Read tshiluba 2 Samuele 16 Bible Online

2 Samuele 16 - tshiluba bible

2 Samuele 16

¹Hakafika Davidi ha mutu ha mukuna, monai, Siba, muena mudimu wa Mefibosheta, wakasangakena nʼandi; wakadi ne nyama ya mpunda ibidi ne biseba bisuike ha nyima hai ne mitanda ya mampa nkama ibidi ne bisumbu bia tumuma tukese tûme lukama ne lukama lua mamuma makuabo ne mulondo wa nvinyo.

²Mukelenge wakakonka Siba ne, Udi wenza tshinyi ne bintu ebi? Siba wakamba ne, Nyama ya mpunda nya ba mu nsubu wa mukelenge kubandabu; mampa ne mamuma mbua bansongalume kudia; ne nvinyo nya badi bahanga mu tshihela banue.

³Mukelenge wakamuebesha ne, Muana mulume wa mukelenge webe udi hanyi? Siba wakambila mukelenge ne, Mona, yeye udi mushale mu Yelushalema; bualu bua yeye wakamba ne, Lelu Bena Isalele nebampingishe mu bukelenge bua tatu wanyi.

⁴Hashishe mukelenge wakambila Siba ne, Mona, bintu bionso bia Mefibosheta mbiebe. Siba wakamba ne, Meme ndi nkukukuila; mukelenge wanyi, nsangane diakalengele ku mesu kuebe.

⁵Hakafika Davidi ku Bahulima, monai, muntu wa mu nsubu wa Shaula, dina diandi Shimei, muan? wa Gela, wakaluhuka, wenda umuhenda hakatshidiye ulua.

⁶Wakela Davidi ne bantu bonso ba mukelenge Davidi mabue; bantu bandi bonso ne bena bukitu bonso bakadi ku tshianza tshia balume ne ku tshianza tshia bakashi.

⁷Hakamuhenda Shimei, wakamba ne, Umuke, Umuke, wewe udi muntu wa mashi, udi muntu wa tshidingidingi;

⁸Yehowa wakahingisha mashi a bantu bonso ba mu nsubu wa Shaula ha mutu hebe; bua wewe udi ukokesha mu muaba wandi, ne Yehowa wakafila bukelenge mu bianza bia Abashaloma muanʼebe, ne mona, bakakukuata mu malu mabi ebe, bualu bua wewe udi muena mashi.

⁹Hashishe Abishai, muana wa Seluya, wakakonka mukelenge ne, Mbua eu mufue udi ne bua kuhenda mukelenge wanyi nunku bua tshinyi? Ndi nkusengelela ne, Witabushe bua meme kuya kudiye bua kukosa mutu wandi.

¹⁰Mukelenge wakamuebesha ne, Nuenu bana balume ba Seluya, ndi nʼenu bualu kai? Biampendeye bualu bua Yehowa wakamutuma ne, Uhende Davidi, udi nganyi bua kumuebesha ne, Udi wenza nunku bualu kai?

¹¹Davidi wakambila Abishai ne bantu bandi bonso ne, Monai, muanʼanyi mulume wakaluhuka munda muanyi udi ukeba muoyo wanyi; nunku Muena Benyamina eu kena mua kutamba kuenza nunku, anyi? Mulekela, ampende, bualu bua Yehowa wakamutuma.

¹²Biasua Yehowa, yeye udi mumanye mua kutangila bubi buakungenzeleye; Yehowa udi mumanye mua kungenzela bimpe bua bihendu biandi biakumpendeye nʼabi lelu.

¹³Nunku Davidi ne bantu bandi bakaya mu nshila. Shimei wakaya mu nshila wa ku mpenge, wenda umuhenda; wakamuela mabue ne luhuishi.

¹⁴Mukelenge ne bantu bonso bakadi nʼandi bakalua bahungile; wakikishaku.

¹⁵Abashaloma ne bantu bonso, Bena Isalele, bakabuela mu Yelushalema; Ahitofele wakadi nʼandi.

¹⁶Hakafika Hushai, Muena Aka, mulunda wa Davidi, kudi Abashaloma, Hushai wakambila Abashaloma ne, Mukelenge ikale ne muoyo musangu mule! Mukelenge ikale ne muoyo musangu mule!

¹⁷Abashaloma wakebesha Hushai ne, Elu nduse luebe kudi mulunda webe, anyi? Kuakaya ne mulunda webe bua tshinyi?

¹⁸Hushai wakakudimuna Abashaloma dî ne, Nansha; kadi muntu wakasungulabo kudi Yehowa ne kudi Bena Isalele bonso, meme nengikale wandi, nenshikame nʼandi.

¹⁹Bundi nʼabu mbua kukuatshila nganyi mudimu? Tshikuatshi mudimu ku mesu kua muanʼandi mulume, anyi? Bu munakakuata mudimu ku mesu kua tatu webe, neakuate mudimu ku mesu kuebe kabidi.

²⁰Hashishe Abashaloma wakambila Ahitofele ne, Utuambile tshiadi mua kuenza.

²¹Ahitofele wakambila Abashaloma ne, Ubuele mu nsubu kudi bakashi bahika babakibue kudi tatu webe bakashiyeye bua kulamabo nsubu; Bena Isalele bonso nebunvue lumu ne, Wewe udi mulenguludibue kudi tatu webe, nunku maboko a bantu bonso badi nʼebe neakoleshibue.

²²Nunku bakashimika ntenta wa Abashaloma ha mutu ha nsubu; Abashaloma wakabuela kudi bakashi bahika babakibue kudi tatu wandi ku mesu kua Bena Isalele bonso.

²³Mei akamba Ahitofele mu matuku au akadi bu muntu mukonke dî dia Nzambi. Lungenyi luonso bakambila Ahitofele Davidi ne Abashaloma luakadi nunku.