Read tshiluba 1 Bakelenge 7 Bible Online

1 Bakelenge 7 - tshiluba bible

1 Bakelenge 7

¹Solomo wakibaka nsubu wandi; hakaleha bidimu dikumi ne bisatu, wakamana nsubu wandi mujima.

²Wakibaka nsubu ne mitshi ya ku Lebanona; bule buandi buakadi coudées lukama, ne butshiama buandi buakadi coudées makumi atanu, ne bule buandi bua mulu buakadi coudées makumi asatu; wakadi ne milongo inai ya makunshi a mitshi ya cèdre, ne mikamba ya mitshi ya cèdre ha mutu ha makunshi.

³Bakalamika mabaya a cèdre ha mutu ha makunshi makumi anai ne atanu: dikumi ne atanu ku mulongo ne ku mulongo.

⁴Wakadi ne biluwa bia bibi bia ha masoso a nsubu mu milongo isatu, masoso adi matangilangane mu milongo isatu.

⁵Bibi bionso ne biluwa bionso biakadi bunene bumue; ne bibi bia ha masoso biakatangilangana mu milongo isatu.

⁶Bakenza mbalanda ne makunshi: bule buandi buakadi coudées makumi atanu, butshiama buandi buakadi coudées makumi asatu; mbalanda wakadi ku mpala kuabi, makunshi ne mushiku wa mbelu biakadi ku mpala kuabi.

⁷Wakateka nkuasa wa bukelenge mu nsubu wakadi mu mbalanda, wakamulongolola bua tshilumbuluidi; wakateka mabaya a cèdre ku nseke yonso, kulu ne hanshi.

⁸Nsubu wakadiye mushikame, nsubu mukuabo wa mu mbalanda, wakadi muasa muomumue. Solomo wakibakila muana mukashi wa Palô, wakangateye bu mukashi wandi, nsubu mukuabo bu mbalanda eu.

⁹Bakibaka nsubu ei yonso ne mabue a mushinga mukole; bakayidikisha ne luidi; bakayilonda ne scies; bakenza mabue onso nunku ku makunshi a nsubu tô ne ku mutu, ne akakasha hanshi ku tshiendedi tshinene.

¹⁰Mabue a makunshi akadi manene a mushinga mukole, bunene bua makuabo buakadi coudées dikumi, ne bua makuabo buakadi coudées muanda mukulu.

¹¹Mabue a mushinga mukole masonga ku luidi ne mitshi ya cèdre biakadi ha mutu hau.

¹²Tshiendedi tshinene tshiakadi ne milongo ya mabue masonga isatu ne mulongo umue wa mitshi ya cèdre; bu tshiendedi tshia munda mua nsubu wa Yehowa ne mbalanda wa nsubu kabidi.

¹³Mukelenge Solomo wakatuma bantu, bakatua ne Hilama ku musoko wa Tulo.

¹⁴Yeye wakadi muana wa mukashi wa mu lufuila wa mu tshisamba tshia Nafatale, ne tatu wandi wakadi Muena Tulo, mutudi wa tshiamu tshia mitaku; wakadi nsenda wa lungenyi lule lua kuenza mudimu wa tshiamu tshia mitaku. Yeye wakalua kudi mukelenge Solomo, wakamuenzela mudimu wandi wonso.

¹⁵Wakenza makunshi mazole a tshiamu tshia mitaku, bule buau bua mulu buakadi coudées dikumi ne muanda mukulu; dibulungu dia tshibumba diakadi coudées dikumi ne ibidi.

¹⁶Wakenza bibuiku bia tshiamu tshia mitaku biakafulabo bibidi bia kuteka ha mutu ha makunshi; bule bua mulu bua tshibuiku tshimue buakadi coudées itanu, ne bule bua mulu bua tshikuabo buakadi coudées itanu.

