Read tshiluba 2 Samuele 7 Bible Online

2 Samuele 7 - tshiluba bible

2 Samuele 7

¹Hakadi Mukelenge ushikama mu nsubu wandi ne bakamuha Yehowa dikisha kudi bena lukuna bandi bonso,

²mukelenge wakambila Natana muprofete ne, Tangila, meme ndi nshikama mu nsubu wa mabaya a cèdre, kadi mushete wa Nzambi udi mushale mu nsubu wa bilulu.

³Natana wakambila mukelenge ne, Ya wenze malu onso adi mu mutshima webe bualu bua Yehowa udi nʼebe.

⁴Kadi butuku abu mene dî dia Yehowa diakalua kudi Natana ne,

⁵Ya, Wambile muntu wanyi Davidi ne, Yehowa udi ukonka ne, Wewe udi musue kungibakila nsubu wa meme kushikamamu, anyi?

⁶Bualu bua tshiakashikama mu nsubu ku dituku dinakumuka ne Bena Isalele mu Ejipitu tô ne mpindiu, kadi nakendakana anu mu ntenta ne mu ntenta wa kusambakena.

⁷Mu miaba yonso inakaya ne Bena Isalele, nakakonka mulumbuluishi umue wakasungula bua kulameye bantu banyi Bena Isalele ne, Kuena muanze kungibakila nsubu wa mabaya a cèdre bualu kai?

⁸Nunku Wambile muntu wanyi Davidi ne, Yehowa wa misumba udi wamba ne, Nakakûmusha mu luhangu lua mikoko hawakadi ulama mikoko, nakakusungula mukelenge ku mutu kua bantu banyi Bena Isalele;

⁹nakadi nʼebe ku miaba yonso iwakaya; nakashiha bena lukuna bebe bonso ku mpala kuebe; nenkuvuishe dina dinene bu dina dia bantu banene ba ha buloba.

¹⁰Nensunguile bantu banyi Bena Isalele muaba, nembajadikemu bua bobo bashikame mu muaba wabo, kabena bumukamu kabidi; bantu babi kabena babatatshisha bu muakenzabo diambedi;

¹¹bu munakenza mu matuku anakasungula bantu banyi Bena Isalele balumbuluishi, nenkuvuishe dikisha kudi bena lukuna bebe bonso. Yehowa udi ukuambila kabidi ne, Meme nenjadike nsubu webe.

¹²Hakumbana matuku ebe, hawalala tulu ne bankambua bebe, nensungile muana webe udi uluhuka munda muebe, nenjadike bukelenge buandi.

¹³Yeye neibakile dina dianyi nsubu, nenjadike nkuasa wa bukelenge buandi tshiendelele.

¹⁴Nengikale tatu wandi, yeye neikale muanʼanyi; henzeye bualu bubi, nemmukengeshe ne nsokotshi wa bantu ne mibunda-bunda ya bana ba bantu;

¹⁵luse luanyi lujalame kaluena lumuka kudiye, bu munakalûmusha kudi Shaula, unakumusha ku mpala kuebe.

¹⁶Nsubu webe ne bukelenge buebe nebujadikibue ku mesu kuebe tshiendelele; nkuasa webe wa butumbi neajadikibue tshiendelele.

¹⁷Natana wakambila Davidi bu muakadi mei â onso, ne bu muakadi tshikena kumona etshi.

¹⁸Hashishe mukelenge Davidi wakabuela mu nsubu, wakashikama ku mpala kua Yehowa, wakamba ne, Mukelenge Yehowa, meme ndi nganyi, ne tshiota tshianyi tshidi tshinyi bua wewe wakalua nʼanyi anu kunoko?

¹⁹Mukelenge Yehowa, bualu ebu buakadi bukese ku mesu kuebe; kadi wewe wakamba bua tshiota tshia muntu webe mu matuku adi kayi manze kulua; wewe Mukelenge Yehowa wakangambila bualu ebu bu mudi bantu bambilangana malu!

²⁰Davidi udi mua kukuambila dî kai dikuabo? Bualu bua wewe Mukelenge Yehowa udi mumanye muntu webe.

²¹Bualu bua dî diebe ne bua mutshima webe wewe wakenza malu â onso manene, wakâmanyisha muntu webe.

²²Nunku wewe, Yehowa Nzambi, udi munene: kakuena mukuabo bu wewe, kakuena Nzambi mukuabo anu wewe nkayebe, bu mudi malu onso atuakunvua ku matshu etu.

²³Tshisamba kai tshia hanshi ha buloba tshidi bu bantu bebe Bena Isalele? Nzambi nkayandi wakababikila bu bantu bandi bua kujadikeye nʼabo dina diandi ne bua kubenzeleye malu manene; yeye wakenza malu a kukema mu buloba buabo ku mesu kua bantu bandi bakahikuleye mu Ejipitu mu bianza bia bisamba bikuabo ne bia nzambi yabo.

²⁴Wewe wakadisunguila bantu bebe Bena Isalele bua kuikalabo bantu bebe tshiendelele; wewe Yehowa wakalua Nzambi waho.

²⁵Nunku Yehowa Nzambi, dî diwakambila muntu webe bualu buandi ne bua tshiota tshiandi, udijadike tshiendelele; wenze bu muwakamba.

²⁶Dina diebe ditumbishibue tshiendelele; bantu bambe ne, Yehowa wa misumba udi Nzambi ku mutu kua Bena Isalele; tshiota tshia muntu webe Davidi netshijadikibue tshiendelele ku mpala kuebe.

²⁷Bualu bua wewe Yehowa wa misumba, Nzambi wa Isalele, wakabulula muntu webe bualu ebu, wamba ne, Nenjadike tshiota tshiebe; nunku muntu webe wakadi ne bualu ebu mu mutshima wandi bua kukutendeleleye ne mitendelelu ei.

²⁸Nunku Mukelenge Yehowa, wewe udi Nzambi, ne mei ebe adi a bushuwa, wewe wakalaya muntu webe bualu ebu buimpe.

²⁹Witabushe bua kuvudishila tshiota tshia muntu webe disanka bua tshikaleku tshiendelele ku mpala kuebe; bualu bua wewe, Mukelenge Yehowa, wakamba bualu ebu; disanka diudi nʼadi dikale ku tshiota tshia muntu webe tshiendelele.