Read tshiluba 1 Kulondolola 18 Bible Online

1 Kulondolola 18 - tshiluba bible

1 Kulondolola 18

¹Ku nyima kua malu â Davidi wakaluangana ne Bena Peleshete, wakabahita bukole, wakanyenga Gata ne misoko yakadi ha buihi mu bianza bia Bena Peleshete.

²Wakahita Bena Moaba bukole; Bena Moaba bakatua bahika ba Davidi, bakafila milambu kudiye.

³Davidi wakahita Hadadezê, mukelenge wa Zoba, bukole tô ne ku Hamata, hakayeye bua kujadika bukelenge buandi kukala kua musulu wa Pelata.

⁴Davidi wakamunyenga tshinunu tshia makalu ne bena nvita binunu muanda mutekete bakadi benda ha nyima ha tubalu ne bena nvita binunu makumi abidi bakadi benda hanshi; Davidi wakakosa tubalu tuabo tua makalu mijilu yatu ya bikono, kadi wakasungula tukuabo tuakakumbana ku makalu andi lukama.

⁵Hakafuma Bena Sulia ku Damaseke bua kukuatshishabo Hadadezê, mukelenge wa Zoba, Davidi wakashiha Bena Sulia binunu makumi abidi ne bibidi.

⁶Hashishe Davidi wakateka masalayi andi mu Damaseke wa mu Sulia; Bena Sulia bakatua bahika ba Davidi, bakafila milambu kudiye. Yehowa wakaha Davidi bakole bua kutamba bena lukuna bandi kuonso kuakayeye.

⁷Davidi wakanyenga ngabu ya or yakadi nʼai bantu ba Hadadezê, wakalua nʼai ku Yelushalema.

⁸Davidi wakanyenga biamu bia mitaku bia bungi ku Tibehata ne ku Kunu, misoko ya Hadadezê; Solomo wakatula nʼabi tshiowelu tshia tshiamu tshia mitaku ne makunshi ne mpanza ya tshiamu tshia mitaku.

⁹Hakunvua Tou, mukelenge wa Hamata, ne, Davidi wakashiha masalayi onso a Hadadezê, mukelenge wa Zoba,

¹⁰yeye wakatuma Hadolama muanʼandi mulume kudi mukelenge Davidi bua kumuela muoyo, ne bua kumuvudishileye disanka bualu bua yeye wakadi muluangane ne Hadadezê, wakamuhita bukole; bualu bua Hadadezê wakadi uluangana ne Tou; yeye wakalua ne mpanza ya mishindu yonso ya or ne ya argent ne ya tshiamu tshia mitaku.

¹¹Davidi wakabijidila kudi Yehowa ne argent ne or biakanyengeye kabidi kudi bisamba bionso: kudi Bena Edome ne kudi Bena Moaba ne kudi Bena Amona ne kudi Bena Peleshete ne kudi Bena Amaleka.

¹²Bualu bukuabo kabidi, Abishai, muana wa Seluya, wakashiha Bena Edome binunu dikumi ne muanda mukulu mu Tshibanda tshia Luehu.

¹³Wakateka masalayi mu misoko ya Edome; Bena Edome bonso bakalua bahika ba Davidi. Yehowa wakaha Davidi bukole bua kutamba bena lukuna bandi kuonso kuakayeye.

¹⁴Davidi wakakokesha Bena Isalele bonso mu kulumbulula kuimpe ne mu buakane kudi bantu bandi bonso.

¹⁵Yoaba, muana wa Seluya, wakadi ku mutu kua masalayi andi onso; Yehoshafata, muana wa Ahiluda, wakadi mufundi wa malu a tshisamba;

¹⁶Sadoka, muana wa Ahituba, ne Abimeleke, muana wa Ebeyatâ, bakadi bakuidi; Shawesha wakadi secrétaire;

¹⁷Benaya, muana wa Yehoyada, wakadi ku mutu kua Bena Kelete ne Bena Pelete; bana balume ba Davidi bakadi tuhita ha buihi ne mukelenge.