Read tshiluba 2 Samuele 17 Bible Online

2 Samuele 17 - tshiluba bible

2 Samuele 17

¹Ahitofele wakambila Abashaloma ne, Witabushe bua meme nsungule bantu binunu dikumi ne bibidi, nenjuke butuku ebu mene bua kulonda Davidi;

²nemmuhete hatshidiye muhungile ne mutekete, nemmutshinyishe; bantu bonso badi nʼandi nebanyeme, Nenshihe anu mukelenge nkayandi,

³nempingishe bantu bonso kûdi wewe. Muntu ûdi ukeba udi bu bantu bonso bakahingana; nunku bantu bonso nebikale talalâ.

⁴Dî edi diakasankisha Abashaloma ne bakulu bonso ba mu Isalele bimpe.

⁵Hashishe Abashaloma wakamba ne, Bikilai Hushai, Muena Aka, kabidi, tunvue tshidiye Wamba kabidi.

⁶Hakafika Hushai kudi Abashaloma, yeye wakamuambila ne, Ahitofele wakamba nunku; netulonde dî diandi, anyi? Biwahidia, utuambile dî diebe.

⁷Hushai wakambila Abashaloma ne, Dî diakukuambila Ahitofele tshikondo etshi kadiena dimpe nansha.

⁸Hushai wakamba kabidi ne, Wewe udi mumanye tatu webe ne bantu bandi badi bena bukitu, badi ne tshiji mu mitshima yabo bu nkashama wa muitu wakangatabo bana bandi; tatu webe udi muena nvita, yeye katu walala munkatshi mua bantu bandi.

⁹Mona, yeye udi musokome mu lubuebue anyi mu muaba mukuabo; nunku hashihabo bantu bakuabo diambedi, yonso udi unvua lumu elu neambe ne, Kushiha kudi munkatshi mua bantu badi balonda Abashaloma.

¹⁰Ne yeye kabidi, udi ne bukitu, udi ne mutshima bu mutshima wa nyama wa ntambue, nênguluke; bualu bua Bena Isalele bonso badi bamanye ne tatu webe udi muntu mukole ne bantu badi nʼandi badi bena bukitu.

¹¹Nunku dî dindi nkuambila didi nunku ne, Usangishe Bena Isalele bonso ku Dana tô ne ku Bê-sheba, bungi buabo nebuikale bu nsenga ya ku muelelu wa mai manene; wewe nkayebe uye nʼabo mu nvita.

¹²Nunku netumuhete mu muaba mudiye, netumunguile bu mume mukuate ku mashinde; ne yeye ne bantu bonso badi nʼandi, katuena tushiya umue wabo ne muoyo.

¹³Biabueleye mu musoko mukuabo. Bena Isalele bonso nebalue ne mionshi ku musoko au, nebaukoke mu musulu tô ne hadibo kabayi basanganamu lusoka lukese.

¹⁴Abashaloma wakambila Bena Isalele bonso ne, Lungenyi luakatuambila Hushai, Muena Aka, ludi luhita lua Ahitofele buimpe. Bualu bua Yehowa wakahangidisha bua kukudimuna mei mimpe akamba Ahitofele bua Yehowa enzele Abashaloma bualu bubi.

¹⁵Hashishe Hushai wakambila Sadoka ne Ebeyatâ bakuidi ne, Ahitofele wakuambila Abashaloma ne bakulu ba mu Isalele nunku ne nunku; ne meme nakubambila nunku ne nunku.

¹⁶Nunku utume dî lubilu, wambile Davidi ne, Kuladi butuku ebu mu mpata wa mu tshihela, kadi usabuke ku luseke lukuabo; kabajimishi mukelenge ne bantu bonso badi nʼandi.

¹⁷Yonatana ne Ahimasa bakadi bashikama mu Ene-logela, ne muena mudimu mukashi wakaya kubambila, ne bobo bakaya, bakambila mukelenge Davidi; bualu bua bobo kabakamanya mua kubuela mu musoko ku mesu kua bantu.

¹⁸Kadi nsongalume mukuabo wakabatangila, wakamanyisha Abashaloma; nunku bubidi buabo bakaya lubilu, bakafika ku nsubu wa muntu wa mu Bahulima, wakadi ne dina dia mai mu luhangu luandi; bakabuela mu dina adi.

¹⁹Mukashi mukuabo wakabuikila mushiku wa dina ne tshilulu, wakabadilahu blé wakatueye; bualu ebu kabuakamanyibua.

²⁰Bantu ba Abashaloma bakafika ku nsubu wa mukashi eu, bakamuebesha ne, Ahimasa ne Yonatana badi kudi kunyi? Mukashi wakabambila ne, Bakamana kuhita, bakasabuka musulu wa mai. Bobo bakakebakeba, kabakabasa ngana, nunku bakahingana ku Yelushalema.

²¹Hakayabo, Ahimasa ne Yonatana bakahatuka mu dina, bakaya, bakamanyisha mukelenge Davidi; bakambila Davidi ne, Juka, usabuke mai lubilu, bualu bua Ahitofele wakamba mei adi kâyi mimpe bua bualu buebe.

²²Hashishe Davidi wakajuka ne bantu bonso bakadi nʼandi, bakasabuka dishiya dia Yadene; hakatshiabu nansha umue wabo wakashala, buonso buabo bakadi basabuka.

²³Hakatangila Ahitofele ne, Bakahidia lungenyi luanyi, yeye wakela tshiseba ha nyima ha nyama wandi wa mpunda,[5] wakajuka, wakaya kuandi ku musoko wandi, wakalongolola malu a mu nsubu wandi, wakadiowa, wakafua, bakamujika mu lukita lua tatu wandi.

²⁴Davidi wakafika ku Mahanayima. Abashaloma ne Bena Isalele bonso bakadi nʼandi bakasabuka Yadene.

²⁵Abashaloma wakateka Amasa ku mutu kua masalayi andi mu muaba wa Yoaba. Amasa wakadi muana wa muntu dina diandi Yitela, Muena Isalele, wakabuela kudi Abigayila, muana wa Nahasha, muanʼabo mukashi ne Seluya, mamu wa Yoaba.

²⁶Abashaloma ne Bena Isalele bakasa tshitudilu tshiabo mu buloba bua Gilada.

²⁷Hakafika Davidi ku Mahanayima, Shobi, muana mulume wa Nahasha wa mu Laba wa Bena Amona, ne Makî, muana wa Amiele wa mu Lo-debâ, ne Bâzilai, Muena Gilada wa mu Logelima,

²⁸bakalua ne malalu ne malonga, ne bihanza ne blé ne orge ne bukula ne blé mukanga ne nkunde ne nkunde ya kahelele ne nkunde ya tshikunde-kunde

²⁹ne buitshi ne manteke ne mikoko ne fromage bua Davidi ne bantu bakadi nʼandi badie. Bualu bua bakamba ne, Bantu badi ne nzala, badi bahungile ne badi ne nyota mu tshihela.