Read tshiluba 2 Kulondolola 20 Bible Online

2 Kulondolola 20 - tshiluba bible

2 Kulondolola 20

¹Ku nyima kua malu â Bena Moaba ne Bena Amona ne Bena Meunima bakuabo bakalua kuluangana ne Yehoshafata.

²Hashishe bantu bakuabo bakalua, bakambila Yehoshafata ne, Tshisumbu tshia bantu tshinene tshidi tshilua kûdi tshifuma ku Sulia dishiya dia dishiha dia Luehu; monai, tshitshidi ku Hazazona-tamâ (udi Ene-gedi mene).

³Yehoshafata wakatshina, wakahangidisha bua kukeba Yehowa; wakela mukenji wa bantu bajile bia kudia mu nseke yonso ya Yuda.

⁴Bena Yuda bakadisangisha bua kukeba Yehowa; bakatula kukeba Yehowa, bafume ku misoko yonso ya Bena Yuda.

⁵Yehoshafata wakimanaku mpala kua tshisumbu tshia Bena Yuda ne Bena Yelushalema, mu nsubu wa Yehowa, mu tshiendedi tshihia-tshihia,

⁶wakamba ne, Yehowa, Nzambi wa hatatu betu, wewe kuena Nzambi wa mu diulu, anyi? Wewe kuena mukokeshi wa makelenge onso a ha buloba, anyi? Bukokeshi ne bukole bidi mu tshianza tshiebe, nunku kakuena muntu udi mua kukukolela.

⁷Wewe Nzambi wetu, kuakihata bena buloba aba ku mpala kua bantu bebe Bena Isalele, kuakabuha bana ba Abalahama, mulunda webe, tshiendelele, anyi?

⁸Bobo bakashikamamu, bakuashila dina diebe tshitendelelu tshia tshijila, bamba ne,

⁹Bialua malu makole kutudi, nansha muele wa nvita, nansha kulumbulula, nansha tshihuhu, nansha tshiole, tuetu netuimane ku mpala kua nsubu eu ne ku mpala kuebe, bualu bua dina diebe didi mu nsubu eu, netudile kudi mu makenga etu, ne wewe neutunvuile, neusungile.

¹⁰Katataka, mona, Bena Amona ne Bena Moaba ne ba ku mikuna ya Seî bawakakandika Bena Isalele bualu buabo ne, Kanuluanganyi nʼabo, hakadibo bafuma mu Ejipitu nunku bakasesuka kudibo, kabakabashiha;

¹¹kadi mona, mudibo batufuta, bakuluila bua kutuihata mu buhianyi buebe buwakutuha bua tuetu kubuhiana.

¹²Nzambi wetu, kuena ubalumbuluishe, anyi? Bualu bua tuetu katuena ne bukole bua kuluangana ne tshisumbu etshi tshinene tshilualua kutuluisha, katuena bamanye mua kuenza; kadi mesu etu adi kûdi.

¹³Bena Yuda bonso bakadi bimane ku mpala kua Yehowa ne bana babo bakese ne bakashi babo ne bana babo balume.

¹⁴Hashishe Nyuma wa Yehowa wakatulukila Yahaziele, muana wa Zekâya, muana wa Benaya, muana wa Yiele, muana wa Matanaya, Muena Lewi wa bana ba Asafa, munkatshi mua tshisumbu tshia bantu.

¹⁵Yeye wakamba ne, Unvuai, Bena Yuda bonso ne bonso ba mu Yelushalema, ne wewe mukelenge Yehoshafata, Yehowa udi wamba ne, Kanutshinyi, kanukemi hua tshisumbu etshi tshinene; bualu bua nvita ei kanyenu, nya Nzambi.

¹⁶Makelela nuye kudibo; monai, bobo badi baluila ku mukuna wa Sisi; nenusangakene nʼabo kunfudilu kua tshibanda, ku mpala kua tshihela tshia Yeluele.

¹⁷Kanuena ne bua kuluangana nvita ei; nudijadike, nuimane talalâ, numone luhandu lua Yehowa ludi nʼenu, nuenu Bena Yuda ne Bena Yelushalema; kanutshinyi, kanukemi; nuye kudibo hatshiabu; bualu bua Yehowa udi nʼenu.

¹⁸Yehoshafata wakinama mutu wandi hanshi ha buloba; Bena Yuda bonso ne bonso ba mu Yelushalema bakatua mpala yabo hanshi, bakatendelela Yehowa.

