Read tshiluba 2 Kulondolola 15 Bible Online

2 Kulondolola 15 - tshiluba bible

2 Kulondolola 15

¹Nyuma wa Nzambi wakatulukila Azaya, muana wa Odede;

²wakaya kusangakena ne Asa, wakamuambila ne, Unvuai, Asa ne Bena Yuda ne Bena Benyamina; Yehowa udi nʼenu, hantshidi nʼandi; binuamukeba, nenumuhete; kadi binuamulekela, yeye neanulekele.

³Bena Isalele kabakadi ne Nzambi mulelela tô musangu mule, kabakadi ne muakuidi wa kubayisha, kabakadi ne mikenji ya Nzambi;

⁴kadi mu ntatu yabo hakakudimunabo mitshima yabo kudi Yehowa, Nzambi wa Isalele, bobo bakamuheta.

⁵Mu matuku au ditalala kadiakadi kudi bakaluhuka anyi kudi bakahingana, kadi ntatu mikole yakadi kudi bena buloba bonso.

⁶Bakadi babutudibue, tshisamba kudi tshisamba tshikuabo, ne musoko kudi musoko mukuabo; bualu bua Nzambi wakabatatshisha ne ntatu yonso.

⁷Kadi nuenu nuikale ne bukole, kanutekeshi maboko enu; bualu bua nebanufute ku midimu yenu.

⁸Hakunvua Asa mei â akamuambila Odede muprofete, yeye wakakolesha mutshima wandi, wakumusha malu mabi onso akadi mu buloba bua Yuda ne Benyamina, ne mu misoko yonso yakanyengeye mu mikuna ya Efelayima; yeye wakashila kabidi tshioshelu tshia Yehowa tshiakadi ku mpala kua tshibuelelu tshia ku nsubu wa Yehowa.

⁹Yeye wakasangisha Bena Yuda ne Bena Benyamina ne bonso bakadi bashikama mu Efelayima ne Manashe ne Shimeona; bualu bua ba bungi ba mu Bena Isalele bakalamata kudiye hakamonabo ne Yehowa Nzambi wandi wakadi nʼandi.

¹⁰Nunku bakadisangisha mu Yelushalema mu ngondo muisatu wa mu tshidimu tshia dikumi ne bitanu tshia mu bukelenge bua Asa.

¹¹Bakafila milambu kudi Yehowa dituku adi ya bintu biakanyengabo, ngombe nkama muanda mutekete ne mikoko binunu muanda mutekete.

¹²Bakahunga tshihungidi bua kukebabo Yehowa, Nzambi wa bankambua babo, ne mitshima yabo yonso ne mioyo yabo yonso;

¹³bua muntu yonso wahidia kukeba Yehowa, Nzambi wa Isalele, ashihibue, nansha muntu mukese nansha muntu munene, nansha mulume nansha mukashi.

¹⁴Bakaditshiha kudi Yehowa ne mei makole, bela mbila ne mpungi ne nsengu.

¹⁵Bualu bua Bena Yuda bonso bakasanka bua tshihungidi tshiabo; bualu bua bobo bakaditshiha ne mitshima yabo yonso, bakamukeba ne dinanga diabo dionso; bobo bakamuheta; Yehowa wakabaha ditalala ku nseke yonso.

¹⁶Asa wakumusha Mâka mamu wandi mumuledi kabidi, bua yeye kikadi mukelenge mukashi, bualu bua yeye wakenza luhingu lua bundu lua kutendelela nʼalu Bashela; Asa wakashimbula luhingu luandi, wakalusunsula tuhese tukese, wakaluosha ne kahia ku musulu wa Kidilona.

¹⁷Kadi kabakumusha bitendelelu bionso biakadi ha mutu ha mikuna ya mu Isalele; kadi mutshima wa Asa wakadi muakane matuku andi onso.

¹⁸Yeye wakateka bintu biakajidila tatu wandi ne bintu biakajidileye nkayandi bia argent ne bia or ne mpanza mu nsubu wa Yehowa.

¹⁹Kabakadi ne nvita kabidi tô ne ku tshidimu tshia makumi asatu ne tshitanu tshia mu bukelenge bua Asa.