Read tshiluba 1 Kulondolola 21 Bible Online

1 Kulondolola 21 - tshiluba bible

1 Kulondolola 21

¹Satana wakimana ku mpala kua Bena Isalele, wakasonsola mutshima wa Davidi bua kubaleye Bena Isalele.

²Davidi wakambila Yoaba ne tuhita tua bantu ne, Yai bienu, nubale Bena Isalele ku Bê-sheba tô ne ku Dana; nulue kundi ne dî bua meme kumanya bungi buabo.

³Yoaba wakamba ne, Yehowa avudishe bantu bandi misangu lukama bu mudibo katataka; kadi, mukelenge wanyi, bobo kabena bantu bebe, anyi? Mukelenge wanyi udi musue bualu ebu bishi? Yeye udi musue kubuesha Bena Isalele mu bualu bubi bishi?

⁴Kadi dî dia mukelenge diakahita dî dia Yoaba bukole. Nunku Yoaba wakahatuka, wakaya ku nseke yonso ya buloba bua Isalele, Wakafika ku Yelushalema.

⁵Yoaba wakamanyisha Davidi bungi bua bantu bakabalabo. Bena Isalele bonso bakadi binunu tshinunu ne binunu lukama bakadi bena nvita; Bena Yuda bakadi binunu nkama inai ne binunu makumi muanda mutekete bakadi bena nvita.

⁶Kadi kabakabala Bena Lewi ne Bena Benyamina, bualu bua dî dia mukelenge diakatondesha Yoaba.

⁷Bualu ebu buakafikisha Nzambi munda; nunku yeye wakashiha Bena Isalele bakuabo.

⁸Davidi wakambila Nzambi ne, Nakuenza bibi hanakuenza bualu ebu; kadi katataka ndi nkusengelela ne, Ubuikidile bubi bua muntu webe; bualu bua nakuenza bualu buhote.

⁹Yehowa wakambila Gada, mumonyi wa malu wa Davidi, ne,

¹⁰Ya, Wambile Davidi ne, Yehowa udi wamba ne, Ndi nteka malu asatu ku mpala kuebe; usungule bumue buau bua meme kukuenzelabu.

¹¹Nunku Gada wakalua kudi Davidi, wakamuambila ne, Yehowa udi wamba ne, Usungule bûdi musue:

¹²bua tshiole tshikale tô bidimu bisatu; anyi bua bena lukuna bakuhite bukole ngondo isatu ne miele yabo ya nvita; anyi bua muele wa Yehowa wikale mu buloba bu tshihuhu matuku asatu, ne muanjelo wa Yehowa ashihe bantu mu nseke yonso ya buloba bua Isalele. Nunku wele meji a dî dindi mua kuikala nʼadi bua kuambila wakuntuma.

¹³Davidi wakambila Gada ne, Ndi hankatshikatshi ha malu makole, ndi nkusengelela bua meme kudishinda mu bianza bia Yehowa, bualu bua luse luandi ludi lunene; kuitabushi bua meme kudishinda mu bianza bia bantu.

¹⁴Nunku Yehowa wakatumina Bena Isalele tshihuhu; Bena Isalele binunu makumi muanda mutekete bakafua.

¹⁵Nzambi wakatuma muanjelo ku Yelushalema bua kushiheye bantu bakadimu; ne hakambeye kushiha bantu, Yehowa wakamona, wakakudimuna mutshima wandi ku bualu ebu bubi; wakambila muanjelo wa lufu ne, Kuakushika, ukande tshianza tshiebe. Muanjelo wa Yehowa wakadi wimana ku tshihehuidi tshia Ônana, Muena Yebuse.

¹⁶Davidi wakabanduluka, wakamona muanjelo wa Yehowa muimane hankatshi ha diulu ne buloba ne muele wa nvita mu tshianza tshiandi tshiolola ha mutu ha Yelushalema. Hashishe Davidi ne bakulu baluate bilulu bikayabala bakatua mpala yabo hanshi.

¹⁷Davidi wakambila Nzambi ne, Ka meme eu wakuela mukenji bua kubala bantu. Meme mene nakenza bualu ebu bubi; kadi mikoko ei, yoyi yakenza tshinyi? Yehowa, ndi nkusengelela bua tshianza tshiebe tshikale kundi ne ku nsubu wa tatu wanyi; kadi katshikadi kudi bantu bebe bua bobo bikale ne tshihuhu etshi.

¹⁸Hashishe muanjelo wa Yehowa wakelela Gada mukenji bua kuambileye Davidi, bua Davidi kuya kuashila Yehowa tshioshelu ku tshihehudi tshia Ônana, Muena Yebuse.

¹⁹Nunku Davidi wakaya ku dî dia Gada diakambeye mu dina dia Yehowa.

²⁰Ônana wakalukila, wakamona muanjelo, ne bana bandi balume banai bakadi nʼandi bakasokoma, Ônana wakadi uhehula blé.

²¹Hakalua Davidi kudi Ônana, Ônana wakamona Davidi, wakaluhuka ku tshihehudi, wakatua mpala wandi hanshi ku mpala kua Davidi.

²²Hashishe Davidi wakambila Ônana ne, Umpe muaba wa tshihehuidi etshi, bua meme kuashilahu Yehowa tshioshelu; utshimpe ku mushinga muakane bua tshihuhu etshi tshikandikibue kudi bantu.

²³Ônana wakambila Davidi ne, Utshiangate, mukelenge wanyi enze biandi malu adi mimpe ku mesu kuandi; mona, ndi nkuha ngombe ya mulambu wa kuosha ne mitshi ya mu tshihehuidi bua nkunyi ne blé bua mulambu wa bukula; ndi nkuha bionso.

²⁴Davidi wakambila Ônana ne, Nansha. Nenkuhe mushinga udi muakane; bualu bua tshiena ngangatshila Yehowa bintu biebe, tshiena nfila mulamba undi tshiyi mufidile mushinga.

²⁵Nunku Davidi wakaha Ônana nshekele[10] ya or nkama isambombo bua muaba wandi.

²⁶Davidi wakashilahu Yehowa tshioshelu, wakafilahu milambu ya kuosha ne ya kuvuisha nʼai ditalala, wakabikila dina dia Yehowa; yeye wakitaba ne kahia ka mu diulu ha mutu ha tshioshelu.

²⁷Yehowa wakela muanjelo dî; yeye wakabuesha muele wandi wa nvita mu luhuhu.

²⁸Hakamona Davidi ne, Yehowa wakitaba kundi ku tshihehudi tshia Ônana, Muena Yebuse, yeye wakafilaku milambu.

²⁹Bualu bua nsubu wa kusambakena wa Yehowa wakasabo kudi Mose mu tshihela ne tshioshelu tshiandi biakadi ku mutu kua mukuna wa Gibeona mu tshikondo atshi.

³⁰Kadi Davidi kakamanya mua kuyaku bua kuebesheye Nzambi bualu bua yeye wakadi utshina muele wa mata wa muanjelo wa Yehowa.