Read tshiluba 2 Kulondolola 35 Bible Online

2 Kulondolola 35 - tshiluba bible

2 Kulondolola 35

¹Yoshiya wakadila Yehowa bidia bia disanka dia kuhita kua Yehowa; bakashiha mikoko ku dituku dia dikumi ne dinai dia mu ngondo wa kumudilu.

²Yeye wakateka bakuidi mu miaba yabo, wakakolesha mitshima yabo mu mudimu wa mu nsubu wa Yehowa.

³Yeye wakambila Bena Lewi bakadi bayisha Bena Isalele bonso ne bakadi bajidila kudi Yehowa ne, Nuteke mushete wa tshijila mu nsubu wakasa Solomo, muana wa Davidi, mukelenge wa Isalele; bujitu ebu kabuikadi ha maha enu kabidi; katataka nukuatshile Yehowa ne bantu bandi Bena Isalele mudimu.

⁴Nudilongolole ku nsubu ya batatuʼenu mu milongo yenu, bu muakafunda Davidi, mukelenge wa Isalele, ne bu muakafunda Solomo muanʼandi.

⁵Nuimane mu muaba wa tshijila bu muakatahululabo nsubu ya batatuʼenu, bana ba mu ditunga, bua muntu ne muntu wa mu nsubu ya batatuʼenu Bena Lewi ikale ne tshituha tshiandi.

⁶Nushihe mikoko ya kuhita kua Yehowa, nudijidile, nujidile bana benu, bu muakadi dî dia Yehowa diakambabo kudi Mose.

⁷Yoshiya wakaha bantu bonso bakadiku milambu ya kufila mu kuhita kua Yehowa, mikoko ne bana ba mikoko binunu makumi asatu ne balume ba ngombe binunu bisatu; ebi biakadi munkatshi mua bintu bia mukelenge.

⁸Bantu banene bakaha bantu ne bakuidi ne Bena Lewi bintu biakasuabo mu mitshima yabo. Hilekiya ne Zekâya ne Yehiele, bakokeshi ba nsubu wa Nzambi, bakaha bakuidi milambu ya kufila: mikoko binunu bibidi ne nkama isambombo ne ngombe nkama isatu.

⁹Konaniya ne Shemaya ne Netanele ne bana babo ne Hashabeya ne Yiele ne Yozabada, bantu banene ba Bena Lewi, bakaha Bena Lewi milambu ya kufila: bana ba mikoko binunu bitanu ne ngombe nkama itanu.

¹⁰Nunku bakalongolola midimu yabo, ne bakuidi bakimana mu miaba yabo ne Bena Lewi ku milongo yabo bu muakadi mukenji wa mukelenge.

¹¹Bakashiha mikoko ya kuhita kua Yehowa, bakuidi bakamiamina mashi akangatabo ku bianza biabo; Bena Lewi bakûbula biseba biai.

¹²Bakumusha milambu ya kuosha bua kuyifila kudi Yehowa bu muakadi kutahulula kua nsubu ya batatuʼabo, bana ba mu ditunga, bu muakafundabo mu mukanda wa Mose. Bakenza nunku ne balume ba ngombe kabidi.

¹³Bakanyika mikoko ya kuhita kua Yehowa ha kahia bu muakadi mukenji; bakalamba milambu ya tshijila mu ngesu, mu bivuadi ne mu mpanza, bakaya nʼai kudi bantu bonso lukasa.

¹⁴Ku nyima bakadilongoluela bintu biabo ne bia bakuidi, bualu bua bakuidi, bana ba Alona, bakadi bafila milambu ya kuosha ne ya dianyi tô ne hatula butuku; nunku Bena Lewi bakadilongoluela bintu biabo ne bintu bia bakuidi, bana ba Alona.

¹⁵Bimbi ba misambu, bana ba Asafa, bakadi mu miaba yabo bu muakadi mukenji wa Davidi ne wa Asafa ne wa Hemana ne wa Yedutuna, mumonyi wa malu wa mukelenge; batanu bakadi ku tshibi ne ku tshibi; kabakadi ne bua kumuka ku mudimu wabo, bualu bua bana babo Bena Lewi bakabalongoluela bintu biabo.

¹⁶Nunku bakalongolola malu onso dituku adi bua kudia bidia bia disanka dia kuhita kua Yehowa, ne bua kufila milambu ya kuosha ha tshioshelu tshia Yehowa, bu muakadi mukenji wa mukelenge Yoshiya.

¹⁷Bena Isalele bakadiku bakadia bidia bia kuhita kua Yehowa ku tshikondo atshi ne bidia bidi kabiyi ne luevene tô matuku muanda mutekete.

¹⁸Kabakadi ne kuhita kua Yehowa munkatshi mua Bena Isalele bu eku, katshia mu matuku a Samuele muprofete; bakelenge bakuabo kabakadi ne kuhita kua Yehowa bu eku kuakenza Yoshiya ne bakuidi ne Bena Lewi, ne Bena Yuda ne Bena Isalele bakadiku, ne bantu ba mu Yelushalema.

¹⁹Bakadia bidia bia kuhita kua Yehowa mu tshidimu tshia dikumi ne muanda mukulu tshia bukelenge bua Yoshiya,

²⁰Ku nyima kua bualu ebu, bakamana Yoshiya kulongolola ntempelo, Neko, mukelenge wa Ejipitu, wakaya bua kuluangana ne ba mu Kâkemisha ku muelelu wa musulu wa Pelata; Yoshiya wakaya bua kuluangana nʼandi.

²¹Kadi yeye wakamutumina miloho yamba ne, Ndi nʼebe bualu kai, wewe mukelenge wa Yuda? Tshiakuluila bua kuluangana nʼebe lelu eu, kadi ndi nduangana ne badi nʼanyi lukuna; Nzambi wakungambila kahidi ne, Uye lukasa; nunku kudibuesha mu malu a Nzambi udi nʼanyi, bua yeye kakushihi.

²²Kadi Yoshiya wakahidia kumukoma nyima, wakadifuanyikisha bu mukuabo, bua yeye aluangane nʼandi, kakitabusha mei a Neko akamuambilabo kudi Nzambi; wakaya kuluangana nʼandi mu tshibanda tshia Megido.

²³Bena mata bakelela Yoshiya mikete; mukelenge wakambila bantu bandi ne, Nuye nʼanyi, bualu bua ndi mutaha mputa munene.

²⁴Nunku bantu bandi bakamûmusha mu dikalu diandi, bakamuteka mu dikalu diandi dikuabo diakadiye nʼadi, bakaya nʼandi ku Yelushalema; yeye wakafumaku, bakamujika mu nkita ya bankambua bandi. Bena Yuda bonso ne ba mu Yelushalema bakashila Yoshiya madilu.

²⁵Yelemiya wakashila Yoshiya madilu kabidi; bimbi ba misambu ne balume ne bakashi hadi batela dina dia Yoshiya mu miadi yabo tô ne ku dituku edi, bakayijadika bu tshilele mu Isalele, ne monai, mei au adi mafunda mu mukanda wa miadi.

²⁶Bienzedi bikuabo bia Yoshiya ne malu mimpe akenzeye bu muakadi mikenji ya Yehowa,

²⁷ne malu andi a kumudilu ne a kunshikidilu, monai, bidi bifunda mu mukanda wa bakelenge ba Isalele ne ba Yuda.