Read tshiluba 1 Bakelenge 12 Bible Online

1 Bakelenge 12 - tshiluba bible

1 Bakelenge 12

¹Lehabama wakaya ku Shekeme, bualu bua Bena Isalele bonso bakadisangishaku bua kumuhingisha mu bukelenge.

²Kakunyua Yalobama, muana wa Nebata, lumu elu (bualu bua yeye wakatshidi mu Ejipitu kuakanyemeye ku mesu kua mukelenge Solomo; Yalobama wakadi ushikama mu Ejipitu,

³ne bakatuma dî bua kumubikila), nunku Yalobama ne Bena Isalele bonso bakadisangisha hamue, bakambila Lehabama ne,

⁴Tatu webe wakanemesha mutshi wa tshikokedi wetu bujitu butambe; nunku wewe uheheshe bujitu bua mudimu eu mukole wakatuenzesha tatu webe ne mutshi wa tshikokedi wa bujitu bubi wakatutekeleye, nunku tuetu netukukuatshile mudimu.

⁵Yeye wakabambila ne, Yai, nushikame matuku asatu, hashishe nuhingane kundi kabidi. Bantu bakaya.

⁶Mukelenge Lehabama wakebesha bakulumpe bakadi bimana ne Solomo hakadiye ne muoyo ne, Nuenu nudi nungambilaku lungenyi kai lua kukudimuna bantu aba?

⁷Bobo bakamuambila ne, Biwadivuisha muntu wa bantu aba lelu eu, biwabakuatshila mudimu, biwabakudimuna mei mimpe, bobo nebikale bantu bebe tshiendelele.

⁸Kadi yeye kakitabusha lungenyi luakamuambila bakulumpe; wakebesha bansongalume bakakola nʼandi, bakadi bimana ku mpala kuandi ne,

⁹Nuenu nudi ne lungenyi kai lua kukudimuna bantu aba bakungambila ne, Uheheshe bujitu bua mutshi wa tshikokedi wakatutekela tatu webe?

¹⁰Bansongalume bakakola nʼandi bakamuambila ne, Wambile bantu aba bakukuambila ne, Tatu webe wakatunemeshila mutshi wa tshikokedi wa bujitu, kudi wewe utuebeshile bujitu bua mutshi au, ubambile nunku ne, Munu wanyi wa kantengenene neuhite tshifuka tshia tatu wanyi bunene.

¹¹Tatu wanyi wakanunemeshila mutshi wa tshikokedi wa bujitu, kadi meme nennukumbashile majitu makuabo: tatu wanyi wakamutuma ne nsokotshi, kadi meme nennukume ne tuminyiminyi.

¹²Nunku Yalobama ne Bena Isalele bonso bakahingana kudi Lehabama dituku disatu bu muakabambila mukelenge ne, Nuhingane kundi kabidi hahita matuku asatu.

¹³Mukelenge wakambila bantu mei makole, kakalonda lungenyi luakamuambila bakulumpe,

¹⁴kadi wakabambila lungenyi luakamuambila bansongalume ne, Tatu wanyi wakanunemeshila mutshi wa tshikokedi, kadi meme nennukumbashile majitu makuabo: tatu wanyi wakamutuma ne nsokotshi, kadi meme nennukume ne tuminyiminyi.

¹⁵Nunku mukelenge kakunvuila bantu: bua bualu ebu buakafuma kudi Yehowa bua kujadikeye dî diandi diakambileye Yalobama, muana wa Nebata mukana mua Ahiya, Muena Shilo.

¹⁶Hakamona Bena Isalele ne Mukelenge kakabunvuila, bantu bakandamuna ne, Tudi ne tshituha kai mu Davidi? Katuena ne buhianyi mu muana wa Yishai. Nuenu Bena Isalele nuhingane ku ntenta yenu! Nuenu Bena Davidi nudilamine nsubu yenu. Nunku Bena Isalele bakaya ku ntenta yabo.

