Read tshiluba 2 Kulondolola 25 Bible Online

2 Kulondolola 25 - tshiluba bible

2 Kulondolola 25

¹Amasaya wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi diakadi Yehoadana wa mu Yelushalema.

²Yeye wakenza malu mimpe ku mesu kua Yehowa, kadi kakadi ne mutshima mutoke tô.

³Hakamuhingishabo mu bukelenge, yeye wakashiha bena mudimu aba bakashiha mukelenge, tatu wandi.

⁴Kadi yeye kakashiha bana babo balela, kadi wakalonda mukenji udi mufunda mu mukanda wa Mose, muakamba Yehowa ne, Batatu kabena bafuila bana babo; bana kabena bafuila batatuʼabo; kadi muntu ne muntu neafue bua mibi yandi.

⁵Amasaya wakabikila Bena Yuda bonso, wakabasangisha bu muakadi nsubu ya batatuʼabo, wakateka tupitene ku mutu kua bantu tshinunu ne bantu lukama, mu nseke yonso ya Bena Yuda ne Bena Benyamina; yeye wakababala ku bidimu makumi abidi tô ne ku mutu, bakakumbasha bena nvita binunu nkama isatu bakamanya mua kuluangana ne mafuma ne ngabu.

⁶Yeye wakasungula bena bukitu binunu lukama ba mu Isalele ku difutu dia lukama lua ntalanta[10] ya argent.

⁷Kadi muntu wa Nzambi wakalua kudiye, wakamuambila ne, Mukelenge, kuitabushi bua Bena Isalele kuya nʼebe; bualu bua Yehowa kena ne Bena Isalele, bana bonso ba Efelayima mene.

⁸Kadi biwaya, wikale ne mutshima mukole bua kuluangana; bualu bua Nzambi neakuhoneshe ku mpala kua bena lukuna; bualu bua Nzambi udi ne bukole bua kukukuatshisha ne bua kukuhonesha nʼabu.

⁹Amasaya wakakonka muntu wa Nzambi ne, Netuenze tshinyi ne ntalanta ai lukama inakafuta Bena Isalele? Muntu wa Nzambi wakamuambila ne, Yehowa udi mua kukuha bintu bidi bihita ebi bungi.

¹⁰Hashishe Amasaya wakatahulula bantu bakalua kudiye ku Efelayima bua kubahingisha kuabo; nunku tshiji tshiabo tshiakadia kudi Bena Yuda; bakahingana kuabo bûla-ngane ne tshiji tshikole.

¹¹Amasaya wakakolesha mutshima wandi, wakaya ne bantu bandi ku Tshibanda tshia Luehu, wakashiha Bena Seî binunu dikumi.

¹²Bena Yuda bakakuata bantu bakuabo binunu dikumi ne muoyo, bakaya nʼabo ha mutu ha dibue dinene, bakabela hanshi ha mutu ha dibue, nunku bobo bakabakosolola bituha bituha.

¹³Kadi bantu aba bakahingisha Amasaya bua bobo kabayi nʼandi mu nvita, bakaluangana ne ba mu misoko ya Bena Yuda ku Samalea tô ne ku Bete-holona, bakashiha bantu binunu bisatu, bakanyenga bintu bia bungi.

¹⁴Hakafuma Amasaya ku kushiha kua Bena Edome, yeye wakalua ne mpingu ya Bena Seî, wakayimanyika bu nzambi yandi, wakakukuila ku mpala kuai, wakayoshela musenga wa manananshi.

¹⁵Nunku tshiji tshia Yehowa tshiakadi kudi Amasaya, yeye wakamutumina muprofete, wakamuambila ne, Wewe wakakeba nzambi ya bantu yakadi kayiyi ne bukole bua kusungila nʼabu bantu babo mu bianza biebe bishi?

¹⁶Hashishe, hakadiye wakula nʼandi, mukelenge wakamuebesha ne, Tuetu tuakukuvuisha mufidi wa meji wa mukelenge, anyi? Uhuwe biebe, butudi nʼabu mbua kukutaha bishi? Hashishe muprofete wakahuwa, wamba ne, Ndi mumanye ne, Nzambi wakulongolola bua kukushiha bua wewe wakuenza bualu ebu, kuena mutumikile mei anyi.

¹⁷Hashishe Amasaya, mukelenge wa Yuda, wakebesha bantu lungenyi, wakatumina Yoasha, muana wa Yehoaza, muana wa Yehu, mukelenge wa Isalele, dî ne, Lua biebe, tumonangane ku mesu.

¹⁸Yoasha, mukelenge wa Isalele, wakakudimuna dî kudi Amasaya, mukelenge wa Yuda, ne, Dieba diakadi ku Lebanona diakatumina mutshi wa cèdre wa mu Lebanona dî ne, Ufile muanʼebe mukashi kudi muanʼanyi mulume bu mukashi wandi; kadi nyama wa luonji wa mu Lebanona wakadiata dieba munda mua dikama diandi.

¹⁹Wewe udi wamba ne, Meme nakashiha Bena Edome; udi unanga tshiadi tshiebe bua kufunafuna; anji kushala kuebe. Bualu kai udi udibuesha mu malu a bakuabo bua kudikengesha ne bua kudilenduisha nʼau, wewe ne Bena Yuda?

²⁰Kadi Amasaya kakasua kumunvuila; bualu ebu buakadi bua Nzambi bua yeye kubafila mu bianza bia bena lukuna babo, bualu bua bobo bakalonda nzambi ya Bena Edome.

²¹Nunku Yoasha, mukelenge wa Isalele, wakaya; yeye ne Amasaya, mukelenge wa Yuda, bakamonangana ku mesu ku Bete-shemeshe wa ku luseke lua Yuda.

²²Bena Isalele bakahita Bena Yuda bukole; bakanyema muntu ne muntu ku nsubu wandi wa ntenta.

²³Yoasha, mukelenge wa Isalele, wakakuata Amasaya, mukelenge wa Yuda, muana wa Yoasha, muana wa Yehoaza, ku Bete-shemesha, wakalua nʼandi ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshia ku ditumba bu coudées[11] nkama inai.

²⁴Yeye wakangata or ne argent ne mpanza yonso yakadi mu nsubu wa Nzambi mu bulami bua Obeda-edome, ne bintu bia mu bibutshilu bia mu nsubu wa mukelenge, ne bantu bakuabo; wakahingana ku Samalea.

²⁵Amasaya, muana wa Yoasha, mukelenge wa Yuda, wakikala ne muoyo ku nyima kua lufu lua Yoasha, muana wa Yehoaza, mukelenge wa Isalele, bidimu dikumi ne bitanu.

²⁶Bienzedi bikuabo bia Amasaya, bia kumudilu ne bia kunshikidilu, monai, kabiena bifunda mu mukanda wa bakelenge ba Yuda ne ba Isalele, anyi?

²⁷Mu dituku diakalekela Amasaya kulonda Yehowa, bantu bakamuelela tshifufu mu Yelushalema; yeye wakanyema ku Lakisha, kadi bakamulonda ku Lakisha, bakamushihelaku.

²⁸Bakalua nʼandi ha nyima ha tubalu, bakamujika diatshimue ne bankambua bandi mu musoko wa Yuda.