Read tshiluba Genese 7 Bible Online

Genese 7 - tshiluba bible

Genese 7

¹Yehowa wakambila Noa ne, Buela biebe mu buatu ne bantu bonso ba mu nsubu muebe, bualu bua meme nakakumona muimpe ku mesu kuanyi munkatshi mua tshikondo etshi.

²Buela biebe ne nyama yonso idi mimpe, balume muanda mutekete ne bakashi muanda mutekete, ne nyama idi kayiyi mimpe, buela ne balume babidi ne bakashi babidi.

³Buela biebe ne balume ba nyunyu muanda mutekete ne bakashi ba nyunyu muanda mutekete, bua kusungila mioyo ya bintu.

⁴Haleha matuku muanda mutekete nendokeshe nvula ha buloba munya ne bufuku to matuku makumi anai, nenjimishe bintu bionso binakafuka ha buloba.

⁵Noa wakenza muanda yonso yakamuambila Yehowa.

⁶Noa wakadi ne bidimu nkama isambombo hakaloka nvula ha buloba.

⁷Noa wakabuela mu buatu ne mukashi wandi ne bana bandi balume ne bakashi ba bana bandi, bualu bua mai akavulangana.

⁸Ne nyama idi mimpe ne nyama idi kayiyi mimpe ne nyunvu ne tshintu tshionso tshidi tshidikoka hanshi,

⁹bintu bibidi bintu bibidi, bilume ne bikashi, biakabuela ne Noa mu buatu, bu muakambila Nzambi Noa.

¹⁰Hakashika matuku muanda mutekete mai akavulangana ha buloba.

¹¹Hakadi Noa mu tshidimu tshia nkama isambombo tshia muoyo wandi, mu ngondo muibidi ne dituku dia dikumi ne muanda mutekete dia ngondo, mu dituku adi mene, mishimi yonso ya mu mai manene yakahongoloka ne bibi bionso bia mu diulu biakunzuludibua.

¹²Nvula yakaloka ha buloba munya ne bufuku tô matuku makumi anai.

¹³Mu ditu ku adi diodimue Noa ne bana bandi, Sheme ne Hama ne Yafete, bana ba Noa, ne mukashi wa Noa, ne bakashi basatu ba bana bandi bakabuela mu buatu,

¹⁴bobo ne nyama yonso ya mushindu ne mushindu ne bimuna bionso bia mushindu ne mushindu, ne bintu bionso budi bidikoka hanshi bia mushindu ne mushindu, ne nyunyu yonso ya mushindu ne mushindu, tshionso tshidi ne mahuahua.

¹⁵Biakabuela ne Noa mu buatu, bintu bibidi bintu bibidi bia bintu bionso bidi ne muhuya wa muoyo.

¹⁶Biakabuela mulume ne mukashi ba bintu bionso, bu muakamuambila Nzambi, ne Yehowa wakamuinshidila tshibi.

¹⁷Nvula yakaloka tô matuku makumi anai, mai akavulangana, akabandisha buatu ha mutu, buakabandishibua ku buloba.

¹⁸Mai akatamba, akavulangana a bungi ha buloba, ne buatu buakabanda ha mutu ha mai.

¹⁹Mai akatamba kuvulangana ha buloba, ne mikuna mile yonso idi muinshi mua diulu yakabuikidibua.

²⁰Mai akabanda to coudées[4] díkumi ne itanu ha mikuna mile.

²¹Bintu bionso biakadi ha buloba biakafua, ne nyunyu ne bimuna ne nyama ne bintu bionso budi bidikoka hanshi ne muntu yonso,

²²bintu bionso biakadi ne muhuya wa muoyo munda muabi bia ha buloba bume biakafua.

²³Wakajimisha tshintu tshionso tshiakadi ne muoyo ha buloba, ne bantu ne bimuna ne bintu bidi bidikoka hanshi ne nyunyu ya mulu, bintu bionso biakajimina ha buloba, anu Noa ne bantu ne bintu biakadiye nʼabi mu buatu biakashala.

²⁴Mai akavulangana ha buloba matuku lukama ne makumi atanu.