Read tshiluba 2 Kulondolola 18 Bible Online

2 Kulondolola 18 - tshiluba bible

2 Kulondolola 18

¹Yehoshafata wakadi ne bubanji ne butumbi bua bungi; wakahunga tshihungidi ne Ahaba.

²Hakahita bidimu bikuabo, yeye wakaya kudi Ahaba ku Samalea. Ahaba wakamushihela ne bantu bakadi nʼandi mikoko ne ngombe ya bungi; wakamuitabushisha bua kuyeye nʼandi ku Lamota-gilada.

³Ahaba, mukelenge wa Isalele, wakebesha Yehoshafata, mukelenge wa Yuda, ne, Wewe neuye nʼanyi ku Lamota-gilada, anyi? Yeye wakamukudimuna ne, Meme ndi bu wewe, bantu banyi badi bu bantu bebe; tuetu netuye nʼebe mu nvita.

⁴Yehoshafata wakambila mukelenge wa Isalele ne, Ndi nkusengelela ne, Udianjile kukonka dî dia Yehowa.

⁵Hashishe mukelenge wa Isalele wakasangisha baprofete nkama inai, wakabebesha ne, Tuye ku Lamota-gilada bua kuluangana nʼabo, anyi tushale? Bakamuambila ne, Uye biebe; bualu bua Nzambi neafile musoko mu bianza bia mukelenge.

⁶Kadi Yehoshafata wakakonka ne, Kakuena muprofete mukuabo wa Yehowa bua tuetu tumuebeshe, anyi?

⁷Mukelenge wa Isalele wakakudimuna Yehoshafata ne, Muprofete mukuabo udiku; kadi ndi nʼandi lukuna, bualu bua yeye katu wamba malu mimpe bualu buanyi, anu malu mabi; yeye mene udi Mikaya, muana wa Yimela. Yehoshafata wakamuambila ne, Mukelenge kambi nunku nansha.

⁸Hashishe mukelenge wa Isalele wakabikila kahita, wakamuambila ne, Ya lubilu, ubikile Mikaya, muana wa Yimela.

⁹Mukelenge wa Isalele ne Yehoshafata, mukelenge wa Yuda, bakadi bashikama, muntu mu nkuasa wandi wa bukelenge muntu mu nkuasa wandi wa bukelenge, baluate bilulu biabo bia bukelenge; bakadi bashikama mu muaba wa hatuhu ku tshibuelelu tshia ku Samalea; baprofete bonso bakadi bambangana mei ku mpala kuabo.

¹⁰Sedekiya, muana wa Kenâna, wakadidila nsengu ya tshiamu, wakamba ne, Yehowa udi wamba ne, Wewe newihate nʼai Bena Sulia tô ne habutukabo.

¹¹Baprofete bonso bakamba mei nunku ne, Uye biebe ku musoko wa Lamota-gilada, ubahite bukole; bualu bua Yehowa neaufile mu bianza bia mukelenge.

¹²Kahita kakaya kubikila Mikaya, kakamuambila ne, Mona, baprofete bonso badi bambila mukelenge mei mimpe mukana mumue; ndi nkusengelela ne, Di diebe dikale bu diabo, wambe biebe mei mimpe.

¹³Mikaya wakamba ne, Bu mudi Yehowa ne muoyo, nengambe anu mei adi Nzambi wanyi wamba.

¹⁴Hakafikeye kudi mukelenge, yeye wakamukonka ne, Mikaya, netuye ku Lamota-gilada bua kuluangana, anyi tushale? Yeye wakamuambila ne, Ya biebe, ubatambe bukole; nebafidibue mu bianza biebe.

¹⁵Mukelenge wakamuambila ne, Bundi nʼabu mbua kukudimusha misangu bungi munyi bua wewe kungambila anu malu malelela mu dina dia Yehowa?

¹⁶Yeye wakamba ne, Nakamona Bena Isalele bonso batangadishibue ha mutu ha mikuna bu mikoko idi kayiyi ne mulami; Yehowa wakamba ne, Bobo kabena ne mukokeshi, nunku bahingane muntu ne muntu ku nsubu wandi ne ditalala.

