Read tshiluba 2 Bakelenge 10 Bible Online

2 Bakelenge 10 - tshiluba bible

2 Bakelenge 10

¹Ahaba wakadi ne bana balume makumi muanda mutekete mu Samalea. Yehu wakafundila bakadi ne bukokeshi mu Yizelele, bakulu bakadi badiundisha bana ba Ahaba, mikanda mu Samalea ne,

²Hafika mikanda ei kunudi, bualu bua bana balume ba mukelenge wenu batshidi nʼenu, ne nudi ne makalu ne tubalu ne musoko wa lumbu ne bintu bia nvita;

³nunku nudisunguile umue wa bana balume ba mukelenge wenu udi utamba buakane, numushikike mu nkuasa wa bukelenge wa tatu wandi, nuluile ba mu nsubu wa mukelenge wenu nvita.

⁴Kadi bobo bakatamba kutshina; bakambilangana ne, Bakelenge babidi kabakamanya mua kuimana ku mpala kuandi, nunku tuetu netuimane munyi?

⁵Nunku muntu wakadi ku mutu kua nsubu, ne wakadi ku mutu kua musoko ne bakulu bakadi badiundisha bana ba Ahaba, bakatumina Yehu dî ne, Tuetu tudi bantu bebe, netuenze bu mu dî diebe; katuena tudisunguila muntu bu mukelenge; enza muonso mûdi umona ne muimpe.

⁶Hashishe yeye wakabandila mukanda musangu muibidi, wakabambila ne, Binuikala ku luseke luanyi, binuasua kunvua dî dianyi, hashishe nutule mitu ya bana balume ba mukelenge wenu, nulue n ai kundi ku Yizelele makelela ha diba edi. Ku tshikondo atshi bana balume ba mukelenge makumi muanda mutekete bakadi ne bantu banene ba mu musoko bakadi babadiundisha.

⁷Hakafika mukanda kudibo, bakakuata bana balume ba mukelenge makumi muanda mutekete, bakabashiha, bakateka mitu yabo mu bisaka, bakamutuminayi ku Yizelele.

⁸Messager wakafika kudiye, wakamuambila ne, Bakalua ne mitu ya bana balume ba mukelenge. Yeye wakamba ne, Bayiteke bisumbu bibidi ku tshibi tshia ku musoko tô ne dinda.

⁹Hakatshiabu, yeye wakaluhuka, wakimana, wakambila bantu bonso ne, Nuenu nudi bakane; meme nakelela mukelenge wanyi tshifufu, nakamushiha; kadi wakashiha bonso aba nganyi?

¹⁰Nunku numanye bienu ne, Nansha dî dimue dia mei onso akambila Yehowa bualu bua nsubu wa Ahaba nedihone hanshi hatuhu; bualu bua Yehowa wakenza malu onso akambeye mukana mua muntu wandi Eliya.

¹¹Nunku Yehu wakashiha bonso bakashala mu nsubu wa Ahaba mu Yizelele, ne bantu bandi banene bonso, ne balunda bandi bonso ne bakuidi bandi bonso tô ne hakamushiyeye hatuhu.

¹²Wakajuka, wakumuka, wakaya ku Samalea. Hakafikeye ku nsubu wa bakoshi ba miosa ya mikoko wakadi mu nshila,

¹³Yehu wakasangila ne bana babo ne Ahazaya, mukelenge wa Yuda, wakabebesha ne, Nudi banganyi? Bakamuitaba ne, Tudi bana babo ne Ahazaya, tuyaya bua kuela bana ba mukelenge ne bana ba mukelenge mukashi muoyo.

¹⁴Yeye wakamba ne, Bakuatai ne muoyo. Bakabakuata ne muoyo, bakabashiha ku dina dia mai dia mu nsubu wa bakoshi ba miosa, bu bantu makumi anai ne babidi. Kabakashiya umue wabo.

¹⁵Hakumukeye ku muaba au, wakasangila ne Yehonadaba, muana wa Lekaba, wakadi ulua kusangakena nʼandi. Yeye wakamuela muoyo, wakamuebesha ne, Mutshima webe udi muakanangane ne mutshima wanyi bu mudi mutshima wanyi muakanangane ne mutshima webe, anyi? Yehonadaba wakamukudimuna ne, E, budi nunku. Bikalau bu nunku, unkuate ku tshianza. Yeye wakamukuata ku tshianza tshiandi, wakamubuesha mu dikalu diandi.

¹⁶Wakamuambila ne, Ulue nʼanyi, umone lukunukunu lundi nʼalu kudi Yehowa. Nunku bakamushikika mu dikalu diandi.

