Read tshiluba 1 Bakelenge 3 Bible Online

1 Bakelenge 3 - tshiluba bible

1 Bakelenge 3

¹Solomo wakahunga tshihungidi ne Palô, mukelenge wa Ejipitu, wakangata muana mukashi wa Palô, wakalua nʼandi ku musoko wa Davidi tô ne hakashikisheye kuibaka nsubu wandi ne nsubu wa Yehowa ne lumbu luakadi lunyunguluka Yelushalema.

²Anu bualu bumue, bantu bakatshidi bashihela Nzambi nyama ha mutu ha mikuna, bualu bua nsubu wa dina dia Yehowa kakanza kubakibua matuku au.

³Solomo wakananga Yehowa, wakenda mu mikenji ya Davidi tatu wandi; kadi anu bualu bumue, yeye wakashiha nyama, wakosha musenga wa manananshi ha mutu ha mikuna.

⁴Mukelenge wakaya ku Gibeona bua kushalaku nyama, bua muaba au wakadi muaba munene. Solomo wakafilaku tshinunu tshia milambu ya kuosha ha tshioshelu atshi.

⁵Mu Gibeona Yehowa wakamueneka kudi Solomo mu tshilota butuku; Nzambi wakamuambila ne, Ulombe tshindi mua kukuha.

⁶Solomo wakamba ne, Wewe wakalesha muntu webe Davidi, tatu wanyi, luse lunene lujalame, bu muakendeye ku mesu kuebe mu bushuwa ne buakane ne mu butoke bua mutshima kûdi; wewe wakumulamina luse elu lunene lujalame bualu bua wewe wakamuha muana mulume bua kushikameye mu nkuasa wandi wa bukelenge: bualu ebu buakuenjibua lelu.

⁷Katataka, Yehowa, Nzambi wanyi, wewe wakavuisha muntu webe mukelenge mu muaba wa tatu wanyi Davidi; ndi anu bu muana mutekete, tshiena mumanye mua kuluhuka ne mua kubuela.

⁸Muntu webe udi munkatshi mua bantu bebe bawakusungula: badi bantu banene, kabena mua kubadibua bualu bua bungi buabo.

⁹Uhe muntu webe mutshima wa lungenyi bua kulumbuluila nʼau bantu bebe ne bua meme kumanya mua kujingulula hankatshi ha malu mimpe ne malu mabi: bualu bua udi mua kulumbuluila bantu bebe banene nganyi?

¹⁰Mei au akasankisha Yehowa, bualu bua Solomo wakalomba anu bualu ebu.

¹¹Nzambi wakamuambila ne, Bualu hua wewe wakuamba bualu ebu; kuakudilombela matuku a bungi, kuakudilombela bubanji, nansha mioyo ya badi nʼebe lukuna; kadi wakudilombela lungenyi lua kulumbulula nʼalu;

¹²ka nakenza bu mudi dî diebe: nakukuha mutshima muakane wa lungenyi, nunku kakuakadi muntu bu wewe diambedi ne mukuabo kena ulonda ku nyima kuebe bu wewe.

¹³Nakukuha kabidi tshiwakadi kuyi mutambe: bubanji ne butumbi; nunku munkatshi mua hakelenge kamuena muikale mukuabo bu wewe matuku ebe onso.

¹⁴Biwenda mu nshila yanyi, biwatumikila mei anyi ne mikenji yanyi bu muakenda tatu webe Davidi, nenkuleheshile matuku ebe a bungi.

¹⁵Solomo wakatabala, mona, buakadi tshilota. Wakahingana ku Yelushalema, wakimana ku mpala kua mushete wa tshihungidi tshia mei a Yehowa, wakafilaku milambu ya kuosha ha kahia, ne milambu ya kuvuisha nʼai ditalala; wakalambishila bantu bandi bonso bidia bia disanka.

¹⁶Hashishe, bakashi babidi ba masandi bakalua kudi mukelenge, bakimana ku mpala kuandi.

¹⁷Mukashi mukuabo wakamba ne, Mukelenge, meme ne mukashi eu tudi bashikame mu nsubu umue; hatuakadi nʼandi mu nsubu nakalela muana.

¹⁸Hakahita matuku asatu, meme mumane kulela, mukashi eu wakalela muana kabidi; anu tuetu babidi bakadi mu nsubu, nansha muntu mukuabo wakadi nʼetu.

¹⁹Muana wa mukashi eu wakafua butuku, bualu bua yeye wakamuikila.

²⁰Yeye wakabika mundankulu, wakangata muana wanyi wakadi mulale ha buihi nʼanyi, hakadi muntu webe mulale tulu, wakamuladika mu tshiadi; wakaladika muana wandi mufue mu tshiadi tshianyi.

²¹Hanakabika dinda dionso bua kuamusha muana wanyi mabele, nakamumona mufue; kadi hanakamutangila bilengele dinda adi, yeye kakadi muana wanyi unakalela.

²²Kadi mukashi mukuabo wakabenga ne, Nansha, muana udi ne muoyo mmuana wanyi, ne muana eu udi mufue mmuana webe. Eu wakamba ne, To, muana mufue mmuana webe, ne udi ne muoyo mmuana wanyi. Bakamba nunku ku mpala kua mukelenge.

²³Hashishe mukelenge wakamba ne, Umue wenu udi wamba ne, Eu mmuana wanyi udi ne muoyo, ne muana webe ngudi mufue; ne mukuabo udi ubenga ne, Nansha, muana webe udi mufue ne muana wanyi ngudi ne muoyo.

²⁴Mukelenge wakamba ne, Nuntuadile muele wa nvita. Bakalua ne muele wa nvita kudi mukelenge.

²⁵Mukelenge wakamba ne, Bakose muana udi ne muoyo bituha bibidi, baheshe mukashi umue tshituha tshimue ne mukuabo tshituha tshikuabo.

²⁶Hashishe mukashi, muledi wa muana wakatshidi ne muoyo, bualu bua mutshima wandi wakadi wela majie a muana wandi, wakambila mukelenge ne, Mukelenge wanyi, umuhe yeye muana udi ne muoyo, kabamushihi nansha. Kadi mukuabo wakabenga ne, Nansha, muana kikadi nansha webe nansha wanyi, bamukose anu bituha.

²⁷Hashishe mukelenge wakandamuna ne, Bahe mukashi wa ku mpala muana udi ne muoyo, kabanushihi, bualu bua yeye udi muledi wandi.

²⁸Bena Isalele bonso bakunvua lumu lua kulumbulula kua mukelenge kuakalumbululeye nʼaku, bakatamba kutshina mukelenge, bakajingulula ne, Yeye udi ne lungenyi lua Nzambi munda muandi lua kulumbululeye nʼalu.