¹⁷Mukelenge wa Isalele wakambila Yehoshafata ne, Tshiakukuambila ne, Yeye katu Wamba malu mimpe bualu buanyi, kadi anu malu mabi, anyi?

¹⁸Mikaya wakamba ne, Nunku unvuai dî dia Yehowa: Nakamona Yehowa mushikame mu nkuasa wandi wa butumbi ne bonso ba mu diulu bimane ku tshianza tshiandi tshia balume ne tshia bakashi.

¹⁹Yehowa wakakonka ne, Wadinga Ahaba bua kuyeye kuhona ku Lamota-gilada nganyi? Mukuabo wakamba dî dikuabo ne mukuabo dî dikuabo.

²⁰Hashishe nyuma wakalua, wakimana ku mpala kua Yehowa, wakamba ne, Meme nemmudinge. Yehowa wakamuebesha ne, Munyi?

²¹Yeye wakamuitaba ne, Nenye, nenteke nyuma wa mashimi mukana mua baprofete bandi bonso. Yeye wakamba ne, Wewe neumudinge, neumuhite bukole; ya, wenze biebe nunku.

²²Katataka Yehowa wakumana kuteka nyuma wa mashimi mukana mua baprofete bebe aba; Yehowa wakuamba malu mabi bua bualu buebe.

²³Hashishe Sedekiya, muana wa Kenâna, wakasemena ha buihi, wakatula Mikaya dihi ku ditama diandi, wakamuebesha ne, Nyuma wa Yehowa wakaya kudi kunyi hakumukeye kundi bua kusomba nʼebe?

²⁴Mikaya wakamuambila ne, Tangila, wewe neumone bualu ebu hawabuela mu tshisokomenu bua kusokoma.

²⁵Mukelenge wa Isalele wakamba ne, Kuatai Mikaya, nuye n andi kudi Amona, gouverneur wa musoko ne kudi Yoasha, muenyampala;

²⁶nuambile gouverneur ne, Mukelenge udi wamba ne, Buesha muntu eu mu nsubu wa lukanu, umudishe bidia bia dikenga ne mai a dikenga tô ne hanahingana ne ditalala.

²⁷Mikaya wakamuambila ne, Biwahingana ne ditalala, Yehowa kakungambila di. Yeye wakamba ne, Unvuai, nuenu bantu bonso.

²⁸Nunku mukelenge wa Isalele ne Yehoshafata bakaya ku Lamota-gilada.

²⁹Mukelenge wa Isalele wakambila Yehoshafata ne, Meme nendivuishe bu muntu mukuabo hanaya mu nvita, kadi wewe uluate bilulu biebe bia mukelenge. Nunku mukelenge wa Isalele wakadivuisha bu muntu mukuabo, wakaya mu nvita.

³⁰Mukelenge wa Bena Sulia wakadianjila kuelela tupitene tua makalu andi mukenji ne, Kanuluanganyi ne bantu bakese anyi bantu banene, anu ne mukelenge wa Isalele.

³¹Hashishe bakamona tupitene tua makalu Yehoshafata, tuakambilangana ne, Kayeu mukelenge wa Isalele. Nunku tuakamunyungulula bua kuluangana nʼandi; kadi Yehoshafata wakadila kudi Yehowa, ne Yehowa wakamukuatshisha; Nzambi wakabenzesha bua bobo kumukabo kudiye.

³²Hakamona tupitene tua makalu ne, Yeye kena mukelenge wa Isalele, tuakalekela kumuihata.

³³Muntu mukuabo wakela buta buandi ku mpukahuka, wakatata mukelenge wa Isalele kuakadi bintu biandi bia nvita bituangana, nunku yeye wakambila muendeshi wa dikalu diandi ne, Usesuishe dikalu, bualu bua meme ndi mutahe mputa bikole.

³⁴Nvita yakadi minene dituku adi; kadi mukelenge wa Isalele wakatantamana mu dikalu diandi kudi Bena Sulia tô ne ku dilolo; bakamba diba kubuela, yeye wakafua.