Read tshiluba 2 Kulondolola 34 Bible Online

2 Kulondolola 34 - tshiluba bible

2 Kulondolola 34

¹Yoshiya wakadi ne bidimu muanda mukulu hakabangeye kukokesha; wakakokesha mu Yelushalema bidimu makumi asatu ne tshimue.

²Wakenza malu mimpe ku mesu kua Yehowa, wakenda mu nshila ya Davidi, nkambua wandi; yeye kakasesuka ku tshianza tshia balume anyi ku tshianza tshia bakashi.

³Bualu bua mu tshidimu tshia muanda mukulu tshia bukelenge buandi, hakatshidiye muana, yeye wakabanga kukeba Yehowa, Nzambi wa Davidi, nkambua wandi; mu tshidimu tshia dikumi ne bibidi yeye wakabanga kumusha bioshelu biakadi ha mutu ha mikuna ne mitshi ya Bashela ne mpingu yakasongabo ne mpingu yakatulabo mu Yuda ne Yelushalema.

⁴Bakashimbula bioshelu bia Bâla ku mesu kuandi; yeye wakataha mpingu yakatendelelabo nʼai diba yakadi ha mutu ha mikuna ne mitshi ya Bashela ne mpingu yakasongabo ne mpingu yakatulabo, yeye wakabitshibula bituha bituha, wakabivuisha bu lusenga, wakalumuangalasha ha nkita ya bantu bakadi babishihela milambu.

⁵Yeye wakosha mifuba ya bakuidi ha bioshelu biabo, wakalengesha Yuda ne Yelushalema.

⁶Wakenza nunku mu misoko ya Manashe ne Efelayima ne Shimeona tô ne ku Nafatale, wakabibutula.

⁷Wakashimbula bioshelu, wakabotesha Bashela ne mpingu bu bukula; wakataha mpingu yakadibo batendelela nʼai diba mu nseke yonso ya buloba bua Isalele, wakahingana ku Yelushalema.

⁸Mu tshidimu tshia dikumi ne muanda mukulu tshia bukelenge buandi hakamaneye kulengesha buloba ne nsubu, yeye wakatuma Shafana, muana wa Azalaya, ne Mâseya, mukelenge wa musoko, ne Yoa, muana wa Yoahaza mufundi wa malu a bukelenge, bua kulongololabo nsubu wa Yehowa Nzambi wandi.

⁹Bakafika kudi Hilekiya muakuidi munene, bakafila kudiye argent yakaya nʼai Bena Lewi, balami ba ku bibuelelu, yakasangishabo ku bianza bia Bena Manashe ne Bena Efelayima ne kudi difuka dia Bena Isalele ne Bena Yuda ne Bena Benyamina ne bonso ba mu Yelushalema mu nsubu wa Nzambi.

¹⁰Bakayifila mu bianza bia bena mudimu bakadi ku mutu kua nsubu wa Yehowa; bena mudimu bakadi mu nsubu wa Yehowa bakayifila kudi balongolodi ba nsubu:

¹¹kudi bena mabaya ne kudi bibaki bua kusumba nʼai mabue masonga ne mabaya a mikamba ne a kusuika nʼau bintu bia nsubu yakashihabo kudi bakelenge ba Yuda.

¹²Bantu aba bakenza mudimu ne disuminyina; Yahata ne Obadaya, Bena Lewi bana ba Melali, bakadi tuhita ku mutu kuabo; Zekâya ne Meshulama, bana ba Bena Kohata, bakenzesha mudimu; Bena Lewi bakuabo bakadiku bakadi bamanye mua kuimba bimpe.

¹³Bobo kabidi bakadi ku mutu kua batuadishi ba majitu, bakenzesha bena midimu bonso mu mudimu wa mushindu wonso, Bena Lewi bakadi bafundi ne tuhita ne batuadishi ba bintu.

¹⁴Hakaluabo ne argent mu nsubu wa Yehowa, Hilekiya muakuidi wakasangana mukanda wa mikenji wakafundabo kudi Mose.

¹⁵Hilekiya wakambila Shafana secrétaire ne, Nakusangana mukanda wa mikenji wa Mose mu nsubu wa Yehowa. Hilekiya wakafila mukanda kudi Shafana.

¹⁶Shafana wakaya ne mukanda kudi mukelenge, wakamanyisha mukelenge kabidi ne, Bantu bebe badi benza malu onso awakatuambila.

