia bantu nebiluhuke munda muebe tshisamba tshimue netshitambe tshisamba tshikuabo bukole, ne mukulu neakuatshile muakunyʼandi mudimu.

²⁴Hakakumbana matuku andi, monai, bana ba makasa bakadi munda muandi.

²⁵Wa kumudilu wakahatuka wakadi mukunze-kunzû, wakadi ne miosa ya bungi hamʼbidi handi, bakamuidika dina ne, Esau.

²⁶Ku nyima muakunyʼandi wakahatuka ne tshianza tshiandi tshikuata ku tshikankanyi tshia Esau Bakamuidika dina ne, Yakoba Isaka wakadi ne bidimu makumi asambombo hakamuleleleye bana.

²⁷Bana aba bakadiunda, Esau wakadi tshilembi tshidi ne budimu bua bungi, Yakoba wakadi biandi munda mukole, wakashikama mu ntenta.

²⁸Isaka wakasua Esau bualu bua yeye wakamudisha munyinyi wa ntole, Lebeka wakasua Yakoba.

²⁹Yakoba wakalamba bintu bia kudia, Esau wakahingana mu tshisuku, wakadi muhungila.

³⁰Esau wakambila Yakoba ne, Ndi nkutendekena ne, Undisheku bintu bikunze biudi mulambe bualu bua meme ndi muhungila. Bua bualu ebu bakamuidika dina ne, Edome.

³¹Yakoba wakamba ne, Anji kunsumbisha bintu bia buanʼa bute diambedi.

³²Esau wakamba ne, Abu akadi ha kufua, ne bintu bia buanʼa bute nebinsankishe kudi kunyi?

³³Yakoba wakamba ne, Anji kuditshiha kundi diambedi. Yeye wakaditshiha kudiye, wakahana bintu bia buanʼa bute kudi Yakoba.

³⁴Nunku Yakoba wakaha Esau bidia ne tshiteku, yeye wakadia, wakanua, wakabika, wakaya, nunku Esau wakahatula bintu bia buanʼa bute.