Read tshiluba Genese 8 Bible Online

Genese 8 - tshiluba bible

Genese 8

¹Nzambi wakavuluka Noa ne nyama yonso ne bimuna bionso biakadi nʼandi mu buatu, Nzambi wakahehesha luhehele ha buloba ne mai akahueka.

²Mishimi ya mu mai manene ne bibi bia mu diulu kabidi biakadi bikandibua, ne nvula ya mu diulu yakalekeshibua.

³Mai akahuekahueka ha buloba, hakakumbana matuku lukama ne makumi atanu, mai akadi ahueka.

⁴Mu ngondo wa muanda mutekete ne dituku dia dikumi ne muanda mutekete dia ngondo buatu buakatua ha mikuna ya Alalata.

⁵Mai akadi ahuekahueka tô ne ku ngondo wa dikumi, ku dituku dia kumudilu dia ngondo wa dikumi, mitu ya mikuna yakamueneka.

⁶Hakakumbana matuku makumi anai Noa wakunzulula ha disoso dia buatu diakenzeye.

⁷Yeye waka tuma nyunyu wa tshikololo, tshiakalembelela tô ne hakûma mai ha buloba.

⁸Yeye waka tuma nyunyu wa nkutshi bua kumanyeye ne mai akahueka ha buloba.

⁹Kadi nyunyu wa nkutshi kakamona muaba wa kuikala, nunku wakahingana kudiye mu buatu, bualu bua mai akatshidi ha buloba buonso, yeye wakolola tshianza tshiandi, wakamukuata, wakamuteka mu buatu muakadiye.

¹⁰Noa wakindila matuku muanda mutekete makuabo, wakatuma nyunyu wa nkutshi kabidi,

¹¹nyunyu wakahingana kudiye dilolo, ne monai, wakadi ne katamba ka mutshi wa olive kabishi ku muinu, nunku Noa wakamanya ne mai akadi makehe ha buloba.

¹²Wakindila matuku muanda mute kete makuabo, waka tuma nyunyu wa nkutshi kabidi, ne nyunyu kakahingana kudiye kabidi tshiendelele.

¹³Hakalua tshidimu tshia Noa tshia nkama isambombo ne tshimue, mu ngondo wa kumudilu ne dituku dia kumudilu dia ngondo, mai onso akûma ha buloba, ne Noa wakumusha tshibuikilu tshia buatu, wakatangila ne monai, buloba buonso buakûma.

¹⁴Hakalua ngondo muibidi ne dituku dia makumi abidi ne muanda mutekete, buloba buakuma

¹⁵Nzambi wakambila Noa ne,

¹⁶Hatuka mu buatu, wewe ne mukashi webe ne bana bebe balume ne bakashi babo.

¹⁷Luhuka mu buatu ne bintu bionso bidi ne muoyo biakadi nʼebe ne nyunyu ne bimuna ne tshintu tshionso tshidi tshidikoka hanshi, bilelangane, bivulangane bia bungi ha buloba.

¹⁸Noa wakaluhuka ne bana bandi balume ne mukashiʼandi ne bakashi ba bana bandi,

¹⁹ne nyama yonso ne tshintu tshionso tshidi tshidikoka hanshi ne nyunyu yonso ne tshintu tshionso tshidi tshiendakana ha buloba, bu mudi mishindu yabi, biakaluhuka mu buatu.

²⁰Noa wakashila Yehowa tshioshelu, wakangata wa nyama yonso idi miakane ne wa nyunyu yonso idi miakane, wakabika bu mulambu wa kuosha ha kalua ha tshioshelu.

²¹Yehowa wakanunkila dihembu dimpe: Yehowa wakamba mu mutshima wandi ne, Tshiena ngela buloba mulau kabidi bualu bua bantu badi ne meji mabi mu mitshima yabo hatshidibo bitende tô ne hakulumpabo, tshiena njimisha bifukibua bionso bidi ne muoyo kabidi bu munakenza diambedi.

²²Hashala buloba, tshidimu tshia kukuna bintu ne tshidimu tshia kunowa bintu ne tshidimu tshia mashika ne tshidimu tshia luya ne munya ne mîdima kabiena bihanga tshiendelele nansha.