Read tshiluba 2 Kulondolola 10 Bible Online

2 Kulondolola 10 - tshiluba bible

2 Kulondolola 10

¹Lehabama wakaya ku Shekeme; bualu bua Bena Isalele bonso bakadisangisha ku Shekeme bua kumuhingisha mu bukelenge.

²Hakunvua Yalobama, muana wa Nebata, lumu elu (bualu bua yeye wakadi munyemene mu Ejipitu ku mesu kua Solomo), Yalobama wakahingana mufume mu Ejipitu.

³Bakamubikila; Yalobama ne Bena Isalele bonso bakalua, bakambila Lehabama ne,

⁴Tatu webe wakanvudisha mutshi wetu wa tshikokedi bujitu bukole; nunku wewe uheheshe mudimu mukole wakatukengesha nʼau tatu webe ne tshikokedi etshi tshikole tshiakatekeye mu nshingu yetu, hashishe netukukuatshile mudimu.

⁵Yeye wakabambila ne, Nuhingane hahita matuku asatu. Nunku bantu bakumuka ku mpala kuandi.

⁶Mukelenge Lehabama wakasangisha dî ne bantu banunu bakadi bimane ku mpala kua tatu wandi Solomo hakadiye ne muoyo ne, Nuenu nudi nungambile lungenyi kai lua kukudimuna nʼalu bantu aba?

⁷Bobo bakamuambila ne, Biwalesha bantu aba kalolo, biwabasankisha, biwabambila mei mimpe, bobo nebikale bena mudimu bebe tshiendelele.

⁸Kadi yeye wakalengulula dî diakamuambila bantu banunu, wakasangisha di ne bansongalume bakadi bakela nʼandi, bakadi bimana ku mpala kuandi.

⁹Yeye wakabakonka ne, Nuenu nudi nungambile lungenyi kai lua kukudimuna nʼalu bantu aba badi bangambila ne, Uheheshe tshikokedi tshiakatukengesha nʼatshi tatuʼebe?

¹⁰Bansongalume bakadi bakola nʼandi bakamuambila ne, Ukudimune bantu aba bakabambila di adi ne, Tatu webe wakatuvudisha tshikokedi tshiakanemesha bujitu, kadi wewe utuheheshetshi; wewe ubambile ne, Kantengenene kanyi nekahite tshimono tshia tatuʼanyi bunene.

¹¹Tatuʼanyi wakavudisha tshikokedi tshienu, kadi meme nenkumbashe bintu ha mutu hatshi; tatuʼanyi wakanukengesha ne nsokotshi, kadi meme nennukengeshe ne tuminyiminyi.

¹²Nunku Yalobama ne bantu bonso bakahingana kudi Lehabama hakahita matuku asatu bu muakabambila mukelenge ne, Nuhingane kundi hahita matuku asatu.

¹³Mukelenge wakabakudimuna mei makole; mukelenge Lehabama wakalengulula dî diakamuambila bantu banunu,

¹⁴wakabambila anu mei akamuyisha bansongalume ne, Tatu wanyi wakavudisha mutshi wenu wa tshikokedi bujitu, kadi meme nenkumbashe bintu ha mutu hatshi; tatu wanyi wakanukengesha ne nsokotshi, kadi meme nennukengeshe ne tuminyiminyi.

¹⁵Nunku mukelenge kakunvua dî dia bantu; bua bualu ebu buakafuma kudi Nzambi bua kujadika dî dia Yehowa diakambileye Yalobama, muana wa Nebata, mukana mua Ahiya, Muena Shiloa.

¹⁶Hakamona Bena Isalele bonso ne, Mukelenge kena witabusha dî dietu, bobo bakebesha mukelenge ne, Tuetu tudi ne luseke luetu lua bintu mu Davidi kudi kunyi? Katuena ne buhianyi buetu kudi muana wa Yishai; Bena Isalele, hinganai muntu ne muntu ku nsubu wandi wa ntenta; nuenu ba Davidi nulame nsubu yenu. Nunku Bena Isalele bonso bakahingana ku nsubu yabo ya ntenta.

¹⁷Kadi Lehabama wakakokesha Bena Isalele bakadi bashikame mu misoko ya mu Yuda.

¹⁸Hashishe Lehabama wakatuma Hadolama wakadi ku mutu kua bena mudimu, ne Bena Isalele bakamushiha ne mabue. Mukelenge Lehabama wakabuela mu dikalu diandi lukasa bua kunyemeneye ku Yelushalema.

¹⁹Nunku Bena Isalele bakutombokela ba mu nsubu wa Davidi tô ne ku dituku edi.