Read tshiluba Genese 45 Bible Online

Genese 45 - tshiluba bible

Genese 45

¹Hashishe, Yosefe kakamanya mua kudikanda kudishikunka ku mesu kua bantu bakimana ha buihi nʼandi, wakamba ne, Numushe bantu bonso kundi Nansha muntu mukuabo wakashala nʼandi hakadimanyisha Yosefe kudi bana babo.

²Yeye wakadia bikole, Bena Ejipitu ne bantu ba mu nsubu wa Palô bakunvua muadi wandi.

³Yosefe wakambila bana babo ne, Ndi Yosefe mene; tatu wanyi utshidi ne muoyo, anyi? Bana babo kabakamanya mua kumuitaba, bakadi batshina ku mesu kuandi.

⁴Yosefe wakambila bana babo ne, Ndi nnutendekena ne, Semenai ha buihi nʼanyi. Bakasemena ha buihi Yeye wakamba ne, Ndi bianyi Yosefe, muakunyʼenu unuakahana mu Ejipitu.

⁵Mitshima yenu kayinyingaladi, kanukuatshiki tshiji bualu bua nuenu nuakumpana kunoko; bualu bua Nzambi wakantumina ku mpala kuenu bua kusungila mioyo ya bantu.

⁶Tshiole tshiakashala mu buloba bidimu bibidi, ne bidimu bitanu bidi bishala bidibo kabayi badima, kabayi bahuola bintu.

⁷Nzambi wakantuma ku mpala kuenu bua kunusangasha difuka dikese dia bantu ne bua kusungila mioyo yenu ku luhandu lunene.

⁸Nunku nuenu kanuakantuma kunoko, kadi Nzambi wakantuma; nyeye wakanvuisha bu tatu wa Palô ne mukelenge wa nsubu wandi wonso, ne mukokeshi wa buloba bua Ejipitu buonso.

⁹Yai bienu lubilu kudi tatu wanyi, numuambile ne, Muanʼebe Yosefe wakamba ne, Nzambi wakanvuisha mukelenge wa buloba bua Ejipitu buonso, Ulue biebe kundi, kujanguluki.

¹⁰Wewe neushikame mu buloba bua Goshene, newikale ha buihi nʼanyi, wewe ne bana bebe ne bana ba bana bebe, ne mikoko yebe ne ngombe yebe ne bintu bionso biudi nʼabi,

¹¹nenkudishileku bualu bua bidimu bia tshiole bidi bishale bitanu; kanulu bu bahele, wewe ne bonso badi mu nsubu webe ne bintu biudi nʼabi.

¹²Nunku tangildi, mesu enu adi amona bu mudi mesu a muakunyʼanyi Benyamina amona ne, Mukana muanyi mudi munuambila malu au.

¹³Nuenu nuambile tatu wanyi bua butumbi buonso bundi nʼabu mu Ejipitu, ne bua malu onso anuakumona, nuhingane ne tatu wanyi kunoko lubilu.

¹⁴Yeye wakela Benyamina tshituha ku nshingu, wakadila, ne Benyamina wakadia ku nshingu wandi kabidi.

¹⁵Wakatuangana mishiku ne bana babo bonso, wakadidila ku nshingu yabo, hashishe bana babo bakayikila nʼandi.

¹⁶Bakunvua lumu elu mu nsubu wa Palô ne, Bana babo ne Yosefe bakalua; lumu elu luakasankisha mitshima ya Palô ne ya bantu bandi.

¹⁷Palô wakambila Yosefe ne, Wambile bana benu ne, Enzai nunku, tekai majitu ha nyima ha mpunda yenu, yai bienu ku buloba bua Kanâna;

¹⁸nuangate tatuʼenu ne bantu badi mu nsubu yenu, nuhingane kundi nennuheshe bintu bimpe bia mu buloba bua Ejipitu, nenudie bintu bidi bitamba buimpe bia mu buloba.

¹⁹Nakumana kunuambila dî dianyi, enzai nunku, nuangate makalu a tubalu tua mu buloba buetu bua kutuadilamu bana benu bakese ne bakashi benu, nuangate tatu wenu, nuhingane.

²⁰Kanuedianganyi meji a bintu bienu, bualu bua bintu bimpe bionso bia mu buloba bua Ejipitu mbienu.

²¹Bana balume ba Isalele bakenza nunku, Yosefe wakabahesha makalu bu muakamba Palô, wakabaha bintu bia kudiabo mu nshila.

²²Wakabaha muntu ne muntu bilulu bihia-bihia, kadi wakaha Benyamina bituha bia argent nkama isatu ne bilulu bihia-bihia bitanu.

²³Wakatumma tatu wandi bintu nunku, nyama ya mpunda dikumi yakadi ne bujitu bua bintu bimpe bia mu buloba bua Ejipitu ha nyima hai ne nyama ya mpunda mikashi dikumi yakadi ne bujitu bua bintu bia kudia ne bintu bia kukuatshisha nʼabi tatuʼandi mu nshila.

²⁴Yosefe wakatuma bana babo nunku, bakaya yeye wakabambila ne, Nudimuke, kanutandanganyi mu nshila.

²⁵Bakumuka mu Ejipitu, bakalua ku buloba bua Kanana kudi Yakoba tatu abo.

²⁶Bakamuambila ne, Yosefe utshidi ne muoyo, ne yeye udi mukelenge wa buloba bua Ejipitu Mutshima wandi wakahandika yeye kakitabusha di diabo.

²⁷Bakamuambila mei onso akabambila Yosefe ne hakatangileye makalu akamutumina Yosefe, mutshima wa Yakoba tatuʼabo wakasangala.

²⁸Isalele wakamba ne Bualu budi bulelela Yosefe muan anyi utshidi ne muoyo nenye kumumona diambedi tshiyi muanze kufua.