Read tshiluba Genese 32 Bible Online

Genese 32 - tshiluba bible

Genese 32

¹Yakoba wakaya mu nshila wandi ne banjelo ba Nzambi bakasambakena nʼandi.

²Hakabamona Yakoba, yeye wakamba ne, Ebi mbisumbu bia banjelo ba Nzambi, Wakabikila muaba au ne, Mahanayima.

³Yakoba wakatuma miloho ku mpala kuandi kudi Esau mukuluʼandi mu buloba bua Seî, buloba bua Edome.

⁴Yeye wakayambila ne, Nuambile mukelenge wanyi Esau nunku ne, Muntu webe Yakoba udi wamba ne, Nakashikama ne Labana, nakushalaku to ne katataka.

⁵Ndi ne ngombe ne tubalu ne mikoko ne bahika ba balume ne bahika ba bakashi, nakutuma di kudi mukelenge wanyi binamanya mua kusangana luse ku mesu kuandi.

⁶Miloho yakahingana kudi Yakoba, yakamuambila ne, Tuakuya kudi mukuluʼebe Esau, ne yeye ulualua kusangakena nʼebe mu nshila, udi ne balume nkama mai ku nyima kuandi.

⁷Hashishe Yakoba wakatshina bikole, mutshima wandi wakazakala wakatahulula bintu biandi bisumbu bibidi, ne bantu ne mikoko ne bimuna ne tumelo.

⁸Wakamba ne, Bialua Esau ku tshisumbu tshimue bua kutshishiha, tshisumbu tshikuabo netshihanduke.

⁹Yakoba wakamba ne, Yehowa Nzambi wa kaku wanyi Abalahama, ne Nzambi wa tatuʼanyi Isaka, wewe wakungambila ne, Uhingane kuebe, ne kudi bana benu, nenkuenzele bimpe.

¹⁰Tshiena ne buimpe bua kudiangatshila tshituha tshia luse ne bulelela biwakalesha muntu webe, nakasabuka musulu eu wa Yadene anu ne tshibangu, katataka nakulua bisumbu bibidi bia bintu.

¹¹Ndi nkutendekena ne, Unsungile mu bianza bia mukuluʼanyi Esau, ndi mmutshina ne yeye nealue kunshiha ne bamamu ne bana.

¹²Wewe wakungambila ne, Bulelela, nenkue nzele bimpe, nenkukumbashile tunkanunuina tuebe bungi bua nsenga ya kukala kua mai manene, idibo kabayi mua kubala.

¹³Yeye wakalalahu butuku abu wakasungula bintu biakadiye nʼabi bua kuambika mukulu andi Esau matabisha

¹⁴mashina a mbushi nkama ibidi ne mpumbu ya mbushi makumi abidi, mashina a mikoko nkama ibidi ne mikoko ya bimpanga makumi abidi,

¹⁵ne tumelo tudibo bakama mabele makumi asatu ne bana batu, ne ngombe idibo bakama mabele makumi anai, ne balume ba ngombe dikumi mashina a mpunda makumi abidi ne nkungulu yai dikumi.

¹⁶Wa kabifila mu bianza bia bahika bandi, tshisumbu ha buatshi tshisumbu ha buatshi, wakabambila ne Sabukai ku mpala kuanyi, nushilangane muaba hankatshi ha tshisumbu ne tshisumbu.

¹⁷Wakela di diandi kudi muhika wandi wa ku mpala ne, Hawasambakena ne Esau, mukuluʼanyi, ne hakukonkeye ne, Wewe udi wa nganyi? Uyaya kudi kunyi? Bintu ebi bidi ku mpala kuebe mbia nganyi?

¹⁸Hashishe, wewe umuambile ne, Mbintu bia muntu webe Yakoba. Bidi matabisha akatumineye Esau mukelenge wandi, ne mona, yeye udi kabidi ku nyima kuetu.

¹⁹Yeye wakela di diandi nunku kudi muntu muibidi ne muisatu ne kudi bonso bakadi balonda ne bisumbu bia bintu ne, Nuambile Esau nunku hanuasangakena nʼandi.

²⁰Numuambile ne, Mona, muntu webe Yakoba udi kabidi ku nyima kuetu Bualu bua yeye wakabambila munda ne, Nemmutokeshe munda ne matabisha akaya ku mpala kuanyi, ne hatuatangilangana nʼandi ku mesu, bumue yeye neangitabushe.

²¹Nunku wakatuma matabisha ku mpala kuandi, yeye wakalala butuku abu munkatshi mua tshitudilu.

²²Butuku abu wakabika biandi wakangata bakashi bandi babidi ne bakashi babidi benji ba mudimu ne bana bandi dikumi ne umue, bakasabuka ku dilobo dia Yaboka.

²³Wakabangata, wakabasabula ne bintu biandi bionso.

²⁴Yakoba wakashala ku nyima nkayandi muntu wakaluangana nʼandi bibula to ne hakatshia butuku.

²⁵Hakamanya muntu ne, Tshiena mumuhite bukole wakalenga tshianza ha tshikundukundu tshiandi ne tshikundukundu tshia Yakoba tshiakakoyoboka hakadiye uluangana nʼandi bibula.

²⁶Yeye wakambila Yakoba ne, Undekele butuku bukadi ha kutshia. Yeye wakamba ne, Tshiena nkulekela biwikala kuyi munsankishe.

²⁷Yeye wakakonka Yakoba ne, Dina diebe nganyi? Yeye wakamuitaba ne Ndi Yakoba.

²⁸Yeye wakamuambila ne, Kababikidi dina diebe ne Yakoba kabidi bakubikile dina ne Isalele bualu bua wewe wakuluangana ne Nzambi ne bantu, wakahatula bukole.

²⁹Yakoba wakamukonka ne, Ungambile dina diebe Muntu wakamuebesha ne, Udi unkonkela dina dianyi tshinyi? Yeye wakamuvudishilaku disanka

³⁰Yakoba wakidika muaba au ne, Peniele bualu bua yeye wakamba ne, Nakumonangana ne Nzambi mpala ha mpala ne muoyo wanyi wakuhanduka.

³¹Hakalueye Penuele, diba diakabanda, ne Yakoba wakadi utebuka bualu bua tshikundukundu tshiandi.

³²Nunku Bena Isalele kabatu badia munyinyi wa ku tshikundukundu to ne katataka, bualu bua yeye wakalenga tshianza ha tshikundukundu tshia Yakoba.