¹⁹Bena Lewi ne bana ba Kohata ne bana ba Kola bakajuka, bakatumbisha Yehowa, Nzambi wa Isalele ne dî dikole.

²⁰Bakabika hatshiatshia, bakaya ku tshihela tshia Tekoa; hakadibo baye, Yehoshafata wakimana, wakamba ne, Unvuai, Bena Yuda ne ba mu Yelushalema! Nueyemene Yehowa Nzambi wenu, bua nuenu nujadikibue; nuitabushe baprofete bandi, bua nuenu nuikale ne diakalengele.

²¹Hakahungeye dî ne bantu, yeye wakasungula bantu bua kuimbilabo Yehowa misambu ne bua kumutumbishabo mu buakane buandi hakadibo baye ku mpala kua bena nvita, bamba ne, Tumbishai Yehowa, bualu bua luse luandi ludi lujalame tshiendelele.

²²Hakabangabo kuimba misambu ne kutumbisha Nzambi, Yehowa wakateka balaminyi kudi Bena Amona ne kudi Bena Moaba ne ba ku mikuna ya Seî, bakaluila kuluisha Bena Yuda; bakadi bashihibue.

²³Bualu bua Bena Amona ne Bena Moaba bakimana ku mpala kua ba ku mikuna ya Seî, bua kubabutula ne kubashiha; hakashikishabo kushiha ba ku mikuna ya Seî, bakashihangana nkayabo.

²⁴Hakahita Bena Yuda ku tshibumba tshia mu tshihela, bakatangila kuakadi tshisumbu tshia bantu, monai, anu bitalu bilale hanshi ha buloba, nansha muntu wakahanduka,

²⁵Hakalua Yehoshafata ne bantu bandi bua kuhaulabo bintu, bakasangana bubanji ne bilulu bia bungi, ne bintu bia mushinga mukole biakanyengabo; kabakamanya mua kubituala; bakashalaku matuku asatu bua kuhaulabo bintu, bualu bua biakadi bia bungi.

²⁶Dituku dinai bakadisangisha mu tshibanda tshia Belaka; bualu bua bakatumbishaku Yehowa; nunku bakidika muaba au ne, Tshibanda tshia Belaka tô ne ku dituku edi,

²⁷Hashishe Bena Yuda ne ha mu Yelushalema bakahingana ku Yelushalema ne disanka, ne Yehoshafata wakadi wenda ku mpala kuabo; bualu bua Yehowa wakabayuisha disanka ku mpala kua bakadi nʼabo lukuna.

²⁸Bakalua ku Yelushalema mu nsubu wa Yehowa ne bisanji ne nzenze ne mpungi.

²⁹Ditshina dia Nzambi diakakuata ba mu bisamba bionso hakunvuabo ne, Yehowa wakaluangana nvita ne bena lukuna ba Bena Isalele.

³⁰Nunku bukelenge bua Yehoshafata buakadi ne ditalala; bualu bua Nzambi wakamuha ditalala mu nseke yonso.

³¹Yehoshafata wakakokesha mu Yuda; wakadi ne bidimu makumi asatu ne bitanu hakabangeye kukokesha; wakakokesha bidimu makumi abidi ne bitanu mu Yelushalema; bina dia mamu wandi diakadi Azuba, muana mukashi wa Shilihi.

³²Yeye wakenda mu nshila ya Asa tatuʼandi, kakasesukamu, wakenza malu akadi mimpe ku mesu kua Yehowa.

³³Kadi yeye kakumusha bitendelelu biakadi ku mutu kua mikuna; bantu bonso kabakafila mitshima yabo kudi Nzambi wa batatuʼabo.

³⁴Bienzedi bikuabo bia Yehoshafata, bia kumudilu ne bia kunshikidilu, bidi bifunda mu mukanda wa kulondolola kua Yehu, muana wa Hanani, biakafundeye mu mukanda wa bakelenge ba Isalele.

³⁵Ku nyima kua malu â, Yehoshafata, mukelenge wa Yuda, wakahunga tshihungidi ne Ahazaya, mukelenge wa Isalele, wakadi wenza malu mabi be;

³⁶wakadisangisha nʼandi hua kuasa matu a kuya nʼau ku Tâshishi; bakasa matu mu Esione-gebê.

³⁷Hashishe Eliezê, muana wa Dodawahu wa mu Malesha, wakamba dî bua Yehoshafata ne, Bualu bua wewe wakadisangisha ne Ahazaya Yehowa wakumana kushiha midimu yebe. Matu akatshibudibua, kakamanya mua kuya ku Tâshishi.