Read tshiluba 2 Bakelenge 13 Bible Online

2 Bakelenge 13 - tshiluba bible

2 Bakelenge 13

¹Mu tshidimu tshia makumi abidi ne bisatu tshia bukelenge bua Yoasha, muana wa Ahazaya, mukelenge wa Yuda, Yehoaza, muana wa Yehu, wakabanga kukokesha Bena Isalele mu Samalea; wakabakokesha bidimu dikumi ne muanda mutekete.

²Wakenza malu mabi ku mesu kua Yehowa; wakalonda mu nshila wa malu mabi a Yalobama, muana wa Nebata, akenzesheye Bena Isalele; yeye kakasesukaku nansha.

³Tshiji tshia Yehowa tshiakadi kudi Bena Isalele, yeye wakabafila mu bianza bia Hazaele, mukelenge wa Sulia, ne mu bianza bia Bene-hadada, muana wa Hazaele, tô matuku abo onso.

⁴Yehoaza wakadila kudi Yehowa ne Yehowa wakamunvuila; bualu bua yeye wakatangila dikenga dia Bena Isalele diakabakengeshabo nʼadi kudi mukelenge wa Sulia.

⁵Yehowa wakabishila Bena Isalele musungidi, nunku bakahanduka mu bianza bia Bena Sulia. Bena Isalele bakashikama mu ntenta yabo bu muakenzabo diambedi,

⁶Kadi kabakumuka ku malu mabi a ba mu nsubu wa Yalobama akenzesheye Bena Isalele; batshivua bendamu. Bakashiya Bashela mu Samalea kabidi.

⁷Mukelenge wa Sulia wakashila Yehoaza anu bantu makumi atanu bakadi benda ha nyima ha tubalu, ne makalu dikumi, ne binunu dikumi bia bantu bakadi benda ku makasa; mukelenge wa Sulia wakababutula, wakabavuisha bu luhuishi lua ku tshituilu.

⁸Bienzedi bia Yehoaza bikuabo ne malu onso akenzeye ne bukole buandi kabiena bifunda mu mukanda wa kulondolola kua malu a bakelenge ba Isalele, anyi?

⁹Yehoaza wakalala tulu ne bankambua bandi, bakamujika mu Samalea; Yoasha muanʼandi wakakokesha mu muaba wandi.

¹⁰Mu tshidimu tshia makumi asatu ne muanda mutekete tshia bukelenge bua Yoasha, mukelenge wa Yuda, Yehoasha, muana wa Yehoaza, wakabanga kukokesha Bena Isalele mu Samalea; wakabakokesha bidimu dikumi ne bisambombo.

¹¹Wakenza malu mabi ku mesu kua Yehowa; yeye kakasesuka ku malu malu onso a Yalobama, muana wa Nebata, akenzesheye Bena Isalele, kadi utshivua wendamu.

¹²Bienzedi bia Yoasha bikuabo ne malu onso akenzeye ne bukole buakaluanganeye nʼabu ne Amasaya, mukelenge wa Yuda, kabiena bifunda mu mukanda wa kulondolola kua malu a bakelenge ba Isalele, anyi?

¹³Yoasha wakalala tulu ne bankambua bandi, bakamujika mu Samalea diatshimue ne bakelenge ba Isalele; Yalobama wakashikama mu nkuasa wandi wa bukelenge.

¹⁴Disama diakakuata Elisha, ne bua disama diandi wakafua. Yoasha, mukelenge wa Isalele, wakaya kumutangila, wakadila muadi, wakamba ne, Tatu wanyi, tatu wanyi, makalu a Isalele ne badi benda ha nyima ha tubalu!

¹⁵Elisha wakamuambila ne, Wangate buta ne mikete; wakangata buta ne mikete.

¹⁶Yeye wakambila mukelenge wa Isalele ne, Teka tshianza tshiebe ha buta; yeye wakatshiteka. Elisha wakateka bianza biandi ha bianza bia mukelenge.

¹⁷Yeye wakamuambila ne, Unzulula tshibi tshia ku esete; wakatshiunzulula. Hashishe Elisha wakamba ne, Ela; yeye wakela. Yeye wakamba ne, Eu mmukete wa dihita dia Yehowa, mukete wa dihitshibua dia Bena Sulia; bualu bua wewe neutahe Bena Sulia bikole mu Afeke, tô ne hawahabutula.

¹⁸Yeye wakamba kabidi ne, Wangata mikete; wakayangata. Wakambila mukelenge wa Isalele ne, Yasai mu buloba. Yeye wakasa misangu isatu, wakalekela.

¹⁹Muntu wa Nzambi wakadi nʼandi tshiji, wakamuambila ne, Wakadi ne bua kuasa misangu itanu nansha misangu isambombo; nunku wakadi kuhita Bena Sulia bukole to ne hawakababutula bonso; kadi katataka wewe neuhite Bena Sulia bukole anu misangu isatu.

²⁰Elisha wakafua, bakamujika. Ku tshibangidilu tshia tshidimu tshikuabo Bena Moaba bakalua mu bisumbu, bakahaula buloba.

²¹Hakadibo bajika muntu mukuabo, bakatangila tshisumbu tshia Bena Moaba; bakimasha tshitalu tshiandi mu lukita lua Elisha; hakalengangana tshitalu tshiandi ne mifuba ya Elisha, wakafuluka, makasa andi.

²²Hazaele, mukelenge wa Sulia, wakakengesha Bena Isalele matuku onso a Yehoaza.

²³Kadi Yehowa wakabalesha dinanga, wakabafila luse, wakabalesha kalolo, bualu bua tshihungidi tshiakahungeye ne Abalahama ne Isaka ne Yakoba, yeye wakabenga bua kubabutula, kakabihata ku mesu kuandi.

²⁴Hazaele, mukelenge wa Sulia, wakafua; Benehadada, muanʼandi, wakakokesha mu muaba wandi.

²⁵Yehoasha, muana wa Yehoaza, wakanyenga kabidi misoko mu bianza bia Bene-hadada, muana wa Hazaele, yakanyengeye mu bianza bia Yehoaza, tatu wandi, mu mata. Yoasha wakamuhita bukole misangu isatu, wakasungila misoko ya Bena Isalele.