Read tshiluba 2 Kulondolola 17 Bible Online

2 Kulondolola 17 - tshiluba bible

2 Kulondolola 17

¹Yehoshafata muanʼandi wakakokesha mu muaba wandi, wakadikolesha bua kuluisha Bena Isalele.

²Yeye wakateka masalayi mu misoko yonso ya ngumbu ya mu Yuda; wakateka milongo ya masalayi mu buloba bua Yuda ne mu misoko ya Efelayima yakanyenga Asa tatuʼandi.

³Yehowa wakadi ne Yehoshafata bualu bua yeye wakenda mu nshila ya diambedi ya Davidi, nkambua wandi, kakakeba nzambi ya Bâla,

⁴wakakeba Nzambi wa tatu wandi, wakatumikila mikenji yandi, kakalonda bilele bia Isalele.

⁵Nunku Yehowa wakajadika bukelenge mu bianza biandi; Bena Yuda bonso bakalua ne milambu kudi Yehoshafata; yeye wakadi ne bubanji ne butumbi bua bungi.

⁶Mutshima wandi wakakoleshibua mu nshila ya Yehowa; yeye wakumusha bitendelelu biakadi ku mutu kua mikuna ne Bashela bakadi mu Yuda.

⁷Mu tshidimu tshisatu tshia bukelenge buandi yeye wakatumina bantu bandi banene, Bene-hayila ne Obadaya ne Zekâya ne Netanele ne Mikaya bua kuyishabo mu misoko ya Yuda;

⁸wakatumina nʼabo kabidi Bena Lewi: Shemaya ne Netanya ne Zebadaya ne Asahele ne Shemilamota ne Yehonatana ne Adoniya ne Tobiya ne Toba-adoniya, mBena Lewi; ne Elishama ne Yeholama, bakuidi bakadi nʼabo.

⁹Bakayisha mu Yuda; bakadi ne mutanda wa mikenji ya Yehowa; bakaya ku misoko yonso ya Bena Yuda, bayisha bantu.

¹⁰Ditshina dia Yehowa diakakuata bantu ba mu makelenge akadi ha buihi ne Bena Yuda, nunku bobo kabakaluangana nvita ne Yehoshafata.

¹¹Bena Peleshete bakuabo bakalua ne bintu kudi Yehoshafata ne argent ya milambu; Bena Alabâ bakalua kudiye ne bimuna biabo, bimpanga binunu muanda mutekete ne nkama muanda mutekete, ne mpumbu ya mbushi binunu muanda mutekete ne nkama muanda mutekete.

¹²Butumbi bua Yehoshafata buakadiundadiunda bikole; yeye wakasa bibumba ne misoko ya bibutshilu mu Yuda.

¹³Yeye wakenza midimu ya bungi mu misoko ya Bena Yuda; wakadi ne bena nvita ba bukitu mu Yelushalema.

¹⁴Ebu mbungi buabo bu muakadi nsubu ya batatuʼabo: bua Bena Yuda, tupitene tua binunu bia bantu: Adena wakadi kapitene ne bena bukitu binunu nkama isatu bakadi nʼandi;

¹⁵ku nyima kuandi Yehohanana wakadi kapitene ne bantu binunu nkama ibidi ne makumi muanda mukulu bakadi nʼandi;

¹⁶ku nyima kuandi Amasaya, muana wa Zikeli, wakadifila kudi Yehowa; bena bukitu binunu nkama ibidi bakadi nʼandi.

¹⁷Ba mu Benyamina: Eliada, muena bukitu, ne bantu binunu nkama ibidi bakadi ne mata ne ngabu bakadi nʼandi;

¹⁸ku nyima kuandi Yehozabada ne bantu binunu lukama ne makumi muanda mukulu bakadi ne bintu bia nvita bilongolola bakadi nʼandi.

¹⁹Bantu aba bakalamata kudi mukelenge, ha mutu ha bantu bakateka mukelenge mu misoko yakadi ne ngumbu kuonso mu Yuda.