Read tshiluba 2 Kulondolola 12 Bible Online

2 Kulondolola 12 - tshiluba bible

2 Kulondolola 12

¹Hakadi bukelenge hua Lehabama bujadikibue bimpe, ne hakakoleye biakane, yeye wakasesuka ku mikenji ya Yehowa, ne Bena Isalele bakamulonda.

²Mu tshidimu tshitanu tshia bukelenge bua Lehabama, Shishaka, mukelenge wa Ejipitu, wakalua hua kuluisha Bena Yelushalema, bualu bua bobo bakenzela Yehowa bibi.

³Wakadi ne mikalu tshinunu ne nkama ibidi ne bantu bakadi benda ha nyima ha tubalu binunu makumi asambombo. Kabakamanya mua kubala bungi bua bantu bakuabo bakafuma nʼandi mu bululu: Bena Lubima ne Bena Sukiya ne Bena Atiopa.

⁴Yeye wakanyenga misoko ya ngumbu ya Yuda, wakafika ku Yelushalema.

⁵Hashishe Shemaya muprofete wakalua kudi Lehabama ne bantu banene ba mu Yuda, bakadi badisangisha mu Yelushalema bualu bua Shishaka, wakabambila ne, Yehowa udi wamba ne, Nuenu nuakundekela, nunku nakunushiya mu bianza bia Shishaka.

⁶Hashishe bantu banene ba mu Isalele ne mukelenge bakadihuekesha; bakamba ne. Yehowa udi muakane

⁷Hakamona Yehowa ne bobo bakadihuekesha, dî dia Yehowa diakalua kudi Shemaya kabidi ne, Bobo bakadihuekesha; tshiena mbashiha, kadi nembahandishe tshituha tshihi, tshiena mpatula tshiji tshianyi ku Yelushaluma ku tshianza tshia Shishaka.

⁸Kadi bobo nebikale bena mudimu bandi, bua bobo bamanye mudimu wanyi ne mudimu ya makelenge makuabo.

⁹Nunku Shishaka, mukelenge wa Ejipitu, wakalua bua kuluisha Bena Yelushalema wakanyenga bintu bia mu bibutshilu bia mu nsubu wa Yehowa ne bia mu nsubu wa mukelenge; wakaya nʼabi bionso; wakangata ngabu ya or yakatulabo kudi Solomo kabidi.

¹⁰Mukelenge Lehabama wakatula ngabu ya tshiamu tshia mitaku mu miaba yai, wakayiteka mu bianza bia tupitene tua balami ba bibi bia nsubu wa mukelenge.

¹¹Misangu yonso yakabuela mukelenge mu nsubu wa Yehowa tupitene tuakamema ngabu, tuakalua nʼai, hashishe tuakayihingisha mu nsubu wa bulami.

¹²Hakadihuekesheye tshiji tshia Yehowa tshiakumuka kudiye, nunku kabakamubutula; kuakadi malu makuabo numpe mu Yuda.

¹³Nunku mukelenge Lehabama wakadikolesha mu Yelushalema, wakakokesha bantu; Lehabama wakadi ne bidimu makumi anai ne tshimue hakabangeye kukokesha; wakakokesha bidimu dikumi ne muanda mutekete mu Yelushalema, musoko wakasungula Yehowa munkatshi mua bisamba bia Bena Isalele bionso bua kutekamu dina diandi; dina dia mamu wandi diakadi Nâma, Muena Amona.

¹⁴Yeye wakenza malu mabi, bualu bua yeye kakajadika mutshima wandi bua kukebeye Yehowa.

¹⁵Bienzedi bia Lehabama, bia kumudia ne bia kunshikidilu kabiena bifunda mu kulondolola kua Shemaya muprofete, ne kua Ido mumonyi wa malu, bu mudibo bafunda mikanda ya kulondolola anyi? Lehabama ne Yalobama bakadi baluangana nvita misangu yonso,

¹⁶Lehabama wakalala tulu ne bankambua bandi, bakamujika mu musoko wa Davidi; Abiya, muana wandi, wakakokesha mu muaba wandi.