Read tshiluba 2 Bakelenge 7 Bible Online

2 Bakelenge 7 - tshiluba bible

2 Bakelenge 7

¹Elisha wakamba ne, Unvue biebe dî dia Yehowa. Yehowa udi wamba ne, Makelela ha diba edi mene nebahane tshihiminu tshia bukula bubotesha ku nshekele umue, ne bihiminu bia bukula bua orge bibidi ku nshekele umue ku tshibi tshia ku Samalea.

²Hashishe kapitene kakadi mukelenge weyemena ku tshianza tshiandi kakambila muntu wa Nzambi ne, Biatunzuluila Yehowa bibi bia mu diulu, bualu ebu nebuikale munyi? Yeye wakamuambila ne. Mesu ebe neamone bualu ebu, kadi kuena uhidia nansha.

³Bena nsudi banai bakadi bashikame ku tshibi tshia musoko; bakambilangana ne, Tudi bashikame kunoko tô ne hatuafua bua tshinyi?

⁴Bituanua ne, Netubuele mu musoko, ka tshiole tshidiku, netufuileku; bituashikama kunoko tshianana, netufuile kabidi. Nunku tuye bietu kudi masalayi a Bena Sulia; biatusungilabo, netuikale ne muoyo; biatushihabo, netufue.

⁵Hakamba diba kubuela, bakajuka, bakaya ku tshitudilu tshia Bena Sulia; hakafikabo ku mpenge wa tshitudilu tshia Bena Sulia, kabakasanganaku muinu,

⁶Bualu bua Yehowa wakuosha Bena Sulia tshiona tshia makalu ne tubalu ne tshia masalayi a bungi; bakambilangana ne, Monai, mukelenge wa Isalele wakafuta bakelenge ba Bena Hiti ne bakelenge ba Ejipitu bua kuluanganabo nʼetu.

⁷Nunku ha kajimbuʼa buenyi, bakajuka, bakanyema, bakashiya ntenta yabo ne tubalu tuabo ne nyama yabo ya mpunda ne tshitudilu tshiabo bu muakaditshi, bakanyema bua kuhandishabo mioyo yabo.

⁸Hakafika bena nsudi aba ku mpenge wa tshitudilu, bakabuela mu ntenta, bakadia, bakanua, bakafumaku ne tshiamu tshia argent ne tshia or ne bilulu, bakaya, bakabisokoka; bakahingana, bakabuela mu ntenta mukuabo, bakangata bintu, bakabisokoka.

⁹Hashishe bakamusangana ne, Katuena tuenza bimpe, bualu bua edi ndituku dia lumu luimpe, ne tuetu tudi bahuwe. Bituajingakana tô ne hatshiabu, dikenga neditukuate; nunku tuye bietu kumanyisha ba mu nsubu wa mukelenge.

¹⁰Bakahingana, bakabikila balami ba tshibi tshia musoko, bakabambila ne, Tuetu biakafuma ku tshitudilu tshia Bena Sulia, kabakatangila muntu, katuakunvua dî dia muntu; kadi tuhalu ne nyama ya mpunda biakadi bisuikibue, ne ntenta yakashala hatuhu.

¹¹Balami ba tshibi bakela dî, bakambila ba mu nsubu wa mukelenge lumu alu.

¹²Mukelenge wakabika butuku, wakambila bantu bandi ne, Nennuambile bu muakatuenzela Bena Sulia. Badi bamanye ne, Tuetu tudi ne nzala; nunku bakumuka mu tshitudilu tshiabo, bakasokoma mu mpata, bamba ne, Haluhukabo, netubakuate ne muoyo, netubuele mu musoko.

¹³Umue wa bantu bandi wakamuambila ne, Ndi nkusengelela ne, Witabushe bua bangate tubalu tutanu tudi tushala mu musoko, bualu bua tubalu tudi bu tshisumbu tshia Bena Isalele tshidi tshishala, ludi bu tshisumbu tshia Bena Isalele tshiakadia; tubatume, batangile bualu ebu.

¹⁴Nunku bakangata makalu abidi ne tubalu, mukelenge wakatuma bantu ku nyima kua Bena Sulia ne, Yai, nutangile bualu ebu.

¹⁵Bakabihata tô ne ku Yadene; monai, nshila wakadi mûle tente ne bilulu ne bintu biakimasha Bena Sulia mu lubilu luabo. Bantu hakahingana, bakamanyisha mukelenge.

¹⁶Bantu bakaluhuka, bakahaula tshitudilu tshia Bena Sulia. Nunku bakahana tshihiminu tshia bukula bubotesha ku nshekele umue, ne bihiminu bia bukula bua orge bibidi ku nshekele umue bu muakadi dî dia Yehowa.

¹⁷Mukelenge wakasungula kapitene kakadiye weyemena ku tshianza tshiandi bua kulameye tshibi tshia musoko; bantu bakamudiata mu makasa ku tshibi; wakafua bu muakadi dî dia muntu wa Nzambi diakamuambileye hakahueka mukelenge kudiye.

¹⁸Bualu bua bakambila muntu wa Nzambi mukelenge ne, Makelela ba diba edi nebahane bihiminu bia bukula bua orge bibidi ku nshekele umue ne tshihiminu tshia bukula bubotesha ku nshekele umue ku tshibi tshia Samalea;

¹⁹kapitene kakambila muntu wa Nzambi ne, Biatunzuluila Yehowa bibi bia mu diulu bualu ebu nebuikale munyi? Elisha wakamuitaba ne, Mesu ebe neamone bualu ebu, kadi wewe kuena uhidia nansha.

²⁰Bualu buakalua nunku kudiye; bantu bakamudiata mu makasa ku tshibi, yeye wakafua.