Read tshiluba 2 Kulondolola 16 Bible Online

2 Kulondolola 16 - tshiluba bible

2 Kulondolola 16

¹Mu tshidimu tshia makumi asatu ne tshisambombo tshia mu bukelenge bua Asa, Bâsha, mukelenge wa Isalele, wakaya kuluangana ne Bena Yuda; yeye wakasa Lama bua yeye ahidishe bantu bua kabahatuki ne kabahinganyi kudi Asa, mukelenge wa Yuda.

²Hashishe Asa wakangata argent ne or bia mu bibutshilu bia mu nsubu wa Yehowa ne mu nsubu wa mukelenge, wakabitumina kudi Bene-hadada, mukelenge wa Sulia, wakadi ushikama mu Damaseke, ne,

³Tshihungidi tshidi hankatshi hetu bu muakaditshi hankatshi ha tatu wanyi ne tatu webe; mona, nakakutumina argent ne or; ya biebe, ushihe tshihungidi tshiwakahunga ne Bâsha, mukelenge wa Isalele, bua yeye Umuke kundi.

⁴Bene-hadada wakitabusha dî dia mukelenge Asa, wakatuma tupitene tua masalayi andi bua kuluangana ne bena misoko ya mu Isalele; bakahaula Iyona ne Dana ne Abele-maima ne misoko ya bibutshilu bia mu Nafatale.

⁵Hakunvua Bâsha lumu elu, yeye wakalekela kuasa Lama; mudimu wakashika.

⁶Hashishe mukelenge Asa wakaya ne Bena Yuda, bakangata mabue ne mitshi biakadi ku Lama biakadi Bâsha wasa nʼabi; bobo bakasa nʼabi Geba ne Misepa.

⁷Mu tshikondo atshi Hanani, mumonyi wa malu, wakalua kudi Asa, mukelenge wa Yuda, wakamuambila ne, Bualu bua wewe wakueyemena mukelenge wa Sulia, kuakueyemena Yehowa Nzambi webe, nunku bantu ba mukelenge wa Sulia bakahanduka mu bianza biebe.

⁸Bena Atiopa ne Bena Lubima kabakadi tshisumbu tshinene ne makalu ne bena tubalu bia bungi, anyi? Kadi bualu bua wewe wakueyemena Yehowa, yeye wakabafila mu bianza biebe.

⁹Bualu bua mesu a Yehowa adi akenzekana ku nseke yonso ya buloba bua kulesha bakole buandi kudi bantu badi ne mitshima miakane kudiye. Wewe wakuenza buhote mu bualu ebu, kubangila mu dituku edi wewe newikale ne nvita.

¹⁰Ha diba adi Asa wakadi ne mumonyi wa malu tshiji, wakamubuesha mu nsubu wa lukanu; bualu bua tshiji tshikole tshiakamukuata bua bualu ebu. Asa wakakengesha bantu bakuabo mu tshikondo atshi tshiotshimue.

¹¹Monai, bienzedi bia Asa bia kumudilu ne bia kunshikidilu bidi bifunda mu mukanda wa bakelenge ba Yuda ne Isalele.

¹²Mu tshidimu tshia makumi asatu ne tshitema tshia bukelenge buandi disama diakakuata Asa ku makasa andi; disama edi diakadi dikole; kadi mu disama diandi yeye kakakeba Yehowa, kadi wakakeba bangangabuka.

¹³Asa wakalala tulu ne bankambua bandi, wakafua mu tshidimu tshia makumi anai ne tshimue tshia bukelenge buandi.

¹⁴Bakamujika mu lukita luakadiumbuileye mu musoko wa Davidi; bakamuladika ha bulalu buakadi ne bintu bia bungi bia muhuya muimpe biakalongololabo kudi bantu ba lungenyi lule; bakamuelela bintu bia bungi mu madilu andi.