Read tshiluba Genese 30 Bible Online

Genese 30 - tshiluba bible

Genese 30

¹Hakatangila Lakele ne, Tshiena ndelela Yakoba bana, hashishe Lakele wakadi ne mukuluʼandi mukau, wakambila Yakoba ne, Umpe bana, anyi meme nenfue.

²Yakoba wakadi ne Lakele tshiji, wakakonka ne, Meme ndi bu Nzambi udi mujidike munda muebe ne, Kuledi, anyi?

³Yeye wakamuambila ne Mona, Bileha, muena mudimu wanyi wa bakashi udiku, uye kudiye bua yeye andelele bana ha binu bianyi, ne bua meme ngikale ne bana kudiye.

⁴Yeye wakamuha Bileha, muena mudimu wandi wa bakashi, bu mukashi wandi, ne Yakoba wakaya kudiye.

⁵Bileha wakimita difu, wakalelela Yakoba muana wa balume.

⁶Lakele wakamba ne, Nzambi wakundumbuluila, wakunvua dî dianyi kabidi, wakumpa muana wa balume; nunku yeye wakamuidika dina ne, Dana.

⁷Bileha, muena mudimu wa Lakele, wakimita difu kabidi, wakalelela Yakoba muana wa balume mukuabo.

⁸Lakele wakamba ne, Nakasangana bibula bikole ne mukulu wanyi wa bakashi, nakumutamba bukole, wakamuidika dina ne, Nafatale.

⁹Hakatangila Lea ne, Tshiena ndela bana kabidi, yeye wakangata Zilepa, muena mudimu wandi wa bakashi, wakamufila kudi Yakoba bu mukashi wandi.

¹⁰Zilepa, muena mudimu wa Lea, wakalelela Yakoba muana wa balume.

¹¹Lea wakamba ne, Dikasa dimpe! Nunku yeye wakamuidika dana ne, Gada.

¹²Zilepa, muena mudimu wa Lea, wakalelela Yakoba muana wa balume mukuabo

¹³Lea wakamba ne, Ndi ne disanka, ne bakashi nebambikile ne, Muena disanka Wakamuidika dina ne, Ashe.

¹⁴Mu tshidimu tshia kuhuola blê, Lubena wakaya mu budimi, wakangula tumuma, wakalua nʼatu kudi mamuʼandi Lea Lakele wakambila Lea ne, Ndi nkutendekena ne, Umpeku tumuma tukuabo tua muanʼebe.

¹⁵Yeye wakamukudimuna dî ne, Bualu budi bukese bua wakuangata bayanyi, anyi? Udi musue kuangata tumuma tua muanʼanyi kabidi, anyi? Lakele wakamba ne, Biwampa tumuma tua muanʼebe, Yakoba nealale nʼebe butuku ebu.

¹⁶Yakoba wakahi ngana ku budimi dilolo ne Lea wakaya kumualamina, wakamua mbila ne, Bûdi nʼabu mbua kulua kundi, bualu bua nakakusumba ku tumuma tua muan anyi. Yeye wakalala nʼandi butuku abu.

¹⁷Nzambi wakunvua kulomba kua Lea, yeye wakimita difu, wakalelela Yakoba muana wa balume muitanu.

¹⁸Lea wakamba ne, Nzambi wakumpa difutu dianyi bualu bua meme nakafila muena mudimu wanyi wa bakashi kudi bayanyi, wakamuidika dina ne, Yisakâ.

¹⁹Lea wakimita difu kabidi, wakalelela Yakoba muana muisambombo.

²⁰Lea wakamba ne, Nzambi wakumpa bintu bia bungi, katataka bayanyi neashale nʼanyi bualu bua meme nakamulelela bana ba balume basambombo, wakamuidika dina ne, Zebuluna.

²¹Ku nyima Lea wakalela muana wa bakashi wakamuidika dina ne, Dina.

²²Nzambi wakavuluka Lakele, Nzambi wakamunvuala, wakajilula munda muandi.

