Read tshiluba 2 Samuele 8 Bible Online

2 Samuele 8 - tshiluba bible

2 Samuele 8

¹Ku nyima kua bualu ebu Davidi wakaluangana ne Bena Peleshete, wakabahita bukole; Davidi wakanyenga Metega-hama mu bianza bia Bena Peleshete.

²Wakashiha Bena Moaba; wakahandika hanshi ha buloba, wakabidikisha ne luidi; wakasungula mulongo ibidi bua kuyishiha, wakasungula mulongo mukuabo bua kushala ne muoyo. Bena Moaba bakalua bahika ba Davidi, bakamulambula milambu.

³Davidi wakashiha kabidi Hadadezê, muana wa Lehoba, mukelenge wa mu Soba, hakayeye bua kujadika bukelenge buandi buakadi ku musulu wa Pelata.

⁴Davidi wakamunyenga bantu bakadi benda ha nyima ha tubalu tshinunu tshimue ne nkama muanda mutekete, ne bakadi benda hanshi binunu makumi abidi; Davidi wakakosa tubalu tuonso mifungu yatu, kadi wakasungula tukuabo bua makalu lukama.

⁵Hakalua Bena Sulia ba mu Damaseke bua kukuatshishabo Hadadezê, mukelenge wa mu Soba, Davidi wakashiha Bena Sulia binunu makumi abidi ne bibidi.

⁶Davidi wakateka masalayi mu Sulia mu Damaseke; Bena Sulia bakalua bahika ba Davidi, bakamulambula milambu. Yehowa wakaha Davidi bukole bua kutambeye kuonso kuakayeye.

⁷Davidi wakangata ngabu ya biamu bia or yakadi bantu ba Hadadezê nʼai, wakalua nʼai ku Yelushalema.

⁸Mukelenge Davidi wakangata biamu bia mitaku bia bungi mu Beta ne Belotai, misoko ya Hadadezê.

⁹Hakunyua Toi, mukelenge wa mu Hamata, lumu ne, Davidi wakashiha masalayi onso a Hadadezê,

¹⁰Toi wakatuma Yotama, muanʼandi, kudi Mukelenge Davidi bua kumueleye muoyo ne bua kumuvudishileye disanka bualu bua yeye wakaluangana ne Hadadezê, wakamushiha. Bualu bua Hadadezê wakadi uluangana ne Toi. Yolama wakalua ne malonga a tshiamu tshia argent ne a or ne a tshiamu tshia mitaku:

¹¹ebi kabidi biakajidileye mukelenge Davidi kudi Yehowa bu muakajidileye Yehowa argent ne or bia bisamba bionso biakahiteye bukole;

¹²bia mu Sulia ne bia mu Moaba ne bia Bena Amona ne bia Bena Peleshete ne bia Bena Amaleka ne biakanyengeye kudi Hadadezê, muana wa Lehoba, mukelenge wa mu Soba.

¹³Davidi wakadivuisha dina dinene hakalukileye ku kushiha kua Bena Sulia mu Tshibanda tshia Luehu, bantu binunu dikumi ne muanda mukulu.

¹⁴Yeye wakateka masalayi mu nseke yonso ya Edome; Bena Edome bonso bakalua bahika ba Davidi. Yehowa wakaha Davidi bukole bua kutambeye kuonso kuakayeye.

¹⁵Davidi wakakokesha Bena Isalele bonso; Davidi wakalumbuluila bantu bandi bonso biakane, wakabenzela malu makane.

¹⁶Yoaba, muana wa Seluya, wakadi ku mutu kua masalayi andi; Yehoshafata, muana wa Ahiluda, wakadi mufundi wa malu a bukelenge;

¹⁷Sadoka, muana wa Ahituba, ne Ahimeleke, muana wa Ebeyatâ, bakadi bakuidi; Selaya wakadi mufundi.

¹⁸Benaya, muana wa Yehoyada, wakadi ku mutu kua Bena Kelete ne Bena Pelete; bana balume ba Davidi bakadi miloho yandi.