¹⁷Wakajingila nkanu mifindakasha ne miluka ya kulengesha nʼai bibuiku biakadi ku mutu wa makunshi, nkanu muanda mutekete ku tshibuiku tshimue, nkanu muanda mutekete ku tshibuiku tshikuabo,

¹⁸Wakenza makunshi nunku: wakateka nkanu ei mu milongo ibidi bua kulengesha nʼai bibuiku biakadi ku mutu wa makunshi; Wakenza tshibuiku tshikuabo diatshimue.

¹⁹Bibuiku biakadi ha mutu ha makunshi ku mbalanda biakadi ne bilongo bisongahu biakadi coudées inai.

²⁰Bakenza bibuiku bikuabo ku mutu kua bibumba bia makunshi; bakenzahu mamuma a grenades nkama ibidi mu milongo minyunguluke tshibuiku tshikuabo.

²¹Wakajadika makunshi au ku mbalanda wa ntempelo; wakajadika dikunshi dia ku tshianza tshia balume, wakadidika dina ne, Yakina; wakajadika dikuabo dia ku tshianza tshia bakashi, wakadidika dina ne, Boaza.

²²Bakasonga bilongo ku mitu ya makunshi; nunku mudimu wonso wakashiha.

²³Wakenza tshiowelu tshia tshiamu tshiakafulabo bu tshijengu, bunene buatshi buakadi coudées dikumi, ne bule buatshi bua mulu buakadi coudées itanu; bulungu buatshi buakadi coudées makumi asatu.

²⁴Bakenza bifuanyikishi bia maoshi muinshi mua mubangu wa tshiowelu, makumi abidi ku coudée ne ku coudée: maoshi akadi mu milongo ibidi hakahongololabo tshiowelu.

²⁵Bakatshiteka ha nyima ha bifuanyikishi bia ngombe dikumi ne ibidi; bisatu biakadi bitangila ku node, ne bisatu biakadi bitangila ku wesete, ne bisatu biakadi bitangila ku Sude, ne bisatu biakadi bitangila ku esete: tshiowelu tshiakadi ha nyima habi ne miongo yabi yakadi muinshi muatshi.

²⁶Muhimbu watshi wakadi bu ntanta wa tshianza, wakadi mulengeshibue ne bilongo bu ku mishiku ya dikoho; tshiowelu tshiakamanya mua kûla tente ne bihiminu[4] binunu bibidi.

²⁷Wakenza bitekelu bia biowelu bia tshiamu tshia mitaku dikumi: bule bua tshitekelu tshimue buakadi coudées inai, ne butshiama buatshi buakadi coudées inai, ne bule buatshi bua mulu buakadi coudées isatu.

²⁸Bakalongolola bitekelu nunku: bakatahulula bitekelu nseke: nseke ei yakadi hankatshi ha mubangu wa ku mutu ne mubangu wa kuinshi;

²⁹bakenza bifuanyikishi bia nyama ya ntambue ne bia ngombe ne bia bakeluba ha mutu ha nseke yonso; bakenza mibangu diatshimue; bakenza bisumbu bia bilongo bilembelela muinshi mua nyama ya ntambue ne ngombe.

³⁰Bakenza makalu a tshiamu tshia mitaku anai ne milonda ya tshiamu tshia mitaku ku tshitekelu ne ku tshitekelu; bakenza bituadilu binai biakadi muinshi mua biowelu ne tshiamu tshiakafulabo, bakabilengesha ne bilongo.

³¹Bakenza disoso munda mua tshibuiku ne tshibuiku, bunene buadi buakadi coudée umue; bakalengesha ha nyima ha disoso edi bu muakenzabo bitekelu tô ne ku coudée umue ne tshituha; bakasonga bilongo ku mishiku yadi, bakaditahulula nseke inai, kabiakadi tshijengu.

³²Bakateka makalu anai muinshi mua nseke ei: milonda ya makalu yakadi mikuate mu bitekelu; bule bua mulu bua dikalu ne dikalu buakadi coudée umue ne tshituha.

³³Bakenza makalu au bu mudibo benza makalu a nvita: bakafula milonda yau ne biamu bia nkata ne tulonda tuau ne tshielelu tshia tukanu.