¹⁷Kadi Lehabama wakakokesha Bena Isalele bakadi bashikama mu misoko ya Bena Yuda.

¹⁸Hashishe, mukelenge Lehabama wakatuma Adolama, wakadi ku mutu kua bena mudimu, ne Bena Isalele bakamushiha ne mabue. Mukelenge Lehabama wakabuela lubilu mu dikalu diandi, bua kunyemena ku Yelushalema.

¹⁹Nunku Bena Isalele bakatombokela ba mu nsubu wa Davidi tô ne ku didiku edi.

²⁰Hakunvua Bena Isalele bonso lumu ne, Yalobama wakahingana, bakamubikila mu disangisha diabo, bakamuvuisha mukelenge ku mutu kua Bena Isalele bonso; anu tshisamba tshia Yuda tshiakalonda ba mu nsubu wa Davidi.

²¹Hakafika Lehabama ku Yelushalema, yeye wakabikila bonso ba mu tshisamba tshia Yuda ne ba mu tshisamba tshia Benyamina, bakadi bena nvita hasungula binunu lukama ne makumi muanda mukulu, bua kuluanganabo ne Bena Isalele ne bua kuhingisha bukelenge kudi Lehabama, muana wa Solomo.

²²Kadi dî dia Nzambi diakalua kudi Shemaya, muntu wa Nzambi, ne,

²³Wambile Lehabama, muana wa Solomo, mukelenge wa Yuda, ne Bena Yuda ne Bena Benyamina bonso ne bantu badi bashala ne,

²⁴Yehowa udi wamba ne, Kanuyi bua kuluangana ne bana benu, Bena Isalele: muntu ne muntu ahingane ku nsubu kuandi, bualu ebu buakufuma anu kundi meme. Nunku kakunyua dî dia Yehowa; bakahingana mu nshila yabo bu muakadi dî dia Yehowa.

²⁵Hashishe Yalobama wakasa musoko wa Shekeme mu mikuna ya Efelayima, wakashikamamu; wakumukaku, wakasa Penuele.

²⁶Yalobama wakamba mu mutshima wandi ne, Katataka bukelenge nebuhingane kudi ba mu nsubu wa Davidi,

²⁷biaya bantu aba bua kufilabo milambu mu nsubu wa Yehowa wa mu Yelushalema, nebakudimune mitshima yabo kudi Lehabama, mukelenge wabo wa mu Yuda kabidi; nebanshihe meme, nebahingane kudi Lehabama, mukelenge wa Yuda.

²⁸Nunku mukelenge wakakeba lungenyi, wakatula tuana tua ngombe tua or tubidi; wakambila bantu ne, Budi butamba bukole bua nuenu kuya ku Yelushalema; tangilai nzambi yenu, Bena Isalele, yakanuluhula mu buloba bua Ejipitu.

²⁹Wakateka kamue mu Betele ne kakuabo mu Dana.

³⁰Bualu ebu buakalua bubi, bualu bua bantu bakaya kutendelela kamue ne kukuabo tô ne ku Dana.

³¹Wakasa bitendelelu ha mutu ha mikuna, wakasungula bakuidi munkatshi mua bantu bonso, bakadi kabayi bana ba Bena Lewi.

³²Yalobama wakabanga tshilele tshia kudia bidia bia disanka mu matuku dikumi ne atanu a ngondo wa muanda mukulu bu muakadiabo mu Yuda; yeye wakafila milambu ha tshioshelu; wakenza nunku mu Betele kabidi, wakashihela tuana tua ngombe tuakenzeye milambu; wakasungula bakuidi, wakabateka mu Betele mu bitendelelu biakenzeye ha mikuna.

³³Yeye wakafila milambu ha tshioshelu tshiakenzeye mu Betele mu matuku dikumi ne atanu a ngondo wa muanda mukulu, mu ngondo wakasunguleye mu mutshima wandi; wakasungula didiku diakadia Bena Isalele bidia bia disanka; wakosha musenga wa manananshi ha tshioshelu kabidi.