Read tshiluba Genese 6 Bible Online

Genese 6 - tshiluba bible

Genese 6

¹Hakabanga bantu kusangana ba bungi ha buloba ne hakalelabo bana bakashi,

²bansongalume ba bantu ba Nzambi bakamona bana bakashi ba bantu ba tshianana ne, Mbalengele, bakasungula bonso bakasuabo bu bakashi babo

³Yehowa wakamba ne, Nyuma wanyi kena utendekena bantu tshiendelele, bualu bua badi anu ba ha buloba, ne matuku abo neikale bidimu lukama ne makumi abidi.

⁴Mu matuku au bantu banene ba nfiondo[1] bakadi ha buloba, ne hakaya bansongalume ba bantu ba Nzambi kudi bansongakashi ba bantu ba tshianana, bakalela nʼabo bana Bobo bakadi bantu banene ba kale ne ba butumbi.

⁵Yehowa wakamona ne, Mibi ya bantu idi idiundadiunda munkatshi mua ba ha buloba ne meji adibo bela mu mitshima yabo adi mabi matuku onso.

⁶Mutshima wa Yehowa wakanyingalala bualu bua yeye wakafuka bantu ha buloba, kanyinganyinga kakadi mu mutshima wandi.

⁷Yehowa wakamba ne, Nenjimishe bantu banakafuka ha buloba, ne bantu ne nyama ne bintu bidi bidikoka hanshi ne nyunyu ya mulu, bualu bua mutshima wanyi udi munyingalale bua nakabifuka.

⁸Kadi Noa wakasangana luse ku mesu kua Yehowa.

⁹Eku nkulondolola kua malu a Noa. Noa wakadi muntu muimpe, wakadi muakane tshishiki mu tshikondo tshiandi, Noa wakendakana ne Nzambi.

¹⁰Noa wakalela bana balume basatu, Shema, Hama ne Yafete.

¹¹Bantu bakadi babi ku mesu kua Nzambi ne buloba buakadi bûle tente ne malu mabi.

¹²Nzambi wakatangila buloba ne monai, buakadi bunyanguka, bualu bua bantu bonso bakanyanguka mu bienzedi biabo bia ha buloba.

¹³Nzambi wakambila Noa ne, Kunshikidilu kua bantu bonso kuakufika ku mpala kuanyi bualu bua buloba budi bûle tente ne mayoyo bualu buabo, mona, nembajimishe ne buloba hamue.

¹⁴Enza biebe buatu ne mutshi wa gopher, enza nsubu mikese munda mua buatu ne laba kamonyi[2] munda mua buatu ne ku nyima kuabu kabidi.

¹⁵Enza buatu nunku buludi buabu nebuikale coudées[3] nkama isatu ne butshiama bua buatu nebuikale coudées makumi atanu ne bule buabu bua mulu nebikale coudées makumi asatu.

¹⁶Enza mutu wa buatu, ushiye muaba wa coudée umue hankatshi ha mutu ne buatu buashi ku nseke yonso, ushiye mushiku ku luseke lukuabo lua buatu, lungakasha nsubu isatu, nsubu wa kumudilu ne nsubu muibidi ha mutu ne nsubu muisatu ha mutu.

¹⁷Tangila, meme nkayanyi, nendokeshe mai mangi ha buloba bua kujimisha bintu bionso bidi ne muhuya wa muoyo munda muabi muinshi mua diulu, tshintu tshionso tshidi ne muoyo ha buloba netshifue.

¹⁸Kadi nenjadike tshihungidi tshianyi nʼebe, wewe neubuele mu buatu ne bana bebe balume ne mukashi webe ne bakashi ba bana bebe.

¹⁹Buela mu buatu ne bintu bibidi bia tshintu tshionso tshidi ne muoyo, bua kusungila mioyo ya bintu, buela ne mulume ne mukashi ba bintu bionso,

²⁰ba nyunyu ne ba bimuna ne ba tshintu tshionso tshidi tshidikoka hanshi, bu mudi mishindu yabi, buela ne bintu bibidi bia bintu bionso bua kusungila mioyo yabi.

²¹Sangisha bintu bia ku diabi bionso, nebikale bu bintu bia kudia biebe ne biabi kabidi.

²²Noa wakenza nunku, wakenza muanda yonso yakamuambila Nzambi.