Read tshiluba 1 Bakelenge 10 Bible Online

1 Bakelenge 10 - tshiluba bible

1 Bakelenge 10

¹Hakunvua mukelenge mukashi wa mu Sheba lumu lua butumbi bua Solomo ne bua dina dia Yehowa, yeye wakalua bua kunuteta makonka makole.

²Wakafika ku Yelushalema ne batuadi ba bungi, ne tumelo tuakadi ne bintu bia muhuya muimpe ne biamu bia or bia bungi ne mabue a mushinga mukole; hakafikeye kudi Solomo wakayikila nʼandi, wakamuambila malu onso akadiye nʼau mu mutshima wandi.

³Solomo wakitaba ku makonka andi onso; yeye kakamusokoka bualu bumue.

⁴Hakatangila mukelenge mukashi wa mu Sheba lungenyi luonso lua Solomo, ne nsubu wakaseye,

⁵ne bia kudia ku mesa andi ne bu muakashikikeye bena mudimu bandi ne dikuatshisha dia miloho yandi ne bilulu biabo ne batuadi ba makoho andi ne tshibandilu tshiakadiye ubandila ku nsubu wa Yehowa, yeye kakadi ne mutshima wa kumukudimuna dî.

⁶Yeye wakambila mukelenge ne. Lumu lunakunvua mu buloba buanyi lua bienzedi biebe ne lungenyi luebe luakadi lulelela.

⁷Kadi tshiakuitabusha mei tô ne hanakulua bua kudimuenena ku mesu: hakangambila anu tshituha tshia mei; lungenyi luebe ne bubanji buebe bidi bihita lumu lunakunvua bunene.

⁸Bantu aba ne bena mudimu bebe batu bimana ku mpala kuebe bua kunvua lungenyi luebe badi ne disanka.

⁹Yehowa, Nzambi webe, udi ne disanka bualu buebe, wakukushikika mu nkuasa wa butumbi wa Isalele, atumbishibue; bualu bua Yehowa udi munange Bena Isalele tshiendelele nunku wakukusungula mukelenge bua wewe kulumbulula malu biakane ne kuenza malu adi makane.

¹⁰Yeye wakaha mukelenge ntalanta ya or lukama ne makumi abidi, ne bintu bia muhuya muimpe bia bungi, ne mabue a mushinga mukole: kabakatangila bungi bua bintu bia muhuya muimpe bu muakaha mukelenge mukashi wa mu Sheba mukelenge Solomo kabidi.

¹¹Matu a Hilama akafuma ku Ofî ne or akalua ne mitshi ya sandal ne mabue a mushinga mukole bia ku Ofî kabidi.

¹²Mukelenge wakenza makunshi a mu nsubu wa Yehowa ne mu nsubu wa mukelenge a mitshi ei ya sandal; wakenza kabidi bisanji ne nzenze ya bimbi ba misambu kuimba; kabakatangila mitshi ya sandal bu ei kabidi tô ne ku lelu.

¹³Mukelenge Solomo wakaha mukelenge mukashi wa mu Sheba bintu bionso biakasua mutshima wandi; wakamuha bintu bionso biakamulombeye ha mutu ha bintu biakamuheye diambedi mu bibutshilu bia mukelenge Solomo. Nunku yeye wakahingana ku buloba buandi ne bantu bandi.

¹⁴Bujitu bua or yakangata Solomo ku tshidimu tshimue buakadi ntalanta[6] ya or nkama isambombo makumi asambombo ne isambombo,

¹⁵ha mutu ha or ya basombeshanganyi ne bendi ba mushinga ne ya hakelenge ba Alabâ ne ya ba-gouverneur ba buloba.

¹⁶Mukelenge Wakenza ngabu ya or yakatulabo nkama ibidi: bujitu bua or ya mu ngabu umue buakadi nshekele[7] nkama isambombo.

¹⁷Wakenza ngabu ya or yakatulabo nkama isatu; bujitu bua or ya mu ngabu umue buakadi mines[8] isatu; mukelenge wakayiteka nsubu wa ditu dia Lebanona.

¹⁸Mukelenge Wakenza nkuasa munene e wa bukelenge wa mibanga, wakalamika tshiamu tshia or ha nyima nʼandi honso.

¹⁹Nkuasa wa bukelenge wakadi ne tshibandilu tshia bidiatshilu bisambombo; nyima wa mutu wa nkuasa wakadi tshijengu; bitekelu bibidi bia maboko biakadi ku luseke ne luseke lua nkuasa; tshifuanyikishi tshia nyama wa ntambue tshiakadi tshilamata ku tshitekelu ne tshitekelu tshia maboko.

²⁰Bifuanyikishi bia nyama ya ntambue dikumi ne bibidi biakadi biteka ku bidiatshilu bisambombo, bibidi ku tshidiatshilu ne tshidiatshilu, tshimue ku luseke tshimue ku luseke; kakuakadi mukuabo bu eu mu bukelenge bukuabo.

²¹Makoho onso a kunua nʼau mukelenge Solomo akadi a or, ne malonga onso a mu nsubu wandi wa ditu dia Lebanona akadi a or mene mene; nansha dimue diakadi dia argent: tshiamu atshi katshiakadi tshia mushinga mukole mu matuku a Solomo.

²²Bualu bua mukelenge wakadi ne matu akenda ha mutu ha mai manene ku Tâshishi hohamue ne matu a Hilama: akaya ku Tâshishi musangu umue mu bidimu bisatu, akafumaku ne or, argent ne mibanga ne nkima ne kaiba.

²³Nunku mukelenge Solomo wakahita bakelenge honso ba ha buloba bubanji ne lungenyi.

²⁴Bantu bonso ba ha buloba bakakeba Solomo bua kunvuabo lungenyi luakateka Nzambi mu mutshima wandi.

²⁵Muntu yonso wakalua ne mulambu wandi, bintu bia or ne bia argent ne bilulu ne bintu bia nvita ne bintu bia muhuya muimpe ne tubalu ne nyama ya mpunda[9], ku tshidimu ku tshidimu.

²⁶Solomo wakadisangishila makalu ne bantu bakenda ha nyima ha tubalu: wakadi ne makalu tshinunu tshimue ne nkama inai, ne bantu bakenda ha nyima ha tubalu binunu dikumi ne bibidi biakatekeye mu misoko ya makalu andi ne mu Yelushalema hehi ne mukelenge.

²⁷Mukelenge wakakumbasha argent mu Yelushalema bu mabue a nsakabua ne mitshi ya cèdre bu mitshi ya sycomore idi mu tshibanda, bualu bua bungi buabi.

²⁸Tubalu tuakadi Solomo nʼatu tuakufuma ku Ejipitu: bendi ba mushinga ba mukelenge bakatuangata mu bisumbu, bakafila mushinga ku tshisumbu ne ku tshisumbu.

²⁹Bakasumba dikalu mu Ejipitu ku nshekele ya argent nkama isambombo, ne kabalu ku nshekele ya argent lukama ne makumi atanu. Bakabituadila hakelenge ba Bena Hiti ne ba Bena Sulia muomumue.