Read tshiluba 2 Kulondolola 26 Bible Online

2 Kulondolola 26 - tshiluba bible

2 Kulondolola 26

¹Bantu bonso ba mu Yuda bakangata Uziya, wakadi ne bidimu dikumi ne bisambombo, bakamuhingisha mu bukelenge mu muaba wa tatuʼandi Amasaya.

²Yeye wakasa Elota, wakahingisha musoko eu ku luseke lua Yuda; ku nyima kua bualu ebu mukelenge wakalala tulu ne bankambua bandi.

³Uziya wakadi ne bidimu dikumi ne bisambombo hakabangeye kukokesha; wakakokesha mu Yelushalema bidimu makumi atanu ne bibidi. Dina dia mamu wandi diakadi Yekoliya wa mu Yelushalema.

⁴Yeye Wakenza malu mimpe ku mesu kua Yehowa, bu muakenza Amasaya tatuʼandi.

⁵Yeye wakajadika mutshima wandi bua kukebeye Nzambi mu matuku a Zekâya nguakamanya mua kujingulula bikena kumona bia Nzambi; musangu wonso wakadiye ukeba Yehowa, Nzambi wakamuvudishila diakalengele.

⁶Yeye wakaya kuluangana ne Bena Peleshete, wakashimbula ngumbu ya Gata ne ya Yabene ne ya Ashedodo; yeye wakasa misoko mikuabo mu buloba bua Ashedodo munkatshi mua Bena Peleshete.

⁷Nzambi wakamukuatshisha bua kuluanganeye ne Bena Peleshete, ne Bena Alabâ bakadi bashikama mu Gû-bâla ne Bena Meunima.

⁸Bena Amona bakalambula Uziya; lumu luandi luakamanyibua tô ne ku tshibuelelu tshia ku Ejipitu, bualu bua yeye wakalua muena bukole bua bungi.

⁹Uziya wakasa bibumba mu Yelushalema ku tshibi tshia ku ditumba dia lumbu, ne ku tshibi tshia mu tshibanda, ne ku ditumba dikuabo dia lumbu, wakatekamu bintu bia nvita.

¹⁰Yeye wakasa bibumba mu tshihela kabidi, wakimba mena a mai, bualu bua yeye wakadi ne bimuna bia bungi; Wakenza nunku mu bibanda ne mu mpata kabidi; yeye wakadi ne bidime ne balami ba mionshi ya tumuma tukese mu mikuna ne mu maloba mimpe; bualu bua yeye wakananga mudimu wa budimi,

¹¹Uziya wakadi ne bena nvita ba bungi, bakaya bua kuluangana mu bisumbu biabo bu muakabatahulula Yeiele mufundi ne Mâseya kahita, bakadi mu bianza bia Hananya, kapitene kakuabo ka mukelenge.

¹²Bungi bua bantu bakadi ku mutu kua nsubu ya batatuʼabo, bena nvita ba bukitu, buakadi binunu bibidi ne nkama isambombo.

¹³Bena nvita binunu nkama isatu ne muanda mutekete ne nkama itanu bakadi mu bianza biabo, bakadi baluangana nvita bikole, bua kukuatshisha mukelenge bua kudisheye bena lukuna bandi.

¹⁴Uziya wakabalongoluela, buonso buabo mene, ngabu ne mafuma, ne bifulu bia tshiamu ne bikowelu bia tshiamu ne mata ne mabue a kuela mu bielelu.

¹⁵Yeye wakenzesha mashine mu Yelushalema kudi bantu ba lungenyi lule, bua kuteka mu bibumba ne ha mutu ha ngumbu a kuela nʼau mikete ne mabue manene. Dina diandi diakamanyibua kuonso; bualu bua Nzambi wakamukuatshisha bikole, tô ne bakalueye muena bukole bua bungi.

¹⁶Kadi hakalueye muena bukole bua bungi yeye wakadisua mu mutshima wandi, wakenza malu mabi, wakatombokela Yehowa Nzambi wandi; bualu bua yeye wakabuela mu ntempelo wa Yehowa bua kuosheleye Yehowa musenga wa manananshi ku tshioshelu tshia manananshi.

¹⁷Azaya muakuidi wakamulonda ne bakuidi ba Yehowa makumi muanda mukulu bakadi bena bukitu;

¹⁸bobo bakakandisha Uziya mukelenge, bakamuambila ne, Uziya, kambualu buebe bua kuoshela Yehowa musenga wa manananshi, kadi mbua bakuidi, bana ba Alona, badi bajidibue bua kuoshela Yehowa manananshi; umuka mu muaba eu wa tshijila, bualu bua wewe wakuenza bibi; bualu ebu kabuena bukuvuisha butumbi kudi Yehowa Nzambi nansha.

¹⁹Hashishe Uziya wakakuata tshiji; yeye wakadi ne dilonga dia kuoshelamu musenga wa manananshi mu tshianza tshiandi; hakadiye ne bakuidi tshiji, nsudi yakahatuka ha mpala wandi ku mesu kua bakuidi mu nsubu wa Yehowa, hehi ne tshioshelu tshia musenga wa manananshi.

²⁰Azaya, muakuidi munene, ne bakuidi bonso bakamutangila ne, monai, yeye wakadi ne nsudi ha mpala handi, bakamûmusha lukasa; yeye kabidi wakahatuka lukasa, bualu bua Yehowa wakamana kumukengesha.

²¹Uziya mukelenge wakadi muena nsudi tô ne ku dituku dia lufu luandi; wakashikama mu nsubu ha nkayandi, bualu bua yeye wakadi muena nsudi; bualu bua yeye wakadi mukandibue ne, Kubuedi mu nsubu wa Yehowa; Yotama muanʼandi wakadi ha mutu ha ba mu nsubu wa mukelenge, wakakokesha bena buloba.

²²Bienzedi bikuabo bia Uziya bia kumudilu ne bia kunshikidilu, Yeshaya, muprofete, muana wa Amoza, wakabifunda.

²³Nunku Uziya wakalala tulu ne bankambua bandi; bakamujika diatshimue ne bankambua bandi mu muaba udibo bajika bakelenge, bualu bua bakamba ne, Yeye udi muena nsudi; Yotama muanʼandi wakakokesha mu muaba wandi.