Read tshiluba 1 Bakelenge 4 Bible Online

1 Bakelenge 4 - tshiluba bible

1 Bakelenge 4

¹Solomo wakadi mukelenge ku mutu kua Bena Isalele bonso.

²Aba mbakuatshishi bakadiye nʼabo. Azaya, muana wa Sadoka, muakuidi;

³Eleholefe ne Ahiya, bana ba Shisha, bakadi ba-secrétaire; Yehoshafata, muana wa Ahiluda, wakadi mufundi;

⁴Benaya, muana wa Yehoyada, wakadi ku mutu kua masalayi; Sadoka ne Ebeyatâ bakadi bakuidi;

⁵Azaya, muana wa Natana, wakadi ku mutu kua tuhita tuandi; Zabuda, muana wa Natana, wakadi muloho wandi manene, mulunda wa mukelenge;

⁶Alusha wakadi ku mutu kua nsubu wandi; Adonilama, muana wa Abeda, wakadi kahita ka bena mudimu.

⁷Solomo wakadi ne tuhita dikumi ne tubidi tuakadi ku mutu kua Bena Isalele bonso, tuakalongolola bia kudia biandi ne nsubu wandi; kahita ne kahita kakadi ne bualu bua kulongolola bia kudia ngondo umue ku tshidimu ku tshidimu.

⁸Au mmena atu: Bene-hû, wa ku mikuna va Efelayima;

⁹Bene-dekê, wa ku Makasa ne ku Shâlabima ne ku Bete-shemeshe ne ku Elona-bete-hanana;

¹⁰Bene-hesede, wa mu Alubota; (ne wa mu Soko ne buloba bua Hefê);

¹¹Bene-abinadaba, wa ku mikuna ya Dô; (Tafata, muana wa Solomo, wakadi mukashi wandi);

¹²Bana, muana wa Alihuda wa mu Tanaka ne mu Megido ne mu buloba buonso bua Bete-sheana budi ku luseke lua Saletana muinshi mua Yizelele ku Bete-sheana ne Abele-mehola tô ne ku Yokenama;

¹³Bene-gebê, wa mu Lamota-gilada, (wakadi ne misoko ya Yaî, muana wa Manashe, idi mu Gilada; ne buloba bua Âgoba bua mu Bashana, misoko makumi asambombo yakadi ne ngumbu ne bibi bia tshiamu tshia mitaku);

¹⁴Abinadaba, muana wa Ido wa mu Mahanayima;

¹⁵Ahimasa, wa mu Nafatale; (Basemata, muana wa Solomo, wakadi mukashi wandi);

¹⁶Bana, muana wa Hushai, wa mu Ashê ne Bealota;

¹⁷Yehoshafata, muana wa Palua, wa mu Yisakâ;

¹⁸Shimei, muana wa Ela, wa mu Benyamina;

¹⁹Gebê, muana wa Uli, wa mu buloba bua Gilada, buloba bua Sihona, mukelenge wa Bena Amole, ne bua Oga, mukelenge wa Bashana; anu yeye wakadi kahita kamue mu buloba abu.

²⁰Bena Yuda ne Bena Isalele bakadi bungi bua nsenga ya ku muelelu wa mai manene; badiadia, banuanua, basankasanka.

²¹Solomo wakakokesha makelenge onso ku musulu wa Pelata to ne ku buloba bua Bena Peleshete ne ku matshika a buloba bua Ejipitu; bakamulambula milambu, bakakuatshila Solomo mudimu tô matuku andi onso.

²²Bia kudia bia Solomo bia dituku dimue biakadi nunku: bihiminu bia bukula bua blé makumi asatu, ne bua manvua makumi asambombo,

²³ne ngombe ya manyi dikumi, ne ngombe ya mu madimi makumi abidi, ne lukama lua mikoko ha mutu ha ngulungu ne tubuluku ne ntole ne nyunyu ya manyi.

²⁴Bualu bua yeye wakakokesha bantu bonso dishiya dia munemu dia musulu wa Pelata ku Tifesa tô ne ku Gaza; wakadi ku mutu kua bakelenge bonso ba dishiya dia munemu dia musulu wa Pelata; yeye wakadi ne ditalala ku nseke yonso yakadi nunyunguluke.

²⁵Bena Yuda ne Bena Isalele bonso bakashikama talalâ, muntu ne muntu muinshi mua muonshi wandi wa tumuma tukese ne mua mutshi wandi wa nfigi, ku Dana tô ne ku Bê-sheba, matuku onso a Solomo.

²⁶Solomo wakadi ne nsubu ya tubalu tua makalu andi binunu makumi anai, ne bantu bakenda ha nyima ha tubalu binunu dikumi ne bibidi.

²⁷Tuhita atu tuakalongoluela Solomo ne bantu bonso bakadi badia ku mesa a mukelenge Solomo bia kudia, muntu mu ngondo wandi muntu mu ngondo wandi; kabakahanga tshintu tshimue nansha.

²⁸Bakalua ne orge ne mashinde bia kudisha nʼabi tubalu: muntu ne muntu bu muakadiye mutuale bujitu buandi.

²⁹Nzambi wakaha Solomo ngenyi ya bungi be ne dijingulula ditambe ne bunene bua mutshima, biakadi bungi bua nsenga ya ku muelelu wa mai manene.

³⁰Lungenyi lua Solomo luakahita lungenyi lua bantu bonso ba ku esete ne lungenyi luonso lua Bena Ejipitu.

³¹Wakahita bantu bonso lungenyi: wakahita Etenana, Muena Ezele, ne Hemana ne Kalakola ne Dâda, bana ba balume ba Mahola, lungenyi luakane; butumbi buandi buakamuangalaka bisamba bionso.

³²Yeye wakela nsumuinu binunu bisatu; misambu yandi yakadi tshinunu tshimue ne itanu.

³³Wakajingulula malu onso a mitshi yonso, ku mutshi wa cèdre wakadi ku mukuna wa Lebanona to ne mitshi ya hisopa yakadi misase tshimanu tshia nsubu; wakamba kabidi malu onso a nyama ne nyunyu ne bintu bidi bidikoka hanshi ne a minyinyi ya mu mai.

³⁴Ba mu bisamba bionso bakalua bua kunvua meji a Solomo; ba mu banfumu ba buloba, hakunvuabo lumu lua meji andi, bakulua.