¹⁷Tuakuangata argent yonso yakadi mu nsubu wa Yehowa, tuakuyifila mu bianza bia tuhita ne mu bianza bia bena mudimu.

¹⁸Shafana secrétaire wakambila mukelenge ne, Hilekiya muakuidi wakumpa mukanda.

¹⁹Shafana wakaubala ku mpala kua mukelenge. Hashishe, hakunvua mukelenge mei a mu mikenji, yeye wikadihanda bilulu biandi.

²⁰Mukelenge wakambila Hilekiya ne Ahikama, muana wa Shafana, ne Abidona, muana wa Mika, ne Shafana secrétaire, ne Asaya, muena mudimu wa mukelenge, ne,

²¹Yai bienu, nunkonkele Yehowa ne bantu badi bashala mu Isalele ne Yuda bua mei adi mu mukanda eu unuakasangana; bualu bua tshiji tshikole tshia Yehowa tshidi kutudi bualu bua batatuʼetu kabakatumikila mei a Yehowa bua kuenza malu onso adi mafunda mu mukanda eu.

²²Nunku Hilekiya ne bantu bakabikilabo kudi mukelenge bakaya kudi Huleda muprofete mukashi, mukashi wa Shaluma, muana wa Tokata, muana wa Hasela, mulami wa bilulu bia mukelenge (mukashi eu wakadi mushikame mu Yelushalema ku luseke luibidi;) bakamuambila bualu ebu.

²³Yeye wakabambila ne, Yehowa, Nzambi wa Isalele, udi wamba ne, Nuambile muntu wakanutuma kundi ne,

²⁴Yehowa udi wamba ne, Mona, nentumine muaba eu ne bantu badi bashikamamu milau yonso idi mifunda mu mukanda wakubalabo ku mpala kua mukelenge wa Yuda.

²⁵Bualu bua bobo bakumpidia, bakuoshela nzambi mikuabo musenga wa manananshi, bua kunfuishabo tshiji ku bienzedi bionso bia bianza biabo; nunku tshiji tshianyi tshidi ku muaba eu, katshiena tshijima nansha.

²⁶Kadi nuambile mukelenge wa Yuda wakanutuma bua kukonka Yehowa ne, Yehowa Nzambi wa Isalele udi wamba ne, Bua mei awakunvua,

²⁷bualu bua mutshima webe wakanyingalala ne bua wewe wakadihuekesha ku mpala kua Nzambi hawakunvua mei andi akambeye bua muaba eu ne bua bantu badi bashikamamu, wakadihuekesha ku mpala kuanyi, wakadihanda bilulu biebe, wakadila ku mpala kuanyi, Yehowa udi Wamba ne, Meme kabidi nakunvua mei ebe.

²⁸Mona, nenkusangishe diatshimue ne bankambua bebe, neubuele mu lukita ne ditalala; mesu ebe kaena amona malu makole andi ntuma ku muaba eu ne kudi bantu badi bashikamamu. Bakalua ne dî adi kudi mukelenge.

²⁹Hashishe mukelenge wakabikila bakulu bonso ba mu Yuda ne ba mu Yelushalema.

³⁰Mukelenge wakabuela mu nsubu wa Yehowa ne Bena Yuda bonso ne bantu ba mu Yelushalema ne bakuidi ne Bena Lewi ne bantu bonso, ne banene ne bakese; yeye wakababadila mei onso a mu mukanda wa tshihungidi wakasanganabo mu nsubu wa Yehowa.

³¹Mukelenge wakimana mu muaba wandi, wakahunga ne Yehowa tshihungidi bua kulonda ku nyima kua Yehowa ne bua kutumikila mikenji yandi ne mei andi ne malu adiye musue muntu enze, ne mutshima wandi wonso ne muoyo wandi wonso, ne bua kutumikila mei a tshihungidi akadi mafunda mu mukanda eu.

³²Yeye wakitabushisha bantu bonso ba mu Yelushalema ne Benyamina bualu ebu kabidi. Bantu ba mu Yelushalema bakatumikila tshihungidi tshia Nzambi, Nzambi wa bankambua babo.

³³Yoshiya wakumusha malu a bundu onso akadi mu maloba a Bena Isalele; wakenzesha bantu bonso ba mu Isalele bua bobo bakuatshile Yehowa Nzambi wabo mudimu. Mu matuku andi onso kabakalekela kulonda Yehowa, Nzambi wa bankambua babo.