Read tshiluba 2 Kulondolola 8 Bible Online

2 Kulondolola 8 - tshiluba bible

2 Kulondolola 8

¹Hakahita bidimu makumi abidi hakamana Solomo kuibaka nsubu wa Yehowa ne nsubu wandi kabidi,

²Solomo wakasa misoko yakamuha Hulama, wakashikikamu Bena Isalele.

³Solomo wakaya ku Hamatasoba, wakauhita bukole.

⁴Yeye wakasa Tademô mu tshihela, ne misoko mikuabo ya mu Hamata bua kutekelamu bintu biandi.

⁵Yeye wakasa kabidi Bete-holona ku mutu kua mukuna ne Bete-holona mukuabo mu tshibanda, misoko ya ngumbu, ne bibi bia biamu;

⁶wakasa Balata ne misoko mikuabo yakadi nʼai Solomo bua kutekamu bintu biandi ne misoko ya makalu andi ne misoko ya bena nvita bandi bakadi benda ha nyima ha tubalu ne misoko yonso yakasua Solomo kuasa mu Yelushalema ne mu Lebanona, ne mu nseke yonso yakakokesheye.

⁷Bantu bakuabo ba Bena Hiti ne Bena Amole ne Bena Pelese ne Bena Hiwi ne Bena Yebuse bakadi bashala, bakadi kabayi Bena Isalele;

⁸Solomo wakabuesha bana babo bakadi bashala ku nyima kuabo, bakadi kabayi bashihibue kudi Bena Isalele, mu buhika tô ne ku dituku edi.

⁹Kadi Solomo kakabuesha bana ba Bena Isalele bu bahika mu mudimu wandi; kadi bobo bakadi bena nvita ne tupitene ne tuhita tua bena makalu ne ba bakadi benda ha nyima ba tubalu.

¹⁰Bobo bakadi tupitene tua Solomo ku mutu kua Bena Isalele, tuakadi nkama ibidi ne makumi atanu.

¹¹Solomo wakumusha muana mukashi wa Palô mu musoko wa Davidi, ku nsubu wakamuibakileye; bualu bua yeye wakamba ne, Mukashi wanyi kena mushikame mu nsubu wa Davidi, mukelenge wa Bena Isalele, bualu bua ei idi miaba ya tshijila yakadi mushete wa Yehowa.

¹²Hashishe Solomo wakahia milambu ya kuosha ba tshioshelu tshia Yehowa tshiakaseye mu mbalanda

¹³buatshia-buatshia bu muakadi mikenji ya Mose, ku matuku a lumingu, ne hakabala ngondo, ne hakadiabo bidia bia disanka misangu isatu ku tshidimu ku tshidimu, hakadiabo bidia bidi kabiyi ne luevene, ne bidia bia disanka dia mbingu, ne bidia bia disanka dia bitandatanda.

¹⁴Yeye wakasungula milongo ya bakuidi mu midimu yabo, ne Bena Lewi mu midimu yabo bu muakadi mikenji ya Davidi, bua kuimbabo misambu, ne bua kuenzabo midimu ya bakuidi buatshia-buatshia; ne balami ba bibi ku milongo yabo ku tshibi ne ku tshibi; bualu bua Davidi, muntu wa Nzambi, wakela mikenji nunku.

¹⁵Kabakasesuka ku mikenji ya mukelenge kudi bakuidi ne Bena Lewi mu malu au onso nansha mu bibutshilu bia bintu.

¹⁶Bakalongolola midimu yonso ya Solomo ya mu nsubu wa Yehowa ku makunshi tô ne hakamanabo nsubu mujima. Nunku nsubu wa Yehowa wakashikishibua.

¹⁷Hashishe Solomo wakaya ku muelelu wa mai manene ku Esione-gebê, ne ku Elota mu buloba bua Edome.

¹⁸Hulama wakamutumina matu ku bianza bia bantu bandi, mbantu bakamanya mua kuendesha matu; bakaya ne bantu ba Solomo ku Ofî, bakafumaku ne ntalanta[7] ya or nkama inai ne makumi atanu, bakalua nʼai kudi Solomo.