Read tshiluba 2 Kulondolola 33 Bible Online

2 Kulondolola 33 - tshiluba bible

2 Kulondolola 33

¹Manashe wakadi ne bidimu dikumi ne bibidi hakabangeye kukokesha; wakakokesha mu Yelushalema bidimu makumi atanu ne bitanu.

²Wakenza malu mabi ku mesu kua Yehowa bu muakenza bisamba biakalonda malu a bundu, biakadi Yehowa muihate ku mpala kua Bena Isalele.

³Bualu bua yeye wakasa kabidi bioshelu ha mutu ha mikuna biakashimbula Hezikiya tatuʼandi; wakashila Bâla bioshelu, wakakuna mitshi ya Bashela, wakatendelela bintu bia mu diulu, wakabikuatshila mudimu.

⁴Yeye wakasa bioshelu mu nsubu wa Yehowa, muakadi Yehowa wamba ne, Dina dianyi nedikale mu Yelushalema tshiendelele.

⁵Wakashila bintu bionso bia mu diulu bioshelu mu biendedi bibidi bia mu nsubu wa Yehowa.

⁶Yeye wakahitshisha bana bandi mu kahia mu tshibanda tshia muana wa Hinoma; wakatempa matempu, wakatendelela bakishi, wakahaka manga, wakasangisha dî ne batempeshanganyi ba mbuku ne bena buloshi; yeye wakenza malu mabi a bungi ku mesu kua Yehowa bua kumufuisha nʼau tshiji.

⁷Yeye wakateka luhingu luakasongeye mu nsubu wa Nzambi, muakadi Nzambi wamhila Davidi ne Solomo muanʼandi ne, Nenteke dina dianyi mu nsubu eu wa mu Yelushalema unakasungula munkatshi mua bisamba bionso bia mu Isalele, nentekemu dina dianyi tshiendelele.

⁸Tshiena ngumusha makasa a Bena Isalele ku buloba bunakaha bankambua babo, biatumikilabo mei onso anakabambila, mikenji ne mei mafunda ne mei majalame binakabambila mukana mua Mose.

⁹Manashe wakibidisha Bena Yuda ne ba mu Yelushalema bua kuenzabo malu mabi; nunku bakahita bantu ba mu bisamba biakashihabo kudi Yehowa ku mpala kua Bena Isalele kuenza malu mabi.

¹⁰Yehowa wakambila Manashe ne bantu bandi dî diandi; kadi bobo bakamuhetula.

¹¹Nunku Yehowa wakatuma tupitene tua masalayi a mukelenge wa Ashû kudibo, bakakuata Manashe, bakamusuika nkanu, bakaya nʼandi ku Babulona.

¹²Hakadiye mu ntatu nunku yeye wakakeba Yehowa Nzambi wandi, wakatamba kudihuekesha ku mesu kua Nzambi wa bankambua bandi.

¹³Wakamutendelela; Nzambi wakamunvuila, wakitabusha kutendekena kuandi, wakamuhingisha ku Yelushalema mu bukelenge buandi kabidi. Hashishe Manashe wakamanya ne, Yehowa udi Nzambi.

¹⁴Ku nyima kua bualu ebu yeye wakasa lumbu luakadi ku mpenge kua musoko wa Davidi ku luseke lua ku wesete kua Gihona, mu tshibanda, tô ne ku tshibuelelu tshia bahanyishi ba minyinyi ya mu mai; wakanyunguluka nʼalu Ofele, wakalulungakasha tô ne kulu; wakateka tupitene tua bukitu mu misoko yonso ya Yuda yakadi ne ngumbu.

¹⁵Yeye wakumusha nzambi ya bende ne luhingu luakatekeye mu nsubu wa Yehowa, ne bioshelu biakaseye ku mukuna kuakadi nsubu wa Yehowa ne mu Yelushalema, wakabimasha ku mpenge kua musoko.

¹⁶Yeye wakalongolola tshioshelu tshia Yehowa, wakafilahu milambu ya kuosha ne ya kuvuisha nʼai ditalala ne ya kusakidila nʼai Nzambi; wakelela Bena Yuda mukenji bua bobo batendelele Yehowa, Nzambi wa Isalele.

¹⁷Kadi bantu bakatshidi bashiha milambu ha mutu ha mikuna, kadi bakayishihela anu Yehowa Nzambi wabo.

¹⁸Bienzedi bikuabo bia Manashe ne mei akalombeye nʼau Nzambi, ne mei akamuambila bamonyi ba malu mu dina dia Yehowa, Nzambi wa Isalele, monai, bidi bifunda mu mukanda wa bienzedi bia bakelenge ba Isalele.

¹⁹Mei akalombeye nʼau Nzambi bakitabusha Nzambi kutendekena kuandi, ne malu mabi onso akenzeye, ne ditomboka diandi, ne bioshelu biakaseye ha mutu ha mikuna, ne mitshi ya Bashela yakakuneye, ne mpingu yakasongeye diambedi yeye kayi muanji kudihuekesha, monai, bidi bifunda mu mukanda wa bamonyi ba malu.

²⁰Nunku Manashe wakalala tulu ne bankambua bandi, bakamujika mu nsubu muandi; Amona muanʼandi wakakokesha mu muaba wandi.

²¹Amona wakadi ne bidimu makumi abidi ne bibidi hakabangeye kukokesha; wakakokesha mu Yelushalema bidimu bibidi.

²²Wakenza malu mabi ku mesu kua Yehowa bu muakenza Manashe tatuʼandi; Amona wakashihela mpingu yonso yakasonga tatuʼandi milambu, wakayikuatshila mudimu.

²³Yeye kakadihuekesha ku mesu kua Yehowa bu muakenza Manashe tatu wandi hakadihuekesheye; kadi Amona eu wakatamba kuenzenza malu mabi.

²⁴Bantu bandi mene bakamuelela tshifufu, bakamushiha mu nsubu wandi.

²⁵Kadi bena buloba bakashiha bantu aba bakelela Amona tshifufu; bena buloba bakahingisha Yoshiya muanʼandi mu bukelenge mu muaba wandi.