²³Yeye wakamita difu, wakalela muana wa balume, yeye wakamba ne, Nzambi wakungumushila bundu buanyi,

²⁴wakamuidika dina ne, Yosefe, wamba ne, Yehowa ampe muana mukuabo.

²⁵Hakalela Lakele Yosefe, Yakoba wakambila Labana ne, Untume ha bule, nye bianyi kuanyi, ku buloba buanyi.

²⁶Umpe bakashi banyi ne bana banyi, banakakukuatshila mudimu, undekele, nenye, bualu bua wewe udi mumanye mudimu unakukuenzela.

²⁷Labana wakamuambila ne Bingikala ne diakalengele ku mesu kuebe ushale biebe, bualu bua meme nakumana kujingulula ne, Yehowa wakunsankisha bua bualu buebe.

²⁸Yeye wakamba ne, Ungambila difutu diebe, nenkufutedi.

²⁹Yakoba wakamuambila ne, Wewe udi mumanye bu munakakukuatshila mudimu ne bu muakavulangana bimuna biebe binakadi nʼabi.

³⁰Bualu bua wakadi ne anu bintu bikese tshiyi muanze kulua kunoko mpindiu biakuvulangana tshisumbu tshinene, Yehowa wakukusankisha wewe bua malu onso anakukuenzela, ne katataka meme nengenze mudimu tshikondo kai bua kukumbasha bia ba mu nsubu wanyi kabidi?

³¹Yeye wakamukonka ne, Nenkuhe tshinyi? Yakoba wakamukudimuna ne, Kambualu bua kumpa tshintu nansha, biwitabusha bualu ebu, meme nendishe bimuna biebe, nembilame kabidi.

³²Nengendakane munkatshi mua bimuna biebe lelu, nengumushe bionso bidi ne matoba, ne mikoko yonso idi mifike, ne mbushi yonso idi ne matoba, bintu ebi nebikale difutu dianyi.

³³Mu matuku adi ku mpala, buimpe buanyi nebumbingishe hawalua bua kunkonka bua difutu dianyi didi kûdi, biwasangana mbushi udi kayi ne matoba, anyi mukoko udi kauyi mufike munkatshi mua bintu bianyi, nebikale bu tshintu tshiakuibabo.

³⁴Labana wakamba ne, Bualu ebu nebuikale bu mu di diebe.

³⁵Mu dituku adi Yakoba wakumusha mbushi ya bimpanga yakadi ne matoba, ne mashina a mbushi akadi ne matoba, ne mikoko yonso yakadi mifike, wakabika mu bianza bia bana bandi balume.

³⁶Wakabituma luendu lua matuku asatu hankatshi ha Labana ne Yakoba, Yakoba wakadisha bimuna bikuabo bia Labana biakashala ku nyima.

³⁷Yakoba wakangata mitshi mibishi ya peuplier ne ya amande ne ya platane, wakubula bihusu bibaka bitoke, wakamuenesha bibaka bitoke bia mitshi.

³⁸Yeye wakateka mitshi yakubuleye bibaka bitoke mu luvu lua mai biakadi bimuna binuinamu mai, biakadi bimita mafu hakanuabi.

³⁹Bimuna biakadi bimita mafu ku mpala kua mitshi ei biakalela bana bakadi ne matoba.

⁴⁰Yakoba wakumusha bana ba mikoko, wakateka mesu abo kudi bimuna bia Labana biakadi ne matoba ne biakadi bifike, wakateka bimuna biandi ha buabi, kakabiteka hamue ne bimuna bia Labana.

⁴¹Hakimita bimuna bikole mafu, Yakoba wakateka mitshi ei ku mpala kuabi mu mai, bua bimuna bimite mafu ku mpala kua mitshi,

⁴²kadi hakatshidi bimuna bitekete, yeye kakateka mitshi, nunku bimuna bitekete biakadi bia Labana ne bimuna bikole biakadi bia Yakoba.

⁴³Yeye wakatamba kulua mubanji wakadi ne bisumbu bia bimuna ne bena mudimu ba bakashi ne bena mudimu ba balume, ne tumelo ne tubalu.