Read tshiluba 2 Bakelenge 24 Bible Online

2 Bakelenge 24 - tshiluba bible

2 Bakelenge 24

¹Mu matuku andi Nebukadenesâ, mukelenge wa Babulona, wakalua, ne Yehoyakima wakalua muntu wandi bidimu bisatu, hashishe wakamutombokela.

²Yehowa wakamutumina bisumbu bia Bena Kasada ne Bena Sulia ne Bena Moaba ne Bena Amona bua kuluanganabo ne Bena Yuda ne bua kubabutula bu muakadi dî dia Yehowa diakabambileye mukana mua bantu bandi baprofete.

³Bualu ebu buakalua kudi Bena Yuda bu mukenji wa Yehowa bua kubumusha ku mesu kuandi bua malu mabi onso a Manashe akenzeye;

⁴ne bua mashi a bantu bakadi kabayi ne bilumbu akamatshisheye hanshi; bualu bua yeye wakûsha Yelushalema tente ne mashi a bantu bakadi kabayi ne bilumbu; nunku Yehowa wakabenga bua kubabuikidila mibi yabo.

⁵Bienzedi bikuabo bia Yehoyakima ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi?

⁶Yehoyakima wakalala tulu ne bankambua bandi; Yehoyakina, muanʼandi, wakakokesha mu muaba wandi.

⁷Mukelenge wa Ejipitu kakumuka mu buloba buandi kabidi, bualu bua mukelenge wa Babulona wakanyenga makelenge onso akadi malamate mukelenge wa Ejipitu ku kasulu ka Ejipitu tô ne ku musulu wa Pelata.

⁸Yehoyakina wakadi ne bidimu dikumi ne muanda mukulu hakabangeye kukokesha; wakakokesha mu Yelushalema ngondo isatu; dina dia mamu wandi diakadi Nehusheta, muana mukashi wa Elenatana wa mu Yelushalema.

⁹Wakenza malu mabi ku mesu kua Yehowa, bu muakenza tatu wandi mu malu andi onso.

¹⁰Mu matuku au bantu ba Nebukadenesâ, mukelenge wa Babulona, bakalua ku Yelushalema, bakatshintshimika musoko.

¹¹Nebukadenesâ, mukelenge wa Babulona, wakalua ku musoko hakadi bantu bandi batshintshimika musoko;

¹²ne Yehoyakina, mukelenge wa Yuda, ne mamu wandi ne bantu bandi ne tuhita tuandi ne tupitene tuandi bakaluhuka, bakaya kudi mukelenge wa Babulona. Mukelenge wa Babulona wakamukuata mu tshidimu tshia muanda mukulu tshia bukelenge buandi.

¹³Wakatuala bintu bimpe bionso bia mu bibutshilu bia mu nsubu wa Yehowa ne bia mu nsubu wa mukelenge; wakakosa bintu bia or bionso bituha bituha biakenza Solomo, mukelenge wa Isalele, mu ntempelo wa Yehowa, bu muakamba Yehowa.

¹⁴Wakaya ne Bena Yelushalema bonso ne baminyampala bonso ne bena bukitu banso ne bena mudimu bonso ne batudi ba biamu bu binunu dikumi bia bantu; anu bantu bakatamba buhele bakashala mu buloba.

¹⁵Bakaya ne Yehoyakina ku Babulona; ne mamu wa mukelenge ne bakashi ba mukelenge ne tupitene tuandi ne bantu bandi banene bakaya ne buonso buabo ba mu Yelushalema ku Babulona mu buhika.

¹⁶Mukelenge wa Babulona wakaya ne bena bukitu bonso bu binunu muanda mutekete ku Babulona mu buhika, ne bena mudimu ne hatudi ba biamu tshinunu ne bantu bonso bakadi ne bukole bua kuluangana mata.

¹⁷Mukelenge wa Babulona wakasungula Matanaya, muanʼabo ne tatu wa Yehoyakina, mukelenge mu muaba wandi, wakamuidika dina ne, Sedekiya.

¹⁸Sedekiya wakadi ne bidimu makumi abidi ne tshimue hakabangeye kukokesha; wakakokesha mu Yelushalema bidimu dikumi ne tshimue; dina dia mamu wandi diakadi Hamutala, muana mukashi wa Yelemiya wa mu Libena.

¹⁹Wakenza malu mabi ku mesu kua Yehowa bu muakenza Yehoyakima mu malu andi onso.

²⁰Tshiji tshia Yehowa tshiakakumbana kudi Bena Yelushalema ne kudi Bena Yuda tô ne hakumusheye bonso ku mesu kuandi. Sedekiya wakatombokela mukelenge wa Babulona.