Read tshiluba 1 Bakelenge 9 Bible Online

1 Bakelenge 9 - tshiluba bible

1 Bakelenge 9

¹Hakamana Solomo nsubu wa Yehowa ne nsubu wa mukelenge ne malu onso akasua mutshima wa Solomo kuenza,

²Yehowa wakamueneka kudi Solomo tshiakabidi bu muakamuenekeye kudiye ku Gibeona.

³Yehowa wakamuambila ne, Nakunvua kulomba kuebe ne kutendekena kuebe kuwakuntendelela nʼaku; nakajidila nsubu eu uwakungashila bua kutekamu dina dianyi tshiendelele; mesu anyi ne mutshima wanyi nebikaleku tshiendelele.

⁴Ne wewe, biwenda ku mpala kuanyi bu muakenda Davidi, tatu webe, mu buimpe ne mu buakane bua mutshima wandi; biwenza mei onso anakukuambila, biwatumikila mei anyi mafunda ne mei anyi majalame;

⁵nenjadike nkuasa wa bukelenge buebe ku mutu kua Bena Isalele tshiendelele, bu munakalaya Davidi, tatu webe, hanakamuambila ne, Wewe kuena uhanga muntu wa kushikameye mu nkuasa wa bukelenge wa Isalele tshiendelele.

⁶Kadi binuabenga kundonda, nansha wewe nansha bana bebe, kanuyi nutumikila mikenji yanyi ne mei anyi binakuteka ku mpala kuenu; binuaya kukuatshila nzambi mikuabo mudimu ne bua kuyitendelela;

⁷nengumushe Bena Isalele mu buloba ebu bunakabaha; nengimashe nsubu eu unakajidila dina dianyi ku mesu kuanyi, ne Bena Isalele nebikale bu lusumuinu ne bu tshihendu munkatshi mua bantu bonso.

⁸Bikala nsubu eu bule nunku, kadi bantu bonso badi bahitaku nebakeme, nebafunkune mishiku; nebakonkangane ne, Yehowa wakenzela buloba ebu ne nsubu eu nunku bua tshinyi?

⁹Hashishe, nebakudimunangane dî kabidi ne, Bualu bua bobo bakalekela Yehowa, Nzambi wabo, nguakafuma ne bankambua babo mu Ejipitu, bakakuata nzambi mikuabo, bakayitendelela, bakayikuatshila mudimu, ka Yehowa wakatuma dikenga edi dionso kudibo.

¹⁰Hakahita bidimu makumi abidi, Solomo wakamana nsubu ibidi: nsubu wa Yehowa ne nsubu wa mukelenge.

¹¹(Hilama, mukelenge wa Tulo, wakatumina Solomo mitshi ya cèdre ne mitshi ya cyprès ne or bu muakasueye muonso), ne Solomo wakaha Hilama misoko ya mu Galela makumi abidi.

¹²Hilama wakumuka mu Tulo bua kumoneye misoko yakamuha Solomo; kayakamusakisha.

¹³Yeye wakamuebesha ne, Ei idi misoko kai iwakumpa, muanʼetu? Yeye wakayidika ne Buloba bua Kabula tô ne ku dituku edi.

¹⁴Hilama wakatumina Solomo ntalanta[5] ya or lukama ne makumi abidi.

¹⁵Bua bualu ebu mukelenge Solomo wakenzesha bantu mudimu wa kuasabo nsubu wa Yehowa ne nsubu wandi ne Milo ne lumbu lua ku Yelushalema ne Hasô ne Megido ne Gezê

¹⁶Diambedi Palo, mukelenge wa Ejipitu, wakanyenga Gezê, wakawosha ne kahia, wakashiha Bena Kanâna bakadimu, wakamua bu buhianyi kudi muanʼandi, mukashi wa Solomo.

¹⁷Nunku Solomo wakasa Gezê kabidi ne Bete-holona,

¹⁸ne Bâlata ne Tama wa mu tshihela mu buloba bua Yuda.

¹⁹Solomo wakasa misoko ya kutekelamu bintu biandi, ne ya makalu andi ne ya bantu bakabanda ha nyima ha tubalu tuandi; wakenza bu muakasueye mu Yelushalema ne mu Lebanona ne mu buloba buandi buonso.

²⁰Munkatshi mua bantu bonso bakadi bashala mu buloba Bena Amole ne Bena Hiti ne Bena Pelese ne Bena Hiwi ne Bena Yebuse kabakadi ba bisamba bia Bena Isalele.

²¹Bana ba bantu aba mene bakadi bashala mu buloba, hakahanga Bena Isalele kubashiha, Solomo wakabenzesha mudimu bu bahika bandi tô ne ku dituku edi.

²²Solomo kakabuesha Bena Isalele mu buhika kadi bobo bakadi bena nvita bandi ne bena mudimu bandi ne miloho yandi ne tupitene tuandi ne tuhita tua bena makalu andi ne tua bantu bakenda ha nyima ha tubalu tuandi.

²³Solomo wakadi ne bantu nkama itanu ne makumi atanu bakadi ku mutu kua bena mudimu bandi.

²⁴Muana mukashi wa Palô wakumuka mu musoko wa Davidi, wakabuela mu nsubu wakamuashila Solomo; hashishe yeye wakasa Milo.

²⁵Misangu isatu ku tshidimu ku tshidimu Solomo wakafila milambu ya kuosha ne ya kuvuisha bantu ditalala ha tshioshelu tshiakashileye Yehowa; wakosha musenga wa manananshi ha tshioshelu tshiakadi ku mesu kua Yehowa. Wakamana nsubu nunku.

²⁶Solomo wakenza matu a bungi mu Esione-gebê, hehi ne Elota, mu buloba bua Edome ku muelelu wa Dishiba Dikunze.

²⁷Hilama wakatuma bantu bandi bakadi ne lungenyi lua kundesha matu ha mutu ha mai manene ne bantu ba Solomo.

²⁸Bakaya ku buloba bua Ofi, bakafumaku ne biamu bia or bu bujitu bua ntalanta nkama inai ne makumi abidi; bakatua habi kudi mukelenge.