Read tshiluba 2 Kulondolola 28 Bible Online

2 Kulondolola 28 - tshiluba bible

2 Kulondolola 28

¹Ahaza wakadi ne bidimu makumi abidi hakabangeye kukokesha; wakakokesha mu Yelushalema bidimu dikumi ne bisambombo; yeye kakenza malu mimpe ku mesu kua Yehowa bu muakenza Davidi nkambua wandi.

²Kadi yeye wakenda mu nshila ya bakelenge ba Isalele; wakadidila Bala mpingu ya biamu kabidi.

³Yeye wakosha musenga wa manananshi mu tshibanda tshia muana wa Hinoma kabidi; wakosha bana bandi mu kahia, bu muakadi tshilele tshibi tshia bisamba biakadi Yehowa muihate ku mpala kua Bena Isalele.

⁴Yeye wakafila milambu, wakosha musenga wa manananshi ha mutu ha mikuna ne muinshi mua mitshi mibishi yonso.

⁵Nunku Yehowa Nzambi wandi wakamufila mu bianza bia mukelenge wa Sulia; bakamubutula, bakaya ne bantu bandi ba bungi mu buhika ku Damaseke. Yeye wakafidibua mu bianza bia mukelenge wa Isalele; bakashiha bantu bandi ba bungi.

⁶Peka, muana wa Lemalaya, wakashiha bantu binunu lukama ne makumi abidi mu Yuda dituku dimue, buonso buabo bakadi bena bukitu; bualu bua bobo bakahidia Yehowa, Nzambi wa bankambua babo.

⁷Zikeli, muntu mukole wa mu Efelayima, wakashiha Mâseya, muana wa mukelenge, ne Azelikama, mukokeshi wa nsubu wandi, ne Elekana, muenyampala wa mukelenge.

⁸Bena Isalele bakaya ne bana babo binunu nkama ibidi ne bakashi ne bana babo balume ne bana babo bakashi mu buhika; bakanyenga bintu biabo bia bungi kabidi, bakaya nʼabi ku Samalea.

⁹Kadi muprofete wa Yehowa wakadiku, dina diandi Odede; yeye wakaya kusangakena ne tshisumbu tshia bantu bakadi bahingana ku Samalea, wakabambila ne, Monai, bualu bua Yehowa, Nzambi wa bankambua benu, wakadi ne Bena Yuda tshiji, yeye wakabafila mu bianza bienu, nuenu nuakabashiha ne tshiji tshikole tshiakafika tô ne mu diulu.

¹⁰Katataka nudi basue kubuesha Bena Yuda ne ba mu Yelushalema bu bahika benu bakashi ne balume; kadi nuenu kanuakenzela Yehowa Nzambi wenu bibi, anyi?

¹¹Nunku unvuai dî dianyi, nuhingishe bahika aba banuakukuata kudi bana benu; bualu bua tshiji tshikole tshia Yehowa tshidi kunudi.

¹²Hashishe bantu bakuabo bakadi ku mutu kua Bena Efelayima, Azaya, muana wa Yohanana, ne Belekiya, muana wa Meshilemota, ne Yehizikiya, muana wa Shaluma, ne Amasa, muana wa Hadelai, bakimana ku mpala kua bantu bakadi bafuma ku nvita.

¹³Bakabambila m, Kanuena nuhitaku ne bantu banuakukuata mu nvita; bualu bua nudi nukeba kutubuesha mu malu mabi kudi Yehowa ha mutu ha mibi yetu ne malu mabi etu; bualu bua mibi yetu idi minene, ne tshiji tshikole tshidi kudi Bena Isalele.

¹⁴Nunku bena nvita bakashiya bantu bakakuatabo ne bintu biakanyengabo ku mpala kua bantu aba banene ne tshisumbu tshia bantu.

¹⁵Bantu aba batuakutela mena abo bakajuka, bakangata bantu aba bakakuatabo ne bilulu biakanyengabo, bakabiluatshisha bonso bakadi butaka munkatshi muabo, bakabuesha bisabatu ku makasa abo, bakabadisha, bakabanuisha mai, bakabela manyi ha mutu, bakashikika bantu batekete ha nyima ha nyama ya mpunda, bakaya nʼabo ku Yeleko, musoko wa mabue a ngashi, kudi bana babo; hashishe, bakahingana ku Samalea.

¹⁶Ku tshikondo atshi mukelenge Ahaza wakatumina mukelenge wa Bena Ashû dî bua yeye kunukuatshisha.

¹⁷Bualu bua Bena Edome bakadi balue kabidi, bakadi babutule Bena Yuda, bakadi baye ne bakuabo babo mu buhika.

¹⁸Bena Peleshete kabidi bakadi bahaule misoko ya mu bibanda ne ku luseke lua ku Sude kua Yuda, bakadi banyenge Bete-shemeshe ne Ayalona ne Gedelote ne Soko ne misoko yandi, ne Timena ne misoko yandi, ne Gimezo ne misoko yandi; bakashikamamu.

¹⁹Bualu bua Yehowa wakahuekesha Bena Yuda bualu bua Ahaza, mukelenge wa Isalele, bualu bua yeye wakalekela kukandika Bena Yuda, wakenzela Yehowa bibi.

²⁰Tilegata-pilenese, mukelenge wa Ashû, wakalua kudiye, wakamutatshisha, kakamukuatshisha nansha.

²¹Bualu bua Ahaza wakangata bintu bia mu nsubu wa Yehowa ne bia mu nsubu wa mukelenge ne bia mu nsubu ya bantu banene, wakabifila kudi mukelenge wa Ashû, kadi bualu ebu kabuakamukuatshisha.

²²Ahaza, mukelenge eu mene, wakatamba kuenzela Yehowa bibi mu matuku a ntatu yandi.

²³Bualu bua yeye wakashihela nzambi ya mu Damaseke yakamubutula milambu; yeye wakamba ne, Bualu bua nzambi ya Bena Sulia yakabatatshisha, nunku nenyishihele milambu bua yoyo kukuatshisha meme. Kadi yoyo yakamulenduisha ne Bena Isalele bonso.

²⁴Ahaza wakasangisha mpanza yonso yakadi mu nsubu wa Nzambi, wakataha mpanza ya mu nsubu wa Nzambi bituha bituha, wakinshila bibi bia ku nsubu wa Yehowa; wakashila bioshelu mu miaba yonso ya mu Yelushalema.

²⁵Yeye wakasa bioshelu bia ku mutu kua mikuna mu misoko yonso ya Yuda bua kuoshelahu musenga wa manananshi bua kufuisha Yehowa, Nzambi wa bankambua bandi, tshiji.

²⁶Bienzedi biandi bikuabo ne malu andi onso, bia kumudilu ne bia kunshikidilu, bidi bifunda mu mukanda wa bakelenge ba Yuda ne ba Isalele.

²⁷Ahaza wakalala tulu ne bankambua bandi, bakamujika mu musoko wa Yelushalema mene; kadi kabakamujika mu nkita ya bakelenge ba Isalele; Hezikiya muanʼandi wakakokesha mu muaba wandi.