³⁴Bakadi ne bikuatshilu binai ku matamba anai a tshitekelu tshionso. Bikuatshilu ne tshitekelu biakadi tshintu tshimue.

³⁵Bakenza lukanu mu mutu mua tshitekelu, bunene bualu buakadi tshituha tshia coudée; mibangu ne ku mpenge biakakuatakana ku lukanu elu.

³⁶Bakasonga ha nseke ei yonso bakeluba ne nyama ya ntambue ne mabue a ngashi bu mudi muaba wabi ne bisumbu bia bilongo.

³⁷Bakenza bitekelu ebi dikumi diatshimue: bakafula tshitekelu ne tshitekelu anu ne tshiamu tshijima; buonso buabi biakadi ne luidi lumue ne tshinfuanyi tshimue.

³⁸Bakenza biowelu bia tshiamu tshia mitaku dikumi: tshiowelu tshimue tshiakadi mua kûla tente ne bihiminu makumi anai; bunene bua tshiowelu ne tshiowelu buakadi coudées inai; bakateka tshiowelu ha mutu ha bitekelu ebi dikumi.

³⁹Bakateka bitekelu bitanu ku tshianza tshia balume tshia luseke lua nsubu ne bitanu ku tshianza tshia bakashi tshia luseke lua nsubu, bakateka tshiowelu tshinene ku tshianza tshia balume tshia luseke lua nsubu, ku luseke lua ku sude-esete.

⁴⁰Hilama Wakenza biowelu ne nkasu ne bihanza. Nunku Hilama wakamana mudimu wonso wakenzeleye mukelenge Solomo mu nsubu wa Yehowa:

⁴¹makunshi au abidi, ne bibuiku biakadi ha mutu hau, ne bilongo biakalengesheye nʼabi bibuiku biakadi ha mutu ha makunshi;

⁴²ne mamuma a grenades nkama inai, bu luakasongabo milongo ya grenades ibidi ku tshibuiku ne ku tshibuiku biakadi ha mutu ha makunshi;

⁴³ne bitekelu ebi dikumi ne biowelu ebi dikumi biakadi ha bitekelu;

⁴⁴ne tshiowelu atshi tshinene, ne bifuanyikishi bia ngombe dikumi ne ibidi biakadi muinshi muatshi:

⁴⁵Bivuadi ne nkasu ne bihanza: bintu ebi bionso biakenzela Hilama mukelenge Solomo mu nsubu wa Yehowa biakadi bia tshiamu tshia mitaku.

⁴⁶Mukelenge wakafudila biamu ebi bionso mu maloba a dime a mu mpata wa Yadene, hankatshi ha Sukota ne Saletana.

⁴⁷Solomo kakidikisha majitu a biamu ebi bionso, bualu bua biakatamba bungi, nunku kabakamanya bujitu bua tshiamu tshia mitaku tshinonoka.

⁴⁸Solomo Wakenza bintu bionso biakatekeye mu nsubu wa Yehowa wakenza tshioshelu ne tshiamu tshia or, ne mesa a or a kutekahu mampa;

⁴⁹ne bitekelu bia minda biakadi bia or, bitanu ku tshianza tshia balume ne bitanu ku tshianza tshia bakashi ku mpala kua muaba wa tshijila, ne bilongo ne minda ne nkuatu biakadi bia or;

⁵⁰makoho ne lukuatu lua kujima nʼalu minda, ne bihanza ne nkutu ne malonga a kutekamu kahia biakadi bia or; ne biamu bia bibi bionso bia mu nsubu ne bia ku muaba mutambe wa tshijila biakadi bia or.

⁵¹Nunku mudimu wakenza mukelenge Solomo mu nsubu wa Yehowa wakashikishibua. Solomo wakalua ne bintu bionso biakajidila tatu wandi Davidi Nzambi, bintu bia argent ne bia or ne malonga onso, wakabiteka mu bibu tshilu bia mu nsubu wa Yehowa.