¹⁷Hakafikabo ku Samalea, Yehu wakashiha bonso bakashala ba Ahaba mu Samalea tô ne hakababutuleye bonso bu muakadi dî dia Yehowa diakambileye Eliya.

¹⁸Yehu wakasangisha bantu bonso diatshimue, wakabambila ne, Ahaba wakakuatshila Bâla mudimu mukese, kadi Yehu neamukuatshile mudimu wa bungi.

¹⁹Nunku mbikidilai baprofete bonso ba Bâla ne batendeledi bandi bonso ne bakuidi bandi bonso: nansha umue wabo kashadi, bualu bua bundi nʼabu mbua kufila mulambu munene kudi Bâla; yonso washala kena wikala ne muoyo. Kadi Yehu wakenza bualu ebu ne budimu bua yeye amanye mua kushiha batendeledi ba Bâla.

²⁰Yehu wakamba ne, Basungule dituku dia kujidila Bâla. Bakadisungula.

²¹Yehu wakatuma dî ku nseke yonso ya Isalele; batendeledi ba Bâla bonso bakadisangisha diatshimue, nansha umue wabo wakashala. Bakabuela mu nsubu wa Bâla: bakatamba kûsha nsubu wa Bâla tente tô ne kundekelu kuandi.

²²Wakambila mulami wa bilulu ne, Hatula bilulu bia batendeledi ba Bâla bonso. Yeye wakahatula bilulu.

²³Yehu wakabuela mu nsubu wa Bâla ne Yehonadaba, muana wa Lekaba, wakambila batendeledi ba Bâla ne, Nukebe, nutangile ne anu batendeledi ba Bâla badimu, ne kamuikadi bantu ba Yehowa.

²⁴Bakabanga kufila milambu ya kuosha ha kahia. Yehu wakadianjila kusungula bantu makumi muanda mukulu, wakabateka ha mbelu, wakabambila ne, Binualekela muntu undi mufile mu bianza bienu, meme nendombe muoyo wenu ku muoyo wandi.

²⁵Hakamanabo kufila milambu ya kuosha ha kahia, Yehu wakambila balami ne tupitene ne, Buelai, nubashihe, nansha umue kahatuki, Bakabashiha ku miele ya nvita; balami ne tupitene bakabimasha ha mbelu, bakabuela mu musoko muakadi nsubu wa Bâla.

²⁶Bakangata makunshi akadi mu nsubu wa Bâla, bakaosha mu kahia.

²⁷Bakatonkolola makunshi a mabue a Bâla hanshi, bakashimbula nsubu wa Bâla, bakamuvuisha bu diala tô ne ku dituku edi.

²⁸Nunku Yehu wakajimisha bualu bua Bâla munkatshi mua Bena Isalele.

²⁹Kadi Yehu kakabenga malu mabi onso a Yalobama, muana wa Nebata, akenzesheye Bena Isalele; wakashala ne tuana tua ngombe tua or tuakadi mu Betele ne mu Dana.

³⁰Yehowa wakambila Yehu ne, Bualu bua wewe wakuenza malu akadi mimpe ku mesu kuanyi, wakuenzela ba mu nsubu wa Ahaba malu anakasungula mu mutshima wanyi, nunku bana bebe ba balume nebashikame mu nkuasa wa bukelenge wa Isalele tô ne ku bikondo binai.

³¹Kadi Yehu kakatamba kuenda mu nshila wa mikenji ya Yehowa, Nzambi wa Isalele, ne mutshima wandi wonso; yeye kakabenga malu mabi a Yalobama akenzesheye Bena Isalele.

³²Mu matuku au Yehowa wakabanga kukehesha Bena Isalele. Hazaele wakabashiha mu nseke yonso ya Isalele:

³³ku Yadene kua ku esete ne buloba buonso bua Gilada ne bua Bena Gada ne bua Bena Lubena ne bua Bena Manashe ne ku Aloê udi mu tshibanda tshia Ânona tô ne ku Gilada ne Bashana.

³⁴Bienzedi bia Yehu bikuabo biakenzeye ne bukole buandi buonso kabiena bifunda mu mukanda wa kulondolola kua malu a bakelenge ba Isalele, anyi?

³⁵Yehu wakalala tulu ne bankambua bandi; bakamujika mu Samalea. Yehoaza, muanʼandi, wakakokesha mu muaba wandi.

³⁶Musangu wakakokesha Yehu Bena Isalele mu Samalea wakadi bidimu makumi abidi ne muanda mukulu.